அதுதவிர, புதிய அரசிடம் த.தே.கூட்டமைப்பு வைத்த இரண்டு முக்கிய கோரிக்கைகளில் ஒன்று டக்ளஸ் தேவானந்தாவிற்கு அமைச்சுப் பதவி வழங்கக் கூடாது மற்றையது கிழக்கு மாகாண முதலமைச்சர் பதவியை கூட்டமைப்பிற்கே தரவேண்டும். கிழக்கு மாகாண முதலமைச்சர் பதவி யாருக்கு என்று ஒரு நிலைப்பாட்டை எடுப்பது ஜனாதிபதிக்கு தர்மசங்கடமானது. அவரிடம் போய் பதவிக்கு கெஞ்சும் அளவிற்கு முஸ்லிம்களுடனான உறவில் விரிசலை வளர்த்து வைத்திருக்கிறார்கள் இந்தத் தமிழரசுத் தலைவர்கள்.

70களுக்கு முன்பெல்லாம் தமிழர்களுக்கும் தங்களுக்கும் ஒரே தலைமைதான் என்று தேர்தல்களில் தமிழரசுக் கட்சிக்கு வாக்களித்து வந்தவர்கள்தான் முஸ்லிம்கள். முஸ்லிம் காங்கிரசைத் தொடங்கிய தலைவர் அஷ்ரப் உட்பட பல முஸ்லிம் தலைவர்களும் தமிழரசுக் கட்சியிலேயே இருந்தவர்கள். தமிழ்த் தலைமை நடந்துகொண்ட விதம்தான் முஸலிம்களைத் தனிவழி பார்க்க வைத்தது முஸ்லிம் காங்கிரஸ் கட்சியின் தோற்றத்திற்குக் காரணமானது.

உண்மையில் சிங்கள அடக்குமுறையை எதிர்த்து உருவானதல்ல முஸ்லிம் காங்கிரஸ்.
தமிழ்த் தலைமை தங்களை ஏமாற்றுவதாகவே அவர்கள் தனிக்கட்சி தொடங்கினார்கள். இப்போதும் முஸ்லிம்களிடம் பேசிப்பார்த்தால் தெரியும், தமிழர்களைத்தான் அவர்களால் பிரதானமாக நம்பமுடியாது என்று கருதுகிறார்கள். தமிழர்களின் தலைமையாக சொல்லிக்கொண்டவர்கள், இனவாதத்தின் மூலம் தமிழர்களை ஒன்றுதிரட்டுவதற்காக முஸ்லிம் எதிர்ப்பையும் தூண்டி வளர்த்தார்கள் என்பதே உண்மை. தங்களது தேர்தல் லாபத்திற்காக வளர்த்த தமிழ் இனவாதத்தின் விளைவுதான் இது.

அதன்பிறகு அவர்களது தேர்தல் லாபத்திற்காக முஸ்லிம்களும் இனவாதத்தைப் பேசினார்கள். சிறுபான்மையினருக்கான அரசியலுரிமைகளைப் பெறுவதற்கு முஸ்லிம்களையும் அரவணைத்துச் செல்ல வேண்டும் என்ற தேவையை விளங்கிக் கொள்ளாத தமிழ்த் தலைவர்கள், தேர்தல் வெற்றிகளுக்காக இனவாதம் பேசிப் பேசி பிளவை மேலும் அகலப்படுத்தினார்கள். இப்போதும் முஸ்லிம்களையும் அவர்களது அபிலாசைகளையும் அலட்சியப் படுத்தியபடியே தான், தமிழர்களோடு அவர்கள் ஒத்துழைக்க வேண்டும் என்று தமிழ்த் தலைவர்கள் கேட்டுக் கொண்டிருக்கிறார்கள்.

“கிழக்கு மாகாண சபைக்கான தேர்தல் காலத்திலும், அதன் பின்னரும் முதலமைச்சர் பதவி விட்டுத் தருகின்றோம். கூட்டாட்சிக்கு வாருங்கள் என்று அழைத்தோம். அப்போது அதனை நிராகரித்துவிட்டு மஹிந்தவோடு இணைந்து ஆட்சியை அமைத்தார்கள். இப்போது, தமிழ்த் தேசியக் கூட்டமைப்பு முதலமைச்சர் பதவியை விட்டுத்தர வேண்டும் என்று கோருவது என்ன வகையிலான நியாயம்?” என்று தமிழ்த் தேசியக் கூட்டமைப்பு சார்புக் கட்டுரையாளர் எழுதுகிறார்.

இப்போதும், அவர்கள் என்ன கருதுகிறார்கள் என்று கவனிக்க இவர்கள் தயாரில்லை. இவர்களுக்குப் பதவியை விட்டுத் தராவிட்டால் சிங்களத் தலைவரிடம் முறையிடுவோம் என்கிற வகையில் செயற்பட்டு, சக சிறுபான்மைச் சமூகத்தை வெல்ல முடியுமா? இன்னுமின்னும் சமூக விலகலைத்தான் ஏற்படுத்திக் கொண்டிருக்கிறார்கள்.

அமைதி சமாதானம் ஜனநாயகம்

www.sooddram.com