முள்ளிவாய்காலும், தமிழ்மக்களும், தமிழ்தேசிய கூட்டமைப்பும்

(எழில்நேசன்)

 சுமார் முப்பது வருட ஆயுதப்போராட்டம் முள்ளிவாய்காலில்  முடிவடைந்து விட்டது. தமிழ் மக்களின் உரிமைகளை வென்றெடுப்பதற்கான ஆயுதப் போராட்டத்தை தொடர்ந்து முன்னெடுத்த புலிகள் இயக்கத்தை இலங்கை அரசாங்கமும், இந்தியா உட்பட பல வல்லரசுகளும் தடை செய்துள்ளன. முள்ளிவாய்க்காலில் இறந்தவர்கள் அல்லது அழிக்கப்பட்டவர்கள் தமிழ் மக்களைப்  பொறுத்த வரையில் இரத்த உறவுகள் என்பது உண்மை. இலங்கை அரசின் நிலையில் முள்ளிவாய்க்காலில் இறந்தவர்கள் தடைசெய்யப்பட்ட புலிகள், உலகநாடுகளைப் பொறுத்தவரையில் பயங்கரவாத பட்டியலில் தடைசெய்யப்பட்ட  அமைப்பினர் என்பதும் உண்மையே.

எனவே நாம் மீண்டும் மீண்டும்  எம்மை நாமே ஏமாற்றாமல்  யாதார்த்தமாக சிந்தித்து சாத்தியமான வழியில் செல்வதன் மூலம் இனி வருங்காலத்திலாவது உயிரிழந்த பொதுமக்களை நினைவு கூர முடியும். மக்களை நினைவு கூர எமக்கு உரிமையுண்டு நாம் அதற்காகப் போராடுவோம் என்று  உணர்ச்சிததும்ப அடுக்கு மொழியில் ஆவோசமாகப் பேசி எம் இளைஞர்களை துண்டிவிடும் செயற்பாடுகளை விட்டு உங்களால் இயலுமா?  வீதியில் இறங்கி ஆர்பாட்டம், சாகும்வரை உண்ணாவிரதம், மறியல் போராட்டம், சத்தியாக்கிரகம், என தொடர்போராட்டங்களை  செய்வீர்களா?  மக்களிற்காக உங்கள் சொத்துகள், சுகங்களை, உயிரை தியாகம் செய்ய முடியுமா? உங்கள் பொய்களும் போலித்தனங்களும் மக்களை நிர்க்கதியாக்கி, கையறு நிலையில் நிறுத்தியிருக்கிறது. இனியும் வேண்டாம் வாய்வீச்சு வீரம். 

எங்கள் பிரதேசத்தில் சாதாரண ஒரு வீடு கட்டுவதற்குக் கூட தென்னிலங்கையிலிருந்தே தொழிலாளர்கள் வருகிறார்கள். ஒன்று எம்மிடம்  தொழில் பயிற்சி உள்ளவர்கள் இல்லை. அடுத்து எம்மவர்கள் கஸ்டப்பட்டு உழைக்கும் பண்பை இழந்து விட்டார்கள். வெளி நாடுகளிலிருந்து வரும் பணத்திலேயே அநேகமானவர்களது வாழ்க்கை தங்கியுள்ளது. மேலும் பாரிய இயந்திர சாதனங்கள் இல்லை, அவற்றை இயக்கும் இயக்குனர்கள் இல்லை. மொத்தத்தில் எம்மவர்களிடம் மூலதனம் இல்லை. பாரிய மூலதனத்தைக் கொண்ட வர்த்தகர்கள் தொழில் வழங்குபவர்கள் இல்லை. நீண்ட யுத்தத்தின் தாக்கங்கள் இவைகள். இதனால் எமது பிரதேசத்தில் தென்னிலங்கைச் சக்கிகள் பாரிய மூதலீடுகளை செய்ய முயற்சிக்கின்றனர் .  எம்மவர்களிடம்  பெருந்தொகை பணத்தை கொடுத்து நிலங்களை கட்டிடங்களை வாங்குகின்றனர், வீடுகளை வாங்குகின்றனர், இதனை நாம் தெரிந்து கொண்டே போலித்தனமான குற்றச்சாட்டுகளை முன்வைக்கிறோம்.

