உல்லாச புரியாக மாறிவரும் கிழக்கின் பாசிக்குடா

மட்டக்களப்பு மாவட்டத்தின் பாசிக்குடா பகுதியில் அமைக்கப்பட்டு வரும் உல்லாச பயணிகளுக்கான ஹோட்டல்களுக்கு தேவையான ஹோட்டல் உத்தியோகஸ்தர்களை பயிற்றுவிக்க மட்டக்களப்பு மாவட்டத்தில் ஹோட்டல் பணியாளர் பயிற்சி பாடசாலையொன்று அமைக்கப்படும் என கிழக்கு மாகாண முன்னாள் முதலமைச்சர் சிவநேசத்துரை சந்திரகாந்தன் தெரிவித்தார்.

கடந்த சனிக்கிழமை மட்டக்களப்பு பாடும் மீன் ஹோட்டலில் ஊடகவியலாளர்களை சந்தித்த போதே அவர் மேற்கண்டவாறு தெரிவித்தார். திருகோணமலையில் தற்பொழுது ஹோட்டல் ஊழியர்களை பயிற்றுவிப்பதற்கான பயிற்சிப் பாடசாலையொன்று செயற்பட்டு வருகிறது. கிழக்கு மாகாணத்தினால் அமைக்கப்பட்ட மேற்படி பயிற்சி பாடசாலையில் பயிற்சி பெற்ற பயிலுனர்கள் தற்பொழுது பிரபல ஹோட்டல்களில் கடமை புரிகின்றனர். அதேபோன்று மட்டக்களப்பு மாவட்ட இளைஞர்களுக்கு மட்டக்களப்பிலும் ஹோட்டல் பயிற்சி பாடசாலை ஆரம்பிக்கப்படும்.

கிழக்கு மாகாணத்தில் உல்லாசப்பயணத்துறையை ஊக்குவிக்க அரசாங்கம் பல வழிகளிலும் செயற்பட்டு வருகிறது. பாசிக்குடாவில் இரண்டு உல்லாசப் பயண ஹோட்டல்கள் உள்ள மேலும் 14 ஹோட்டல்களை அமைப்பதற்கான அனுமதி வழங்கப்பட்டுள்ளது. மேற்படி ஹோட்டல்களுக்குத் தேவையான ஊழியர்களை வழங்குவதற்கென மட்டக்களப்பு மாவட்டத்தில் ஹோட்டல் ஊழியர்களை பயிற்றுவிப்பதற்கான பயிற்சி நிலையமொன்று விரைவில் அமைக்கப்படும்.

பாசிக்குடா பகுதியில் அமைக்கப்படும் உல்லாச ஹோட்டல்களில் உள்ளூர் வாசிகளுக்கு தொழில் வாய்ப்பு வழங்க சம்பந்தப்பட்ட ஹோட்டல் கம்பனிகளின் நிர்வாகங்கள் முன்வந்துள்ளன. சம்பந்தப்பட்ட கம்பனிகளின் முடிவை நாமும் பெரிதும் பாராட்டுகிறோம் என்றும் கூறினார் முன்னாள் முதலமைச்சர்.

பாசிக்குடா பகுதிகளுக்கு வெளிநாட்டு உல்லாச பயணிகள் மட்டுமல்ல உள்நாட்டு உல்லாச பயணிகளும் பெருந்தொகையினர் வருகின்றனர். உல்லாச பயணிகளுக்கு ஒரு முக்கிய இடமாக விளங்க தொடங்கியுள்ளது. பாடசாலை மாணவ மாணவிகளும் கல்வி சுற்றுலா இப்பகுதிக்கு வரத் தொடங்கியுள்ளனர்.

பாசிக்குடா அமித்யஸ்ட் செஸ்ஹோட் ஹோட்டல் முகாமையாளர் சஞ்சீவ ஜெயமன் கூறுகையில் இந்த ஹோட்டல் இவ்வருடம் மார்ச் மாதம் 18ஆம் திகதி முதல் செயற்பட தொடங்கியுள்ளது. இப்பொழுது 40 அறைகள் உள்ளன. இன்னும் 60 அறைகள் எதிர்வரும் ஆகஸ்ட் மாதம் முதல் சேர்த்துக் கொள்ளப்படும்.

650 மில்லியன் ரூபா செலவில் 5 தனியார் கம்பனிகள் இணைந்து இந்த ஹோட்டலை கட்டியுள்ளன. இந்த ஹோட்டலில் தற்பொழுது 67 ஊழியர்கள் கடமையாற்றுகின்றனர். அவர்களில் 40 வீதமானவர்கள் உள்ளூர் வாசிகள், அயல் கிராமங்களை சேர்ந்தவர்கள்.

