நாபா நினைவு மீட்சியும் வடக்கு கிழக்கு மாகாண சபை நிதர்சனமும் தொடர்..7

புலிகள் பிரேமதாச பேச்சுவார்த்தையை தோழர் நாபா இதயசுத்தியுடன் வரவேற்று அறிக்கைவிட்டார். முன்பு அவர்கள் இடைக்கால நிர்வாக சபையை ஏற்றிருந்தால் நாம் இந்த சபைக்கு வந்திருக்க தேவையில்லை என்பதையும் குறிப்பிட்டார். ஆனால் புலிகளின் குறி மாகாண அரசை முடக்குவது. அதனால் அவர்களின் பக்கபலத்துடன் பன்சலைக்கு புத்தரை வழிபட சென்ற பிரேமதாசா அமைதிப்படையை வெளியேறச்சொல்லி அறிவிப்பு செய்தார். அதை துரிதப்படுத்த புலிகளுக்கு பெரும்தொகை ஆயுதங்களும் கொடுத்தார்.

அமைதிப்படையை கட்டம் கட்டமாகத்தான் மீளப்பெற முடியும் என்ற, இந்திய பிரதமர் ராஜீவுடன் முறுகல் நிலையை ஏற்படுத்தினார். இந்த நேரத்தில் அன்னை இந்திரா திடீர் மறைவால் ஏற்பட்ட கொள்கை மாற்றம் போல போபோஸ் பீரங்கி ஊழல் குற்றச்சாட்டில் ராஜீவ் காந்தி பதவி விலக, பிரதமரான வி பி சிங் அமைதிப்படை துரித விலகலுக்கு சம்மத்தித்தார்.  அவரை அந்த முடிவை எடுக்க தூண்டியவர் அப்போது புலிகளை ஆதரித்த வி பி சிங் அரசின் பங்காளியான கலைஞர் கருணாநிதி .

மாகாண அரசை முடக்கும் பிரேமதாசா புலி கூட்டின் திட்டத்தால் வரக்கூடிய அபாயத்தை ஊகித்த நாபா முதல்வருடன் நடத்திய கலந்துரையாடலின்படி கருணாநிதியை சந்தித்து விளக்கமளிக்க முடிவு செய்யப்பட்டது. மாகாண போக்குவரத்து அமைச்சர் அபு யூசுப் தலைமையில் மாகாண சபை உறுப்பினர்கள் அமரர் கந்தசாமி,  திருமதி ஞானசக்தி சிறிதரன் உடன் சென்னை சென்றபோது எம்மை சந்திப்பதை கருணாநிதி தவிர்க்க விரும்பினார். நாபாவும் முதல்வரும் அவர் சந்திக்க மறுத்தால் பத்திரிக்கை மாநாடு நடத்தி எமது முடிவை தெரிவித்துவிட்டு வாருங்கள் என்று அறிவித்தனர்.

செய்தி கருணாநிதி காதுக்குபோனதும் அவரது செயலாளர் குகன் தொலைபேசியில் சாந்தனை(லண்டன் தம்பா) தொடர்புகொண்டு கலைஞரை சந்திக்க வருபடி அறிவித்தார். தமிழ்நாடு அரச செயலகத்தில் நடந்த அந்த சந்திப்பு சுமுகமாக இருக்கவில்லை.

கலைஞரிடம் எமது கோரிக்கை மனுவை கையளித்தபோது அதை வாங்கிய அவர் அதை பிரித்து கூட பார்க்கவில்லை. எடுத்த எடுப்பில் புலிகளின்  பேச்சாளர் போல் பேசத்தொடங்கினார். கலைஞர் வயதொத்த அமரர் கந்தசாமி எமது மக்களை நீங்கள் தான் காப்பற்ற வேண்டும் என கெஞ்சினார்.

முரசொலி மாறன் உங்கள் முதல்வரை மாகாண சபையை கலைக்க சொல்லுங்கள் என கட்டளையிடும் தொனியில் கூற எனக்கும் அவருக்குமிடையில் வாய்த்தர்க்கம் மூண்டது.

கலைஞர் குறுக்கிட,  அவரிடம் மாகாணசபையை கலைத்தால் ஏற்படக்கூடிய விழைவை தவிர்க்க முதல்வர் உட்பட ஈ பி ஆர் எல் எப் உறுப்பினர்கள் பதவி விலகி தமது 38 (தனிப் பெருபான்மை) ஆசனங்களையும் புலிகளுக்கு கொடுக்கும் நாபா, முதல்வர் முடிவு தான் நாம் கையளித்த கோரிக்கையில் உள்ளது என்றுகூற,

மீண்டும் முரசொலிமாறன் புலிகள் பின்கதவால் பதவிக்கு வரமாட்டார்கள் மாகாண சபையை கலையுங்கள் என்று கடும் தொனியில் கூறி பேச்சுவார்த்தையை முறித்துக்கொண்டார். அன்று பின்கதவால் செல்லமறுத்த புலிகளின் தளபதி கருணா  அதே பின் கதவால் (தேசியப்பட்டியல்) தான் பாராளுமன்றம் சென்றார்.

