கனடாவின் ஒன்ராறியோ மாகாணத் தேர்தலில் யாருக்கு வாக்களிப்பது சிறந்தது?

கனடாவின் ஒன்ராறியோ மாகாணத்துக்கு இம்மாதம் (யூன் -2014) 12ஆம் திகதி வியாழக்கிழமை தேர்தல் நடைபெறவுள்ளது. கத்லீன் வைன் அம்மையார் (Kathleen Wynne)  தலைமையிலான லிபரல் கட்சியின் (Liberal Party)  சிறுபான்மை அரசாங்கத்துக்கு நிபந்தனையுடன் கூடிய ஆதரவை வழங்கி வந்த அன்றியா கோவாத் (Andrea Howath)  அமை;மையார் தலைமையிலான நியு டெமக்கிறாற்றிக் கட்சி (New Democratic Party) தனது ஆதரவை விலக்கிக் கொண்டதால் (வரவு செலவுத் திட்டத்தை ஆதரிக்க மறுத்ததால்) இந்தத் தேர்தல் நடைபெறுகிறது.

உண்மையில் இது தேவையற்ற, பொதுமக்களின் வரிப்பணத்தை வீணடிக்கும் ஒரு தேர்தலாகும். என்.டி.பி கட்சி அரசியல் சுயநலம், பதவி ஆசை மற்றும் காழ்ப்புணர்ச்சி என்பன காரணமாக ஓரளவுக்கு சாதாரண பொதுமக்களுக்கு நன்மை அளித்த லிபரல் அரசாங்கத்தின் வரவு செலவுத் திட்டத்தை ஆதரிக்க மறுத்து இத்தேர்தலுக்கு வழிவகுத்துள்ளது.

உண்மையில் இத்தேர்தலில் பிரதான போட்டி வைன் அம்மையார் தலைமையிலான லிபரல் கட்சிக்கும், ரிம் குடாக் (Tim Hudak) தலைமையிலான புரொக்கிறேசிவ் கொன்சர்வேர்டிக் (Progressive Conservative) கட்சிக்கும் இடையிலேயே நிலவுகின்றது. இந்த நிலைமையில் யாருக்கு வாக்களிப்பது என்ற குழப்பம் பொதுமக்களுக்கு ஏற்படுவது சகஜம்.

கொன்சர்வேட்டிக் கட்சிதான் மத்தியிலும் பிரதமர் ஸ்ரீபன் கார்பர் தலைமையில் ஆட்சியில் இரு தடவைகளாக இருந்து வருகின்றது. அந்த அரசு இந்ந நாட்டில் புதிதாகக் குடியேறுபவர்களுக்கு எதிராகவும், சாதாரண தொழில் புரியும் மக்களுக்கு எதிராகவும் எடுத்து வரும் நடவடிக்கைகளையும், இயற்றுகின்ற சட்டங்களையும் அனைவரும் அறிவர். மறுபக்கத்தில் பெரும் கோப்பரேட் நிறுவனங்கள், முதலாளிகளுக்குச் சார்பாகவே காபரின் அரசு செயற்படுகின்றது. அதே கொள்கைதான் குடாக் தலைமையிலான ஒன்ராறியோ கொன்சர்வேடிக் கட்சியின் கொள்கையுமாகும்.

அதுதவிர, ஒன்ராறியோ மாகாணத்திலுள்ள ஒரு இலட்சம் அரச ஊழியர்களைப் பணி நீக்கம் செய்துவிட்டு, தனியார் துறையில் அதைவிடக் கூடுதலான வேலை வாய்ப்புகளை உருவாக்கப் போவதாக குடாக் சொல்கிறார். இது பொதுத்துறையை அழித்து முதலாளிகளுக்கு உதவும் திட்டம் என்பது ஒருபுறமிருக்க, நடைமுறையில் சத்தியப்படாத ஒன்றுமாகும். எனவே குடாக் தலைமையிலான கொன்சவேர்டிக் கட்சிக்கு வாக்களிப்பது தற்கொலைக்கு ஒப்பானதாகும்.

இன்னொரு புறத்தில் என்.டி.பி கட்சியை எடுத்துக்கொண்டு பார்த்தால், கடந்த காலங்களில் தொழில் புரியும் மக்களும், தமிழ் மக்கள் உட்பட பல்வேறு வந்தேறு குடிகளும் அக்கட்சிக்கே வாக்களித்து வந்துள்ளனர். ஆனால் அக்கட்சி அரசியல் சந்தர்ப்பவாதம் மற்றும் அரசியல் சுயநலம் காரணமாக தனக்கு வாக்களித்து வந்த மக்களின் எதிர்பார்ப்பைச் சிதறடித்துள்ளது. தனது அரசியல் கொள்கைத் திட்டத்தில் இருந்த 'சோசலிசம்' என்ற சொல்லைக்கூட அது அகற்றியுள்ளது. அதிலிருந்து அது யாருக்குச் சேவை செய்ய விரும்புகின்றது என்பதை விளங்கிக் கொள்ளலாம்.

என்.டி.பியின் தவறான போக்கிற்கு அது ஒன்ராறியோ லிபரல் அரசாங்கத்தைக் கவிழ்த்ததே சான்று. தற்செயலாக இந்தத் தோதலில் வலதுசாரி கொன்சவேர்டிக் கட்சி வெற்றி பெற்று அதனால் ஒன்ராறியோவின் சாதாரண மக்களுக்கு பாதகங்கள் ஏற்பட்டால், அதற்கு என்.டி.பி கட்சிதான் பொறுப்பேற்க வேண்டும்.

எனவே இன்றுள்ள நிலைமையில் இந்த மூன்று கட்சிகளிலும் ஓரளவு முற்போக்கானதும், நடைமுறைச் சாத்தியமானதுமான கொள்கைகளைக் கொண்ட வைன் அம்மையாரின் தலைமையிலான லிபரல் கட்சிக்கு வாக்களிப்பதே பயனுள்ளதும், புத்திசாலித்தனமானதுமாகும். அத்துடன் அடுத்த பொதுத்தேர்தலின் பின்னர் மத்தியிலும் லிபரல் கட்சி அரசாங்கமே அமையக்கூடிய வாய்ப்பிருப்பதால், ஒன்ராறியோ மாகாணத் தேர்தலில் அக்கட்சி பெறுவது கூடுதலான பயனள்ளதாக இருக்கும்.

தமிழர்கள் தமது இனத்தவர்கள் போட்டியிடும் கட்சிக்கு வாக்களிப்பதுதான் சிறந்தது என்ற தவறான கருத்தை விடுத்து, சரியான கொள்கைகளுக்காக வாக்களிக்க வேண்டும். அதுவே கனடாவின் ஜனநாயகத்தைச் சரியாகப் புரிந்து செயல்படும் முறையாகும்.

(மாற்றுச் சிந்தனையாளர் குழாம் - கனடா)