சட்ட நுணுக்கங்களின்படி, விளம்பரப்படங்களில் நடிக்கிற கலைஞர்கள் அந்தப் பொருள்கள் தீங்கானவை என்று கண்டுபிடிக்கப்படுகிறபோது, அதன் தயாரிப்பு நிறுவனத்தைப் போல தண்டனை நடவடிக்கைக்கு உரியவர்கள் அல்லதான். அவர்கள் தங்களுக்கான சம்பளத்தொகை, விளம்பர ஒப்பந்தக் காலம் போன்றவற்றைத்தான் கவனிக்கிறார்கள், அதன் அடிப்படையில் ஒப்பந்தத்தில் கையெழுத்திடுகிறார்கள். பொருளின் தரம் என்ன என்று சோதனை நடத்திவிட்டுத் தெரிந்துகொண்டு கையெழுத்திடுவதில்லை. அது குளிர்பானமாக இருந்தாலும் சரி, நூடுல்ஸ்சாக இருந்தாலும் சரி. அதற்காக அவர்கள் கைது செய்யப்பட வேண்டும் என்றால், அவற்றை விளம்பரம் செய்த நிறுவனங்கள், விளம்பரங்களை வடிவமைத்தவர்கள், ஒளிபரப்பிய தொலைக்காட்சிகள், வெளியிட்ட பத்திரிகைகள், உள்ளூர் வியாபாரிகள் மீது கூட நடவடிக்கை எடுக்க வேண்டும் என்பார்களா?

இன்று உலகமே கார்ப்பரேட்டுகள் பிடியில்தான் இருக்கிறது. உலகச் சந்தையும் பொருளாதாரமும் மட்டுமல்ல, பண்பாடுகளும் கூட கார்ப்பரேட் ஆதிக்கத்திற்கு உட்படுத்தப்பட்டுள்ளன. அதன் ஒரு பகுதியாகக் கலைஞர்களும் கார்ப்பரேட்டுகளால் இயக்கப்படுகிறார்கள். திரைப்பட நட்சத்திரங்கள் மட்டுமல்ல, கிரிக்கெட் நட்சத்திரங்களும் கூட.

பல பெரிய நட்சத்திரங்கள் தாங்களே தனிமனித கார்ப்பரேட்டுகளாக இருக்கிறார்கள். தமிழகத்தில் ஒரு பெரிய திரைப்பட நடிகர் தனது படங்களை யாரும் பயன்படுத்தக்கூடாது, தன்னை யாரும் மிமிக்ரி செய்யக்கூடாது என்றெல்லாம் வக்கீல் நோட்டீஸ் விளம்பரம் கொடுத்தார். ஆக, இன்றைய கார்ப்பரேட் சுரண்டல் அமைப்பின் அங்கமாக இப்படிப்பட்ட நட்சத்திரங்களும் தெரிந்தோ தெரியாமலோ பங்களிக்கிறார்கள். அப்படி இருப்பதற்கு அவர்களுக்கு உரிமை இருக்கிறது.

ஆனால், கலை இலக்கியவாதிகளுக்கு உள்ள சமூகப் பொறுப்பை சுட்டிக்காட்ட விரும்புகிறேன். மக்களை மகிழ்விப்பதோடு, அரசியல், சமுதாய அக்கறை உள்ள செய்திகளைச் சொல்லி வந்திருக்கிற மகத்தான பாரம்பரியம் இங்கு உண்டு. விஸ்வநாததாஸ் ஜானகியம்மாள் போன்ற நாடகக் கலைஞர்கள் மேடையில் விடுதலைப்போராட்டக் கருத்துகளைக்கொண்டுசென்றார்கள். திரையுலகில் எம்.ஆர். ராதா ஒரு வில்லன் நடிகர் என்ற போதிலும் அவருடைய பகுத்தறிவுக் கருத்துகளையும் மூடநம்பிக்கை எதிர்ப்பு விமரிசனங்களையும் மக்கள் வரவேற்றார்கள். என்.எஸ். கிருஷ்ணன் சிரிக்க வைத்ததோடு சிந்திக்கவும் வைத்தார்.

அதே போன்ற அக்கறை இருக்குமானால், உடலுக்குத் தீங்கு விளைவிக்கிறதோ இல்லையோ, உள்நாட்டு சிறுதொழில்களை அழித்து, அவற்றின் லட்சக்கணக்கான தொழிலாளர்களை வீதியில் நிறுத்துகிற பன்னாட்டு நிறுவனங்களுக்காக விளம்பரங்களில் நடிக்கலாமா என்ற உறுத்தல் கலைஞர்களுக்கு இயல்பாக வரவேண்டும்.

-தந்தி தொலைக்காட்சியின் இளைஞர் முழக்கம் நிகழ்ச்சிக்கு அளித்த பேட்டியில் நான் கூறியது, (Comrade Kumaresan)

அமைதி சமாதானம் ஜனநாயகம்

www.sooddram.com