நீண்ட காலம் யுத்தம் நடைபெற்றதால் எமது மக்களின் தேவைகள் பூர்த்தி செய்யப்படவில்லை. செயற்பாடுகள் முடக்கப்பட்டு இருந்தன. இன்று எப்படியோ தமிழ் மக்கள் இயல்பு வாழ்க்கை வாழத்தொடங்கி விட்டனர். வாழ ஆசைப்படுகின்றனர். வாழ்கையை அனுபவிக்க தொடங்கிவிட்டனர். இதுதான் உண்மை. இது யதார்தமானது. இந்த மக்களைப் பார்த்து நாம் துரோகிகள் என்று கூறமுடியாது. ஏனெனில் இந்த மக்கள் நீண்ட காலம் யுத்தத்திற்குள் சிக்கியிருந்த மக்கள்  பொருளாதாரத்தை, கல்வியை உறவுகளை, சொத்துகளை, வீடுவாசல்களை இழந்த மக்கள் ஓரு முடிவிற்கு வந்து விட்டனர். அதனால்தான் வாழ ஆசைப்படுகிறர்கள். அதற்கு அடுத்தபடியாகத்தான் உரிமையைப் பார்கிறார்கள்.

மக்கள் இங்கு ஏற்படுத்தப்பட்டுள்ள போக்குவரத்து வசதிகள், பாடசாலைக் கட்டிடங்கள், வைத்தியசாலைகள், அலுவலகங்கள் என்பனவற்றின் புனர் நிர்மாணம், இராணுவமுகாம்கள் அகற்றப்படல், பிரதேசங்களை கைவிடல் என்பனவும் மீள் குடியேற்றங்கள், வீடமைப்புத் திட்டங்கள் என எல்லாவற்றையும் பார்த்து எதிர்காலத்தில் மிகவும் நம்பிக்கையுடையவர்களாக ஒவ்வொன்றையும் செய்கின்றனர். முன்னர் யுத்தகாலத்தில் படுத்து எழும்புவதற்கு ஏற்ற இடம் ஒன்று இருந்தால் போதும் என்றிருந்த மக்கள் வீட்டை, கட்டிடங்களைக் கட்டுகின்றனர் அவற்றை அழகுபடுத்துகின்றனர். அவர்களின் நம்பிக்கை வீண் போகக் கூடாது.

ஒன்றை நினைவிற் கொள்ள வேண்டும், தமிழ்த் தேசிய கூட்டமைப்பிற்கு மக்கள் அள்ளி வாக்குகளைப் அள்ளிப் போட்டு மாகாணசபையை கைப்பற்றிய நிகழ்வை தவறாகப் புரிந்துகொள்ளக் கூடாது. தமிழீழப் போராட்டத்திற்கான ஆதரவு வழங்கும் மனோநிலையில் மக்கள் திரண்டு வாக்களித்துள்ளார்கள் என்று நினைப்பது தவறு.  இந்த மக்களிடம் நாம் தேர்தல் பிரசாரத்திற்கு சென்ற போது அவர்கள் சொன்னவற்றை இங்கு நினைவுபடுத்துதல் பொருத்தமானதாகும். தமிழ் தேசியம் என்று சொல்லி தேர்தலில் போட்டியிடுபவர்களின் போலித்தனத்தை நாங்கள் அறிவோம். எமது பிரதேசமோ , எமது துன்பதுயரங்களோ தெரியாதவர்கள் அவர்கள். கொழும்பில் அரச அதிகாரத்தில் உள்ளவர்களுடன் நல்ல உறவைப் பேணி சகல வசதிகளையும் பெற்று சுகபோக வாழ்கை வாழுகிறார்கள். அவர்களின் பிள்ளைகளும்  வசதியான நாடுகளில் வசதியான வாழ்கை வாழ்கின்றனர். நாங்கள் இவர்களை நம்பவில்லை. ஆனால் இறந்த எம் பிள்ளைகளுக்காவும், தமிழன் தழிழ்  என்றதற்காகவும் வாக்குகள் எல்லாவற்றையும்  தழிழ் தேசிய கூட்டமைப்பிற்கு போடுகிறோம் என வெளிப்படையாக சொன்னார்கள். 

அண்மையில் முள்ளிவாக்கால் நினைவுநாளும், வொசாக் பண்டிகையும் ஒரே சமயத்தில் வந்தது. யாழ்ப்பாணத்தில் பாதுகாப்பு படையினர் வெகு விமரிசையாக வொசாக்பண்டிகையை கொண்டாடினார்கள். தமிழ், முஸ்லீம் மக்களுக்கு தனிப்பட்ட அழைப்புகளையும்  அனுப்பி இருந்தனர். மக்கள் அந்த அழைப்புகளை ஏற்று கண்துடைப்பிற்கு அல்லாமல் மனைவி பிள்ளைகள் என குடும்பத்தோடு குதூகலமாகச் சென்றனர். தனிப்பட்ட அழைப்புகள் வராத மக்களும் எந்தவித அழுத்தங்களும் மிரட்டல்களும் இல்லாமல் சாரி சாரியாக குவிந்தனர். அவர்களின் தானங்களில் கலந்து கொண்டனர். கண்டு கழித்தனர்.

