இயற்கை வேளாண்மைக்கான சந்தையை ஒழுங்கு செய்வோம்!

(ம.செந்தமிழன்)

இயற்கை வேளாண் விளை பொருட்களை உற்பத்தி செய்துவிட்டு விற்க இயலாமல் திணறும் விவசாயிகளை நான் சந்தித்துக் கொண்டே இருக்கிறேன். ஒருவிதத்தில் நானும் அவர்களில் ஒருவனே. உண்மையான இயற்கை விளை பொருட்களை வாங்கும் வழி அறியாமல் அலைபாயும் மக்களையும் சந்திக்கிறேன்.  ஒருபுறம் தேவை, மறுபுறம் உற்பத்தி. நல்ல சந்தையின் இலக்கணங்கள் இவை. இவற்றோடு வேறொன்றும் இணைய வேண்டியுள்ளது. நியாயமான ஆதாயம் எனும் நேர்மைதான் அது. இன்றைய இயற்கை வேளாண் விளை பொருள் சந்தை நியாயமான ஆதாயத்தில் இயங்கவில்லை என்பதை யாவரும் அறிவர். இந்த நிலைக்கான காரணங்கள் ஏராளமாக உள்ளன. எல்லா விற்பனையாளர்களும் வேண்டுமென்றே விலை ஏற்றுவதில்லை. வாடகை, வட்டி, சரக்குக் கையாளுகைச் செலவு, பராமரிப்புச் செலவு உள்ளிட்ட பல காரணிகள் விலை ஏற்றத்தை உருவாக்கியுள்ளன. ஆனாலும், இந்தக் காரணங்களை இப்படியே நியாயப்படுத்திக் கொண்டிருந்தால், இந்த உன்னதமான பணியில் பெரும் நிறுவனங்களின் அதிரடி வருகையைத் தவிர்க்க இயலாமல் போகும்.

இங்கே இயங்குவது வணிகக் கொள்ளைகளின் பிதாமகன் ஆடம் ஸ்மித் எனும் ஐரோப்பிய தத்துவாசிரியரின் கொள்கையின் அடிப்படையில் உருவாக்கப்பட்ட சந்தைதான். இதைத்தான் எனக்கும் கல்லூரியில் கற்பித்தார்கள். நீங்களும் படித்திருப்பீர்கள். demand and supply எனும் ’தேவை - அளிப்பு’ விதிதான் சந்தையைத் தீர்மானிக்கிறது. இதில் ‘அறம்’ எனும் Ethical அணுகுமுறை அறவே இருக்காது.

இயற்கை வேளாண்மை செய்வது புனிதமானதுதான். அந்தப் பொருட்களை அறச் சிந்தனையின் அடிப்படையில் மக்களிடம் கொண்டு சேர்ப்பது அப் புனிதப் பணியின் அடித்தளம்.

இதைச் சேவையாக மட்டுமே கருதி, தம் பொருளாதாரத்தை இழந்து கொண்டுள்ள இயற்கை அங்காடிகள் பெருகிக் கொண்டுள்ளன. இப் பணியை வணிகமாக மட்டுமே கருதி கொள்ளை அடிக்கும் அங்காடிகளும் குறைந்த எண்ணிக்கையில் உள்ளன.

விவசாயிகளுக்கும் ஆதாயம் கிட்டாமல், மக்களுக்கும் நல்ல விலையில் பொருள் கிடைக்காமல் இயற்கை வேளாண் பொருளாதாரம், ஆடம் ஸ்மித்தின் வாரிசுகளை எதிர் நோக்கி தவம் கிடக்கிறது.

ஐயா நம்மாழ்வாரும், பிற இயற்கையியல் வல்லுனர்களும் கடமை ஆற்றியது இந்த நிலையை உருவாக்க அல்லவே.

நிலையான இயற்கை வேளாண் சந்தையை உருவாக்குவது எளிய செயல் அல்ல என்பதை என் அனுபவங்கள் உணர்த்துகின்றன. அதனால் என்ன? வாழ்க்கையில் எளிய வேலைகளை மட்டுமே செய்து கொண்டிருக்க முடியுமா?

ஒரு புதிய வழித் தடத்தை உருவாக்கியே ஆக வேண்டும். ஒரு புதிய களத்தை அமைத்தே தீர வேண்டும். எல்லாக் கதவுகளும் மூடப்பட்டால், அவற்றை உடைக்க வேண்டுமே தவிர, தட்டிக் கொண்டே நிற்பது அறிவீனம்.

செம்மை வனத்தில் வரும் 21 ஆம் நாள் (21/06/14ம்- சனிக் கிழமை) வேளாண் வாழ்வியல் பயிற்சி நடக்கிறது. அதே நிகழ்வில் ‘நிலையான இயற்கை வேளாண் சந்தை’ உருவாக்கும் பணியின் செயல் திட்டங்களை வகுக்க இருக்கிறோம். இயற்கை வேளாண்மை செய்வோர், விற்பனை ஆர்வம் கொண்டோர் பங்கேற்கலாம்.

தொடர்புகொள்ள:
திரு. கோ பாவணக்குமார், 99655 78583