அவர் துறவு பூண்டது குறித்த அந்த "நான்கு தரிசனங்கள்" எனும் பவுத்த நம்பிக்கையை விரிந்த ஆய்வுகளின் அடிப்படையில் கட்டவிழ்க்கும் அண்ணல் அம்பேத்கர் உலகின் அந்த ஆகப் புகழ் பெற்ற துறவிற்குப் பின்புலமாக இருந்த சம்பவத்தை இப்படி உரைப்பார்: ரோகிணி ஆற்று நீரைப் பகிர்ந்து கொள்வதில் கோலியர் மற்றும் சாக்கிய இனக் குழுக்களிடையே நீண்ட நாள் பகை. அப்போதைக்கப்போது பிரச்சினை மேலுக்கு வரும். புத்தருடைய காலத்திலும் பிரச்சினை கடுமையாக வெளிப்பட்டது. இரு தரப்பிலும் உணர்ச்சிப் பெரு வெள்ளம்.

முடிவெடுப்பதற்காக சாக்கிய இனக்குழுப் பேரவை கூடியது. கோலியர்கள் மீது படை எடுக்க வேண்டுமென எல்லோரும் உணர்ச்சிப் பெருக்குடன் உரையாற்றினர். புத்தர் போர் வேண்டாம். பேசித் தீர்ப்பதே சரியான வழி என எவ்வளோவோ
மன்றாடிப் பார்த்தார். கேட்பார் இல்லை. வாக்கெடுப்பில் போர் தொடுப்பது என முடிவாயிற்று.
இனக்குழு மரபுப் படி பேரவை முடிவை ஏற்காதவர்களுக்கு மரண தண்டனை வழங்கப் படும். மரண தண்டனையிலிருந்து தப்புவதற்கு ஒரு வழி உண்டு. அனைத்து இனக்குழு உரிமைகளையும் சுற்றத்தையும் துறந்து வெளியேறுவதே அது.

புத்தர் துறவு மேற்கொண்ட வரலாறு இதுவே. அத்த கண்ட சுத்தத்தில் புத்தர் உரைப்பார்:
” 1. ஆயுதம் தாங்குவது பயங்கரமாகத் தோன்றியது.இந்த மக்கள் எப்படிச் சண்டை இடுகிறார்கள் பாருங்கள்.
2. குறைவான நீரில் மீன்கள் துடிப்பது போல ஒருவரை ஒருவர் பகைத்துத் துடிக்கும் மக்களைக் கண்டு என் உள்ளத்தில் அச்சம் விளைந்தது.
3. நான்கு பக்கங்களிலும் உலகம் சாரமற்றதாகியது. திக்குகள் நடுங்கின. புகலுக்குரிய இடமே தென்படவில்லை. மக்கள் கடைசி வரை பகை கொண்டு திரிவதைக் கண்டேன். எனக்கு வைராக்கியம் உண்டாயிற்று”

இலங்கையிலும், மியான்மரிலும் புத்த பிக்குகள் அதத கண்ட சுத்தத்தை புத்த வாக்குகளின் தொகுப்புகளிலிருந்து அழித்து விட்டார்களா? இல்லை ரோஹிங்யா முஸ்லிம்கள் இரண்டு குழந்தைகள் மேல் பெறக்கூடாது, அதுவும் 36 மாத இடைவெளிக்குப் பின்னேதான் பெற்றுக் கொள்ள வேண்டும் என்றெல்லாம் தடை விதித்துள்ளார்களே அப்படி அத்தகண்ட சுத்தத்தை யாரும் உச்சரிக்கக் கூடாது என மியான்மரிலும் இலங்கையிலும் தடை விதிக்கப்பட்டுள்ளதா?

ரோஹிங்யா முஸ்லிம்கள் மியான்மரின் வடக்கே, வங்க தேசத்தை ஒட்டியுள்ள உள்ள ராகின் மாநிலத்தில் வசிக்கின்றனர். அந்த மாநிலத்தில் அவர்கள் 60 சதம். ஆனால் இப்போது இந்தத் தாக்குதல்களுக்குப் பின் அது 30 சதமாகக் குறைந்துள்ளது.
பெரும்பாலும் ஏழ்மை நிலையில் உள்ள இவர்கள் பர்மியப் பொருளாதாரத்தைக் கட்டுப் படுத்துபவர்களாக இனவாதிகளால் பிரச்சாரம் செய்யப்படுகின்றனர். அப்பட்டமான பொய். கட்டுமானப் பணியில் உள்ள மிகச் சிறிய எண்ணிக்கையில் உள்ளவர்களைத் தவிர பிற ரோஹிங்கியாக்கள் தொழிலாளிகள், சிறு கடைக்காரர்கள் அவ்வளவுதான்.."
"அவர்கள் கடைகளில் பொருட்களை வாங்காதீர்கள். நீங்கள் வாங்கும் பொருட்களால் அவர்கள் லாபம் அடைகிறார்கள். வசதியாகிறார்கள். பர்மிய பவுத்தப் பெண்களைக் கவர்கிறார்கள். பின் அவர்களை முஸ்லிம் மதத்திற்கு மாற்றுகிறார்கள்.." -
"இவர்கள் ஏராளமாகப் பிள்ளை பெறுகிறார்கள். இனத்தைப் பெருக்கிறார்கள். விரிவாக்க நோக்குடன் செயல்படுகிறார்கள்..."
இப்படிச் செல்கிறது இனவாதிகளின் பிரச்சாரம்.
இவை எங்கேயோ கேட்ட குரல்கள் போல் இல்லை?
ஆம். கேட்ட குரல்தான். மக்களைப் பிளவுபடுத்தி, இரத்த ஆறு பெருகச் செய்து அதிகாரச் சுகங்காணும் இயக்கங்கள் உலகின் எல்லாப் பகுதிகளிலும் இதைத்தான் செய்கின்றன. எனவே இது நாம் பல இடங்களிலும் கேட்ட குரல்தான். இந்தியாவில் நாம் தினந்தோறும் கேட்டுக் கொண்டிருக்கும் குரல்தான்.
மியான்மரில் இந்தக் குரலை உரத்து ஒலிப்பது பிக்கு அஷின் விராத்து என்பவரால் உருவாக்கப்பட்டுள்ள "969" எனும் இயக்கந்தான். விராத்து 2003 ல் கைது செய்யப்பட்டு சிறையில் அடைக்கப்பட்டார். 2012ல் தான் செய்ன் அரசு அளித்த பொது மன்னிப்பின் கீழ் அவர் விடுதலை ஆனபின் மீண்டும் அங்கு பெரிய அளவில் முஸ்லிம்களின் மீது வன்முறைகள் ஏவப்பட்டன. உள்நாட்டுக்குள்ளும், வெளிநாடுகளுக்கு ஓடியும் அகதிகளாக்கப் பட்டுள்ளனர்.
இன்று உள்நாட்டில் உள்ள அகதிகள் முகாம்களில் 1,40,000 ரோஹிங்யாக்கள். கடந்த 25 ஆண்டுகளில் வங்க தேசத்தில் தஞ்சம் புகுந்தோர் சுமார் 5,00.000. தாய்லாந்து, மலேசியா, பாகிஸ்தான், இந்தியா முதலான நாடுகளில் 3,00,000ம் மேற்பட்டோர் அகதிகளாய்.

அமைதி சமாதானம் ஜனநாயகம்

www.sooddram.com