நாபா நினைவு மீட்சியும் வடக்கு கிழக்கு மாகாண சபை நிதர்சனமும் தொடர்..5

(எனது தொடர் பகுதி 4ல் தாங்கள் போட்ட தோற்றம் போன்றதே, 1978ல் நான் சந்தித்த நாபா. சிறு மாற்றம் செய்தால் உண்மை சொரூபம் வெளிப்படும். தாடி மீசை அற்ற நீல டெனிம் ஜாக்கற், டெனிம் கால்சட்டை போட்ட மெலிந்த தோற்றமுடைய நாபா வெளிப்படுவார். அந்த தோற்றத்தில் முதலில் நான் கண்ட நாபாவை பின் நாளில் கட்டுமஸ்த்தனான உடலுடன் பார்த்த வேளை அவரிடம், நான் எவ்வளவு உண்டாலும் என் உடல் கட்டுமஸ்த்தாக இல்லை என குறைப்பட, அவர் தான் கூறும் உணவு பழக்கத்தை, உடல் பயிற்சியை தொடர்ந்து செய்வேன் என சத்தியம் செய்தால் சொல்லித் தருவேன் என தனது கரத்தை, சிறுபிள்ளைகள் நீட்டுவது போல நீட்ட நானும் அளிச்சாட்டிய ( பொய் ) சத்தியம் செய்து அவரை ஏமாற்றிய பலனை, பின்னாளில் கண்டதையும் உண்டு, உடல் பயிற்சி இன்றி கொளுப்பை சேரவிட்டு இதய இரத்தோட்ட அடைப்புக்காய், அறுவை சிகிச்சை செய்த போது உணர்ந்தேன். அதிக கொழுப்பற்ற அளவான உணவு, அதற்கு தேவையான உடல் பயிற்சி, அது தான் நாபாவின் அறிவுரை. நல்லார் சொல்புத்தி கேளான் தன் உடல் நிலை கெட்ட பின்பு தான் அதுபற்றி உணர்வான் என்பது என் அனுபவம்.
- ராம் -
ஆசிரியர் அவர்கட்கு ! தயவான வேண்டுகோள்
சிரமம் இல்லை என்றால் இதனை 5வது பதிவின் முதல் பந்தியாக பதிவிட முடியுமா ?
நன்றி)

முதல்வர் முடிந்தவரை ஜனாதிபதியுடனும் மத்தியுடனும் இணக்கப்போக்கையே கடைப்பிடித்தார். அதன் முன்னோடி நிகழ்ச்சியாக 1989 சுதந்திர தினத்தில் திருமலையில் தேசியக்கொடியை முதல்வர் ஏற்றிய சம்பவம் நடந்தேறியது.

ஒன்றுபட்ட இலங்கைக்குள் முழுமையான அதிகாரபகிர்வுடனான இணைந்த வடக்கு கிழக்கு மாகாண அரசை நிலைக்க செய்ய இயன்றவரை மத்தியுடன் முதல்வர் இணங்கியே செயல்ப்பட்டார்.    

ஆனால் மாகாணசபை கடித தலைப்பில் வடக்கு கிழக்கு மாகாண அரசு (North-East Provincial Government) என போடப்படும் விடயம் பாராளுமன்றத்தில் பூதாகாரமாக வெடித்தது. எப்படி மாகாண அரசு என போடலாம் என இனவாத உறுப்பினர்கள் வாதிட்டனர்.

அப்போது அமரர் அமிர்தலிங்கம் அவர்களுடன் அரசு என்பது அசிங்கமான    வார்த்தை அல்ல ( Government is not a Dirty Word ) லோக்கல் கவர்மெண்ட் (Local Government) என உள்ளூர் ஆட்சி சபையை கூற முடியுமானால் மாகாண சபையை ஏன் புறவின்சியல் கவர்மெண்ட் (Provincial Government) என குறிப்பிட கூடாது என வாதிட்டார். வடக்கு  கிழக்கு மாகாண சபையை முடக்கும் இனவாதிகளின் செயல் அதிலிருந்து ஆரம்பமானது.

மாகாண நிரலில் இருந்த விடயங்களை தமது அமைச்சுகளின் கீழ் செயலாளர்கள் கொண்டு வந்ததும் மத்திய அரசின் அதிகாரிகள் அதுவரை தம்மிடம் இருந்தவை பறிபோனதால் பதறியடித்து தமது அமைச்சர்கள் மூலம்  பிரேமதாசாவின் பின்னால் அணிதிரண்டனர்.

அவர்களின் சதிவலைக்கு ஜேஆர் போட்ட சூத்திரம் பயன்பட்டது.  எம்மிடம் பொதுப்பட்டியல் பிரச்னையை தீர்ப்பதாக கூறி தேர்தலின் போது ஆதரவு கேட்ட பிரேமதாசா அதனையே வடக்கு கிழக்கு மாகாண அரசு என்ற யானையை அடக்கும் அங்குசமாக (ஆயுதமாக) பயன்படுத்தினார். 

13வது திருத்தத்தில் மாகாண நிரல் மத்திய நிரல் என வரையறுக்கப்பட்டிருந்த பட்டியலுடன் பொதுநிரல் என்ற பட்டியலில் உள்ள விடயங்களை தமக்கு ஏற்ற விதத்தில் மத்திய அரசுக்கானதாக வியாக்கியானம் செய்தனர். மேலும் மாகாணா நிரலிலும் தேசிய பாடசாலை, பிரதேச செயலாளர் என மூக்கை நுழைத்தனர். முரண்பாடுகளை தீர்க்க திருமலைக்கும் கொழும்புக்கும் இடையில் பயணப்படுவதே முதல்வரின் வேலையாயிற்று.

இங்கு வேடிக்கை என்னவென்றால் ஏனைய மாகாண சபைகளுக்கும் அவை யுஎன்பி கட்சியின் கட்டுப்பாட்டில் இருந்த போதும் அவற்றிக்கும் பொதுப்பட்டியல் பகிரப்படாமல் அங்கும் மாகாண நிரலில் மூக்கை நுழைக்கும் செயல்கள் நடந்தன.

அப்போது வடமத்திய மாகாண முதல்வர், வடக்கு – கிழக்கு முதல்வர் எங்களுக்காகவும் வாதாடுகிறார் என பத்திரிகையில்  அறிக்கை விட்டார். பிரேமதாசா முழுமையாக மாகாண சபை முறைமையை எதிர்த்ததே அதற்கான காரணம்.

(தொடரும்.......)

அமைதி சமாதானம் ஜனநாயகம்

www.sooddram.com