உதயன் பத்திரிகை உட்பட பல பத்திரிகைகளும் மக்கள் முண்டியடித்து கலந்து கொண்டமையை நக்கலாக செய்திகள் வெளியிட்டு வயிற்றெரிச்சலை கொட்டித் தீர்த்தனர். இங்கு மக்கள் பாதுகாப்பு படையினரை வெறுக்கவில்லை. அவர்களை முற்று முழுதாக எதிரியாகவோ , முற்று முழுதாக தமிழ் மக்களுக்கு கொடுமை புரிந்த படையாகவோ பார்க்கவில்லை.

ஆகவே இங்குள்ள மக்கள் புலத்திலுள்ளவர்களிடம் எதிர் பார்ப்பது, எமது பிரதேசத்தில் பாரியமுதலீடுகளை செய்து தொழிற்சாலைகள், வைத்தியசாலைகள், பயிற்சி நிலையங்களை நிறுவி எமது பிரதேசம் விவசாயம் கால்நடை வளர்ப்பு, மீன்பிடி துறைகளில் தங்கியிருப்பதால்  அவற்றின் மூலமாக கிடைக்கும் உற்பத்தி பொருள்களுக்கு சந்தை வாய்ப்பை ஏற்படுத்தல், பதனிடல் ஏற்றுமதி செய்தல்  என பல்வேறு திட்டங்களை நடைமுறைப் படுத்தக்கூடிய  செயற்பாடுகளில் ஈடுபடும் நிலையையே ஆகும். புலம் பெயர் அமைப்புகள் புலம்பெயர் உறவுகள் போராட்டத்திற்காக வாரி வழங்கியிருக்கிறார்கள். அவர்களின் பங்களிப்பு மறக்க முடியாதது.

இப்பொழுது எமது பிரதேசத்தில் பாரிய மாற்றங்கள். வடக்கு கிழக்கு இணைப்பு இல்லை, வன்னியில் பிரதேசவாதம் தலை தூக்கியுள்ளது, யாழ்ப்பாணம் தனித்து விட்டது.எமது பிரதேசத்தில் பொருளாதாரம்  பெரும் வீழ்சியடைந்துள்ளது. வேலைவாய்பு இல்லை, மூலதனம் இல்லை, தொழில் நுட்பம் இல்லை, தொழிற்பயிற்சி இல்லை. நீண்டகாலம் யுத்தம் நடந்த பூமி, அதனால் எமது இளைஞர்கள் எந்த விதமான தொழில் பயிற்சியும் இல்லாமல், மூலதனம் இல்லாமல்  வேலைவாய்ப்பு அற்ற நிலையில் உள்ளனர். நீங்கள் இங்கிருந்து புலம்பெயர் நாடுகளுக்குச் செல்லும் பொழுது இங்கு இருந்த நிலைமை  அன்றிருந்த மனிதர்கள்; இன்று இங்கு இல்லை.

புலம்பெயர்ந்த மக்களும் தளத்தில் உள்ள எம் தலைவர்கள் போல வல்லரசுகளின் திட்டங்களுக்கும், வேறு சக்திகளுக்கும் சுய நலத்திற்கும் துனைபோகாமல் மக்கள் நலன் சார்ந்த திட்டங்களும், மக்களை உணர்ச்சிகளுக்கு அடிமைப்படுத்தாமல், அறிவுபூர்வமாக சிந்தித்துச் செயற்படுவதற்கான சூழலை உருவாக்கவும் உங்கள் பங்களிப்பு அவசியம்.

இதை தவிர்த்து பொய்க்கு  மக்களின் வாக்குகளை பெற்று பதவிகளை தக்கவைத்துக்கொள்வோம் என்ற நிலைப்பாட்டில்  செயற்படும் தமிழ் தலைவர்களைப் போல புலம் பெயர்ந்த மக்கள் எடுக்கும்  முடிவுகளும், செயல்பாடுகளும் எமது மக்களை மேலும்  மேலும் இடப்பெயரச் செய்வதுடன் எமது பரம்பரை வாழ்விடங்கள் மேலும் மேலும் வெறுமையாகி சிங்கள, முஸ்லீம் மக்களால் நிரவும் நிலை இயல்பாகவே எற்படும். எனவே தமிழ் தலைவர்களும், புலம்பெயர் மக்களும் இங்குள்ள மக்களின் யதார்த்த நிலமையை புரிந்துகொண்டு செயற்பட வேண்டும்