நாபா நினைவு மீட்சியும் வடக்கு கிழக்கு மாகாண சபை நிதர்சனமும் தொடர்..6

இலங்கை இந்திய ஒப்பந்தத்தில் பிறந்த மாகாண சபை என்னும் குழந்தை தன் தகப்பன் தர மறுத்ததை தாயிடம் கேட்டது. பிரேமதாசா பின்னடித்ததால் முதல்வர் இந்திய பிரதமர் ராஜீவ் காந்தியிடம் அதிகாரபகிர்வின் குறைபாடுகளை பட்டியல் இட்டார். விபரீதத்தை உணர்ந்த பிரேமதாசா தந்திர நடவடிக்கையாக தனது பாதுகாப்பு பிரதி அமைச்சர் ரஞ்சன் விஜயரத்தினவை திருமலை அனுப்பிவைத்தார்.

ஜனாதிபதி தேர்தலின் போது பொதுப்பட்டியல் பிரச்சனையை தீர்ப்பதாக சொல்லி ஆதரவு கேட்டதை,  முதல்வர் அவருக்கு ஞாபகமூட்ட அவர் இந்திய அமைதிப்படை பிரசன்னத்தை காரணம் காட்டி தெற்கில் ஜே வி பி கலவரம் தொடர்வதால் அதை நிறுத்த இந்திய அமைதிப்படை வெளியேற்றத்துக்கு முதல்வர் ஒத்துழைத்தால் அதிகாரபகிர்வு விடயம் சுலபமாகும் என பிரேமதாசாவின் சதிவலைக்குள் முதல்வரை சிக்கவைக்க முயன்றார்.

நிரந்தரமாக இணைக்கப்பட்ட  பூரண அதிகாரபகிர்வு கொண்ட,  வடக்கு கிழக்கு மாகாண அரசு அமையும் வரை அமைதிப்படை வெளியேற்றம் பற்றிய பேச்சுக்கே இடமில்லை என முதல்வர் உறுதிபட கூறிவிட்டார்.

அந்த நேரம் பிரேமதாசா யுத்தத்தில் ஈடுபட்ட தரப்பினரை பேச்சுவார்த்தைக்கு வருமாறு (குறிப்பாக ஜேவிபி யினரை) அழைப்பு விடுக்க நிலைமையை தமக்கு சாதகமாக்க புலிகள் வலிந்து பேச்சுவார்த்தைக்கு சென்றனர்.

ஒரு கல்லில் 3 மாங்காய்கள் அடிக்கும் அதிஸ்டம் பிரேமதாசாவுக்கு கிட்டியது. 1. புலிகளுடன் பேசி யுத்தநிறுத்தம் என்ற போர்வையில் இந்திய அமைதிப்படையை முடக்கி பின் வெளியேற்றல். 2. இந்திய படை வெளியேற்றம் மூலம் ஜே வி பி யை தாஜா பண்ணுவது. 3. புலிகளை வைத்தே வட – கிழக்கு மாகாண சபைக்கு மங்களம் பாடுவது.

புலிகளும் அதே 1கல் 3 மாங்காய்கள் திட்டத்தை தமக்கு சாதகமாக தீட்டினர். 1. பிரேமதாசாவுடன் உறவாடி அமைதிப்படையை வெளியேற்றுவது,  2. வடக்கு கிழக்கு மாகாண அரசை செயலிழக்க செய்வது, 3. மீண்டும் தம் தமிழ் ஈழ விடுதலை போரை தொடர்வது.

மாகாண அரசின் அதிரடி செயல்பாடுகள் தெற்கிற்கு மட்டுமல்ல புலிகளுக்கும் அப்போது அச்சத்தை ஏற்படுத்தியதால் தான் புலிள் மாகாண அரசை முடக்க முயன்றனர். .

அமைச்சின் செயலாளர்கள் மாகாண பட்டியல் மூலம் பல வேலை வாய்ப்புகளை குறுகிய காலத்தில் வழங்க இளைஞர்கள் மாகாண அரசு காரியாலயங்களை நோக்கி அணி அணியாக வரத்தொடங்கினார்கள். முன்னாள் போராளிகள் மாகாண பொலிஸ் பயிற்சிக்காக பல நூற்றுகணக்கில் இணைத்துக்கொள்ளப்பட்டனர். (இதற்கும் பின்பு நடந்த கட்டாய ஆட்சேர்ப்புக்கும் சம்மந்தமில்லை). புனர்வாழ்வு நடவடிக்கையால் மக்களுக்கு நம்பிக்கை ஏற்படதொடங்கியது.  

இந்தியா தன் உதவியாக நூற்றுக்கணக்கான மாருதி, மகேந்திரா, டாட்டா ஜீப்கள், பஸ்கள், தண்ணீர் பௌசர்கள், மின்சார ஜெனரேட்டர்கள், தொழில்பயிற்சி நிலலையத்துக்கு தேவையான இயந்திரங்கள், மிகப்பெரிய அச்சகம் அமைக்க தேயையான உபகரணங்கள் அனைத்தையும் நேரடியாக திருமலை துறைமுகத்தில் கொண்டுவந்தது தந்தது.

வாகன பதிவு திணைக்கள அதிகாரிகள் திருமலை வந்து இலக்க தகடுகளை வழங்க மறுக்க மாகாண அரசே அதனை செய்து முடித்தது. ஜீப் என்றால் NEPJ 001 என்றும், லொறி என்றால் NEPL 001 என்றும், பஸ்  என்றால் NEPB 001 என்றும் தொடர் இலக்கத்தகளுடன் வடக்கு கிழக்கில் வாகனங்கள் ஓடின. அப்போது இளைஞர் விவகார அமைச்சின் செயலாளர்  NEPJ 025 என்ற இலக்க மாருதி ஜீப்பில் கொழும்புவரை சென்று போக்குவரத்து பொலிசார் அதை தடுத்து பின் சமரசமான வேடிக்கை சம்பவமும் நடந்தது.

(தொடரும்.......)

அமைதி சமாதானம் ஜனநாயகம்

www.sooddram.com