தோழர் றொபேட் குறுகிய எல்லைகளை கடந்து மக்களை நேசித்தவர் தோழர் றொபேட் (தம்பிராஜா சுபத்திரன்) 11வது ஆண்டு நினைவாக 14.06.2014

தனது இளமைக்காலத்திலேயே தமிழ் சமூகத்தில் நிலவுகின்ற ஒடுக்குமுறைகள், அநீதிகள், பாரபட்சங்கள் குறித்தும் பொருளாதார ரீதியான ஏற்றத்தாழ்வுகள் பற்றியும் பகுத்தறிவுக்கு ஒவ்வாத மூடப் பழக்க வழக்கங்கள் தொடர்பாகவும் தோழர் றொபேட் தனது நண்பர்களோடு சேர்ந்து சிந்திக்கவும், செயற்படவும் தலைப்பட்டார். எல்லாகாலங்களிலும் விடலைபருவத்தினரிடையே காணப்படும் குறும்புகள், குசும்புகளுக்காக தோழர் றொபேட்டும் அவரது நண்பர்களும்  ஊரிலுள்ள பெரியவர்களால கடிந்துகொள்ளப்பட்ட காலங்களும் உண்டு. ஆனாலும், அவர்கள் காட்டிய சமூக அக்கறை, கருணை அவர்களுக்கு சமூகத்தில் நன்மதிப்பையும் பெற்றுக்கொடுத்தது. தனது நண்பர்களில் மிகவும் இள வயதினரான தோழர் றொபேட் அரசியல் ஈடுபாட்டில், சமூக அக்கறையில் மற்ற எல்லோரையும் விடவும் முதிர்ச்சி உடையவராக அவர்களுக்கு வழிகாட்டியாக ஆகியிருந்தார்.
1980 – 81 காலப்பகுதியில் ஆயுதப் போராட்ட இயக்கங்களின் தோற்றமும், அந்த இயக்கங்கள் இளைஞர்களை அணிதிரட்டும் பணிகளும் வேகம் எடுத்திருந்தன. இந்த காலத்தில் தோழர் ரொபேட்டுக்கு ரெலோ ஈ.பி.ஆர்.எல்.எவ் ஆகிய இயக்கங்களின் தொடர்பும், அவர்களின் அரசியல் வகுப்புக்களில் பங்குபற்றும் வாய்ப்பும் கிட்டியிருந்தது. மாக்ஸிய, லெனினிய தத்துவத்தை வழிகாட்டும் கோட்பாடாக கொண்டிருந்தமை, பொருளாதார ரீதியான ஏற்றத்தாழ்வுகள், சமூகத்தில் நிலவிய பாரபட்சங்களை இல்லாதொழித்து சமூகமாற்றத்தை வலியுறுத்தும் கருத்துக்கள். தமிழர்கள் இன ரீதியாக முகங்கொடுத்து வந்த ஒடுக்குமுறைகளுக்கு எதிராக போராடும் அதேவேளை வர்க்கரீதியான விடுதலையையும் சாத்தியமாக்கும் பாட்டாளி வர்க்கத் தலைமையை கட்டியெழுப்புதல் போன்றவற்றில் அக்கறையை வெளிப்படுத்திய ஈபிஆர்எல்எவ் இன் கருத்துக்கள் அவரை ஈர்த்திருந்தன.
தலைமறைவு இயக்கம் ஒன்றின் தேவைகளை புரிந்துகொண்டு ஆரவாரமின்றி அவர் செயற்பட்ட விதம், கருத்து ரீதியான தெளிவும், பிடிப்பும், தலைமறைவு இயக்கம் ஒன்றின் இரகசியம் பேணல், பாதுகாப்பு என்பவற்றில் காட்டிய கரிசனை, வேலைதிட்டங்களை நிறைவேற்றுவதில் வெளிப்படுத்திய ஆற்றல் அவரை தலைமை ஸ்தானத்திற்கு உயர்த்தியது.
தோழர் றொபேட் கட்சியின்  எந்தப் பணியையும் மனமுவந்து ஏற்றுக்கொண்டு, அந்தப் பணியை இதர தோழர்களையும் இணைத்துக்கொண்டு திறம்பட செய்து முடிப்பதில் வல்லவராயிருந்தார். கட்சியில் கடினமான பணிகளை பிறரிடம் சுமத்திவிட்டு லேசான பணிகளை தனக்கு எடுத்துக்கொள்ளும் குணாம்சமும் தோழர் றெபேட்டிடம் இருக்கவில்லை. அவர் சகதோழர்களோடு இன்பத்திலும், துன்பத்திலும் நெருக்கடிகள் மத்தியிலும் சேர்ந்திருந்து பணிகளை மேற்கொள்வார். தோழர்கள் கட்சி பணிகளில் அர்ப்பணிப்போடு செயற்பட வேண்டும என்பதை வலியுறுத்திய அதேவேளை சக தோழர்களின் தனிப்பட்ட பிரச்சினைகளிலும் உண்மையான அக்கறை செலுத்தினார்.
