வளமிக்க மண்ணை மங்க வைக்கும் பிளாஸ்டிக் பொருட்களின் பாவனை

(ஆர்.ஜி. ஜெகதீஷ் )

மனிதர்களாகிய நாம் தினம் சுவாசிக்கும் காற்றை யாராவது தடைசெய்தால், நம்முடைய நிலைமை என்னவாகும்? நம் உடலின் ஒவ்வொரு முக்கிய உறுப்புகளும் செயலிழந்து கடைசியாக நம்மால் இறுதி மூச்சுக்கூட விட முடியாமல் பரிதாபமாக மாய்ந்து போவாம். மனிதன் சுவாசிப்பதற்குத் தேவை யான பிராண வாயு காடுகளில் உள்ள மரங்களில் இருந்துதான் கிடைக்கிறது. ஆனால், அத்தகைய முக்கியத்துவம் வாய்ந்த காடுகளின் இப்போதுள்ள நிலைமை வருத்தமளிக்கும் நிலையில் இருக்கின்றது. மனிதனின் நுரையீரலைப் பிளாஸ் டிக் பையால் அடைத்தால் எப்படிச் சுவாசிக்க முடியாதோ அதே மனிதனால் காடுகளில் வீசப்படும் பிளாஸ்டிக்கால் மரங்கள் பெரிதும் பாதிப்புக்கு உள்ளாகியுள்ளன.

முக்கியமாக மனிதர்களால் வீசப் படும் பிளாஸ்டிக் பொருள்களால் மேற்குத் தொடர்ச்சி காடுகள் கடுமை யான சுற்றுச்சூழல் பாதிப்புகளைச் சந்தித்து வருகின்றன. உலகிலேயே மேற்குத் தொடர்ச்சி மலைக் காடுகளில்தான் ஒவ்வொரு நூறடி தொலைவிலும் நூற்றுக் கணக்கான தாவரங்களும், ஆயிரக்கணக்கான பூச்சிகளும் உள்ளன.

அதேபோல் பறவை இனங்களும் மிகுந்து காணப்படும். மேற்குத் தொடர்ச்சி மலைகளில் விலங்குகளுக் கும் பஞ்சமில்லை. இப்படிப்பட்ட அடர்காடுகளைப் புற்றுநோயைப் போல கொஞ்சம் கொஞ்சமாக அரித்து வருகின்றன பிளாஸ்டிக் பைகள்.

காட்டுப் பகுதிக்குச் சுற்றுலா செல்பவர்கள் அந்தக் காட்டிற்கான மரியாதையைத் தருவதில்லை. அந்தப் பிளாஸ்டிக்குகள் வனத்திற்கும் வன உயிரினங்களுக்கும் அச்சுறுத்தலாக உள்ளன. ஆனால், இவை அனைத்தும் இன்னும் சில ஆண்டுகளில் மனிதனின் வாழ்வாதாரமே கேள்விக்குரியாகும் நிலையை உண்டாக்கும்.

பிளாஸ்டிக் கழிவுகள், அணு ஆயுதங் களைவிட ஆபத்தானது என அண்மை யில் இந்திய உயர் நீதிமன்றம் கருத்துத் தெரிவித்திருந்தது.

அதேபோல வனப் பகுதிகளில் வனத்துறையினர் வெளியிட்டுள்ள அறிவிப்புப் பலகை மிகவும் யோசிக்க வைக்கிறது. அதாவது, ‘குரங்குகளுக் குத் தேவையான உணவுகள் வனத்தில் கிடைக்கின்றன. சுற்றுலாவுக்கு வரும் மக்கள் தங்களுடைய தின்பண்டங்களைக் கொடுத்து குரங்குகளின் உணவுப் பழக்கத்தை மாற்றாதீர்கள் என்று குறிப்பிட்டுள்ளனர்.

குரங்குகளின் உணவுப் பழக்கத்தையும் மனிதர்கள் நாம் மாற்றி, அவற்றின் வாழ்க்கை முறைகளையும் மாற்றி வருகிறோம். இதுவும் வனத்தின் பாதுகாப்புக்கு ஒரு விதத்திலான அச்சுறுத்தலேயாகும்.

ஒரு மரம் தன் வாழ்நாளெல்லாம் வெளியிடும் ஒட்சிசனின் மதிப்பு பதினைந்து இலட்சம் ரூபாய்க்கும் மேலானது எனக் கணக்கிடப்பட்டுள்ளது. கோவையிலுள்ள சாடிவயல் வனப் பகுதி உலகிலுள்ள அரிய உயிர்ச் சூழல் வளமை மிக்க பகுதியாகக் கருதக்கப்படுகிறது.

காடுகளை நாம் பெருமளவு அழிப்பதால் பூமி தொடர்ந்து வெப்பமயமாகிறது. மரங்களை வெட்டுவதால் காடுகள் அழிவது ஒருபக்கம் இருந்தாலும் இதுபோன்ற பிளாஸ்டிக் பொருள்களைக் காட்டின் வளம் மிக்க மண்களை மங்க வைக்கின்றது. இவையெல்லாம் நாமாக உணர்ந்து செயல்படாதவரை இவற்றை தடுக்க முடியாமலே போய்விடும்.