பிரேமதாசா,  புலி,  கருணாதி மும்முனை தாக்குதலுக்கு முகம் கொடுக்கவே கட்சியின் உயர்மட்ட குழு முடிவின் படி 19 அம்ச கோரிக்கையை வைத்து மாகாண சபையில் முதல்வர் பிரேரணை நிறைவேற்றினார். பிரேமதாச அதை திரிவுபடுத்தி முதல்வர் ஈழப்பிரகடனம் செய்துவிட்டார் என அறிவித்தார். அவரின் கட்டுப்பாட்டில் இருந்த அனைத்து பத்திரிகைகளும் அவ்வாறே தலைப்பட்டு செய்தி வெளியிட்டன. எந்த பத்திரிகையும் அதன் உள்ளடக்கத்தை பிரேமதாசாவின் கட்டளைக்கு அமைய பிரசுரிக்கவில்லை.

அந்த பிரேரணையில் ஒருவருடத்துள் நிறைவேற்றபட வேண்டிய 19 கோரிக்கைகளும் தவறும் பட்சத்தில் 1வருட  கால அவகாச முடிவின் பின்னர் மாகாணசபை சட்டவாக்க சபையாக மாற்றமடையும் என்றே குறிப்பிடப்பட்டு இருந்தது.

முடிந்தவரை அஸ்கிரிய, மல்வத்தை பீடாதிபதிகள் உட்பட தென்னிலங்கை அரசியல் கட்சிகள் முற்போக்கு சக்திகள் அனைவருக்கும் பிரேரணை பிரதிகள் கையளிக்கப்பட்டன. அமைதிப்படை வெளியேற்றத்தை ஆவலுடன் எதிர்பார்த்த பெரும்பான்மையோர் எமது கோரிக்கையின் நியாயத்தன்மையை கண்டுகொள்ள விரும்பவில்லை.

அமைதிப்படை அம்பாறை, மட்டக்களப்பில் இருந்து வெளியேற புலிகள் பிரேமதாசா கொடுத்த ஆயுதங்களை கொண்டு மாகாண பொலிசாரை, சபை உறுப்பினர்களை, ஆதரவாளர்களை தாக்கதொடங்க, அவர்கள் திருமலைக்கு இடம்பெயர்ந்தனர்.

யாழில் இருந்தும் குடும்பம் குடும்பமாக வெளியேறவேண்டிய சூழ்நிலை. வன்னி கொலைக்களமாக மாறியது. தப்பி பிழைத்தவர்கள் திருமலையில் தஞ்சமடைந்தனர். அரச படைகள் பிரேமதாசாவின் கட்டளைப்படி புலிகளுக்கு அரணாக நின்றதால் மாகாண அரசால் தாக்குப்பிடிக்க முடியவில்லை.

திருமலையில் இருந்து இறுதி இந்திய அமைதிப்படை அணிகள் வெளியேறு முன் இந்தியா மனிதாபிமான அடிப்படையில் 3 கப்பல்களை அனுப்பி திருமலையில் புலிகளுக்கு இரையாகக் கூடியவர்களை காப்பற்றும் கடைசி நடவடிக்கையை செய்தது. குடும்பம் குடும்பமாக நூற்றுக் கணக்கானவரை ஏற்றி சென்ற கப்பல்களை சென்னை துறைமுகத்துக்குள் அனுமதியாது விசாகப்பட்டினம் திசை திருப்பினார் கருணாநிதி.

6 கோடி தமிழரின் தானைத்தலைவன் என மார்தட்டும் கருணாநிதி.  அபயம் கேட்டு வந்த தமிழரை அடுத்த மாநிலத்துக்கு கடத்திவிட்டார் என இந்தியன் எக்ஸ்பிரஸ் கொழும்பு நிருபர் ரீட்ட செபஸ்டியனிடம் ஆதங்கப்பட, அதை அவர் அப்படியே தலைப்பிட்டு எழுதினார்.

அதனால் பின்பு  நாபாவின் படுகொலை மரண நிகழ்விற்கு சென்ற போது கருணாநிதியின் பொலிஸ் கெடுபிடிக்கு தப்ப, திருவனந்தபுரம் ஊடாக என்னை பாதுகாப்பாக அனுப்பிவைத்தார் தமிழ்நாடு றோ அதிகாரி.

பின் கருணாநிதி பதவி பறிபோகும் வரை தமிழ்நாடு பக்கமே பயணிக்கவில்லை. தான் பறித்த குழியில் தானே விழுவது போல புலிகளை பயன்படுத்திய கருணாநிதி அதன் விளைவால் தன் முதல்வர் பதவியை இழந்தார்.

எம் மக்களுக்கு விடிவை தரக்கூடிய எல்லாம் முயற்சிகளும் எதிரியுடன் கைகோர்த்த எம்மவராலேயே முடிவிற்கு வந்தது. இனி செய்வதற்கு இப்போதைக்கு ஒன்றுமில்லை, உயிரை தக்கவைத்தால் மீண்டும் முயற்சிக்கலாம் என்ற எண்ணமே மேலோங்கி நின்றது. வெளியேறி செல் அல்லது செத்து மடி எனும் சூழ்நிலையில் தான் அன்று நாபா, முதல்வர் உட்பட அனைவரும் நாட்டை விட்டு வெளியேறினர். வீம்புக்கு சாவதால் யாருக்கு பலன் என்பதை இன்று நந்திக்கடல் முடிவு நிரூபித்து நிற்கிறது.

(முற்றும்)

(ராம்)

அமைதி சமாதானம் ஜனநாயகம்

www.sooddram.com