தோழர்களின் ஆற்றல்களை கணிப்பிடுவதில் அவர் வல்லமை மிக்கவராயிருந்தார் யாரிடம் எந்த வேலையை ஒப்படைப்பது என்பதை கணிப்பிட்டு ஒப்படைத்ததன் மூலம் கட்சி நன்மையடைந்தது. ஸ்தாபனத்தின் வளர்ச்சிக்கு அவசியம் என கருதப்படும் பொருத்தமானவர்களிடம் வேலைகளை வழங்குவதையும், அவ்வாறு வழங்கப்பட்ட வேலைகளை செயற்படுத்தப்பட்டிருப்பது குறித்து கண்காணிப்பதையும் நடைமுறையாகக் கொண்டிருந்தார். இதனால் சக தோழர்களின் உழைப்பை ஸ்தாபனத்திற்குப் பலம் சேர்ப்பதற்கும், மக்களின் நம்பிக்கையை பெறுவதற்கும் பயன்படுத்திக்கொண்டார். வாய்வீச்சுக்காரர்களின் குணாம்சத்தை புரிந்துகொண்டு நெருங்கிச் செயற்பட்டார். எனவே, அவர்களது வாய்சவடால்களுக்கு அவர் ஒருபோதும் பலியாகவில்லை. ஒவ்வொரு தோழர்களின் தனிப்பட்ட வாழ்விலும் அவர் அக்கறை கொண்டிருந்தார் ஆனால், எப்போதும் கட்சியின் நலனை, மக்களின் நலனையே முதலிடத்தில் வைத்தார். கட்சியின் நிதி தேவைகளை பூர்த்தி செய்வதற்கான பொருளாதார திட்டங்களுக்கே முன்னுரிமை அளித்தார். தோழர்களின் கூட்டு உழைப்பை மூலதனமாக வைத்து சாதித்தும் காட்டினார்.

அவர் ஈ.பி.ஆர்.எல்.எவ் இன் இராணுவ பிரிவான மக்கள் விடுதலைப் படையில் பொறுப்பான பதவிகளை வகித்திருக்கிறார். காத்திரமான பங்களிப்பை வழங்கியிருக்கிறார். கட்சியின் மத்திய குழு, அரசியல் பீடம் என்பவற்றில் நீண்டகாலம் அங்கத்துவம் பெற்றிருக்கிறார். அவரால் இயக்கத்திற்கு இணைத்துக்கொள்ளப்பட்டவர்கள், ஆயுதப்பயிற்சிக்கு அனுப்பப்பட்டவர்களின் தலைமையின் கீழ், பின்னர் செயற்பட நேர்ந்தபோதும் அவர் அதையிட்டு சஞ்சலம் அடையவில்லை. கட்சியின் எல்லா முடிவுகளையும் மனமுவந்து ஏற்று செயற்பட்டார். ஒருபோதும், கட்சிக்குள் சக தலைவர்களை அவர் போட்டியாகக் கருதியதில்லை மாறாக தனது ஆளுமையின் மூலம் எல்லோரின் கவனத்தையும் கவர்ந்தார். நன்மதிப்பை பெற்றார்.
அவர் எனது ஊர், எனது பிரதேசம், எனது இனம் என்ற குறுகிய எல்லைகளை கடந்து நின்றே கடமையாற்றினார். அவரிடம் எந்தக்காலத்திலும் பிரதேச வாதம் குடிகொண்டதில்லை. அவருக்கு கீழ் கட்சிப்பணியாற்றிய தோழர்களிடமும் அவர், அத்தகைய பிற்போக்குத்தனங்கள் அண்டவிடவில்லை. பொருளாதார நெருக்கடிகள் மத்தியில் ஏனைய பிராந்தியங்களுக்கே முன்னுரிமையளித்தார். அவர் படையினரால் கைது செய்யப்பட்டு சிறையில் அடைக்கப்பட்டிருந்த போது சக இயக்கப் போராளிகள் அனைவரோடும் இணைந்து கைதிகளின் நலன்களுக்காகச் செயற்பட்டார்.
யாழ் மாநகர சபை உறுப்பினராக சுமார் 5 வருடங்கள் செயற்பட்ட தோழர் றொபேட் அங்கு ஆளும் கட்சியாயிருந்த தமிழர் விடுதலைக் கூட்டணியினருடனும், மாநகரசபையில் பிரதிநிதித்துவம் வகித்த ஈ.பி.டி.பி., புளொட் ஆகிய கட்சிகளை சேர்ந்தவர்களுடனும், அதிகாரிகளுடனும் ஒத்துழைத்து மக்கள் நலன் சார்ந்து செயற்பட்டார்.