வெளிநாட்டவர்கள் டொல்பின் சுறா மீன்களை பார்வையிடுவதற்கும் இங்கு வருகின்றனர். உல்லாச பயணிகளுக்கான சகல அடிப்படை வசதிகளையும் அரசாங்கம் செய்துள்ளது. எமது ஹோட்டலை பொறுத்த வரையில் எந்நேரமும் 60 வீதத்திற்கு மேற்பட்ட ஹோட்டல் அறைகளில் பயணிகள் தங்கி இருக்கின்றனர் என்றும் அவர் தெரிவித்தார்.

அண்மையில் ஊடகவியலாளர் குழு பாசிக்குடா பகுதிக்கு சென்ற பொழுது அப்பகுதிக்கு பெரும் தொகையானோர் வந்திருப்பதை காணக்கூடியதாக இருந்தது. இது போன்ற கூட்டம் தினமும் அப்பகுதிக்கு வருவதாக அப்பகுதியில் கடலை வியாபாரத்தில் ஈடுபட்டுக் கொண்டிருந்த இளம் வர்த்தகர் தெரிவித்தார்.

பாசிக்குடா பகுதி ஓர் ‘குட்டி கோல்பேஸ்’ போல் காட்சியளித்தது. நடமாடும் ஐஸ்கிaம் வாகனங்கள் மும்முர வர்த்தகத்தில் ஈடுபட்டுக் கொண்டிருந்தன.

கடலில் குளிப்போருக்கு பாதுகாப்பு வழங்குவதற்கென பொலிஸாரின் படகுகள் பாதுகாப்பு பிரிவு தயார் நிலையில் வைக்கப்பட்டுள்ளது. அதனை விட தனியார் படகுகள் பலவுள்ளன. சுமார் 20 நிமிட படகு பயணத்துக்கு ஒருவரிடமிருந்து 100 ரூபா அறவிடப்படுகிறது.

கடலில் குளிப்பவர்களுக்கு பாதுகாப்பு ஆலோசனைகள் அதாவது ஆழம் நிறைந்த பாதுகாப்பற்ற பகுதிகளுக்கு செல்ல வேண்டாமென பொலிஸார் விசில் மூலம் சமிக்ஞை வழங்குகின்றனர்.

எவரும் ஆழமான கடல் பகுதிக்கு சென்று தத்தளித்தால் அவர்களை மீட்டு வருவதற்கு கரையில் கண்ணில் விளக்கெண்ணையை ஊற்றிக் கொண்டு பொலிஸார் தயார் நிலையில் உள்ளனர்.

பெருந்தொகையான சிறுவர்கள் கடலை கண்ட ஆர்வம், மகிழ்ச்சியில் சிறுவர்கள் தாம் அணிந்து வந்த உடை பாத அணிகளை கழற்றாமல் கூட கடலில் பாய்கின்றனர். சிறுவர்களின் ஆர்வத்தை கரையில் இருந்துகொண்டு பெற்றோர்கள், உறவினர்கள் மகிழ்ச்சியில் ஆரவாரம் செய்கின்றனர். புகைப்படமும் எடுக்கின்றனர்.

பாசிக்குடா பகுதிக்கு செல்லும் வெளி இடத்தவர்கள் அப்பகுதியில் விற்பனை செய்யப்படும் காத்தான்குடி கைத்தறி சாரங்கள் உட்பட கைத்தறி புடவைகளை கொள்வனவு செய்கின்றனர். இது கைத்தறி புடவை நெசவாளர்களுக்கு ஒரு ஊக்குவிப்பாக அமைகிறது.

உல்லாச பயணிகளும் காத்தான்குடி கைத்தறி புடவைகளை அணிந்திருப்பதை கவனிக்க கூடியதாக இருந்தது. கிழக்கில் நிலவிய சூழ்நிலை காரணமாக அப்பகுதிக்கு செல்ல முடியாதிருந்த வெளிமாவட்டத்தவர்கள் பணத்தை செலவளித்து அப்பகுதிகளை பார்வையிடச் செல்கின்றனர். இது கிழக்கு தெற்கு மக்களை ஒருவருக்கொருவர் பழகிக் கொள்ள அரிய சந்தர்ப்பமாக அமைகிறது.

கிழக்கு மக்களும் தென் பகுதி மக்களும் அப்பகுதிகளுக்கு செல்ல பெரிதும் விரும்புகின்றனர். தென் பகுதி மக்கள் கிழக்கிற்கு செல்வதால் கிழக்கு மக்கள் சிங்கள மொழியில் பேசவும் பழகியுள்ளனர். தென் பகுதியில் இருந்து வரும் மக்களுடன் சிங்கள மொழியில் பேசுகின்றனர். இதனால் இது ஒரு உல்லாச பயணம் மட்டுமல்ல ஓர் உறவு பாலமாகவும் அமைந்துள்ளது.