இன்று உள்ளுராட்சி சபைகளில் ஆளுங்கட்சியான தமிழ் தேசிய கூட்டமைப்பு பெரும்பான்மைப் பலம் பெற்றிருப்பினும் ஆழும் கட்சி உறுப்பினர்களுக்குள்ளேயே தலைதூக்கியுள்ள உட் பூசல்களும், குரோதங்களும், குழறுபடிகளும் உள்ளுராட்சி மன்றங்கள் பல மக்களுக்கு கிரமமாக சேவைகளை வழங்க முடியாத நிலையில் முடங்கிப்போயிருப்பதை காண்கிறோம்.
தோழர் றொபேட் யாழ் மாநகரசபை உறுப்பினராயிருந்த போது ஆளுங்கட்சியான தமிழர் விடுதலைக் கூட்டணி 9 ஆசனங்களை மட்டும் கொண்டிருந்தது. எதிர்க்கட்சி வரிசையில் ஈபிடிபி, புளொட், ஈபிஆர்எல்எவ் ஆகிய கட்சிகள் 14 ஆசனங்களை கொண்டிருந்தன.  சபையின் பதவிக் காலத்தில் சரோஜினி யோகேஸ்வரன், பொன்னுத்துரை சிவபாலன், நடராஜா ரவிராஜ், செல்லன் கந்தையா ஆகிய நான்கு மேயர்கள் பதவி வகித்தார்கள், உள்ளுராட்சி மன்றங்களை செயலிழக்கச் செய்யும் நோக்கில் இரண்டு மேயர்கள் புலிகளால் படுகொலை செய்யப்பட்டு பலத்த அச்சுறுத்தல் நிலவியபோதும் எந்த விதத்திலும் மாநகர சபையின் நடவடிக்கைகள் பாதிக்கப்படாமல் தொடர்ந்து செயற்பட்டதை அனைவரும் அறிவர். காலஞ்சென்ற ரவிராஜ், முன்னாள் மேயர் செல்லன் கந்தையன், முன்னாள் மாநகரசபை உறுப்பினர் தங்கமுகுந்தன் மற்றும் உறுப்பினர்கள், அதிகாரிகள் என பலர் இந்த சபையில் தோழர் றொபேட்டின் பங்களிப்பை பல சந்தர்ப்பங்களில் நினைவுகூர்ந்ததை காணமுடிந்தது.
துரோகிகள் என்று முத்திரை குத்தப்பட்டு புலிகளால் கொல்லப்பட்ட உன்னத தலைவர்கள், போராளிகளின் மறுபக்கம் எமது சமூகத்தின் கண்களுக்கு மறைக்கப்பட்டுவிட்டது. புலிகளால் படுகொலை செய்யப்பட்ட அனைவருமே துரோகிகள் என தமிழ் சமூகம் கற்பிதம் செய்துகொண்டது. இது படுகொலைகள் மேலும் அதிகரிக்க வழிவகுத்தது. சமூக அக்கறையும் ஆற்றலும் உள்ள தமிழ் மக்களின் சுபிட்சமான எதிர்காலத்திற்காகத் தம்மை அர்ப்பணித்த பலரை அழித்தொழித்து அந்த வெற்றிடத்தை பச்சை அயோக்கியர்களை கொண்டு இட்டுநிரப்பி புலிகள் இழைத்த பெருந்தவறும், அதனை கண்டும் காணமலிருந்த தமிழ் சமூகமுமே இன்று தமிழ் மக்களின் அவல நிலைக்கு காரணகர்த்தாக்களாவர்.
தோழர் றொபேட் நெருக்கடியான காலகட்டங்களில் ஒதுங்கிநின்று, சுமுகநிலை உருவானபோது அரசியலில் முன்னரங்கிற்கு வந்த ஒருவர் அல்ல. தோழர் றொபேட் 24.12.1957 இல் பிறந்தவர். இந்த மண்ணில் 46 வருடங்கள் மட்டுமே வாழ்ந்த அவர் 2003 யூன் 14 அன்று புலிகளால் படுகொலை செய்யப்படும் வரை ஏறத்தாழ 22 ஆண்டுகள் தொடர்ச்சியாக தமிழ் மக்களின் அரசியல் உரிமைகளை வென்றெடுப்பதற்காக, மனித சமூகத்தின் சுபிட்சமான எதிர்காலத்திற்காக அர்ப்பணிப்போடு, அயராது உழைத்தவர். அவரது சிந்தனைகளை உள்வாங்கி, அவரது நடைமுறைகளை பின்பற்றி அவர் எந்த இலட்சியத்திற்காக உண்மையாகவும், உறுதியாகவும் கட்சியின் நலனையும், மக்களின் நலனையும் மனங்கொண்டு செயற்பட்டாரோ அந்த இலட்சியத்திற்காக அவரது வழியில் செயற்படுவதே அவரை நேசிப்பவர்களின் கடமையாகும். அவருக்கு செய்யும் அர்த்தமுள்ள அஞ்சலியாகும்.

(மோகன்.)