யுத்தத்தால் பாதிக்கப்பட்ட சிறுவர்களுக்கு முறையான உளவளப் பயிற்சி வேண்டும்

சிறுவர்களை மிகவும் மோசமான உளப்பாதிப்புக்குள்ளாக்கியுள்ள விடயத்தினையும் வடக்கு கிழக்கில் வாழும் சிறுவர்களுக்கு உடனடியாக உளவளப் பயிற்சிகள் வழங்கப்படவேண்டும் என்பதையும் யாருமே மறுக்க முடியாது. இச்சிறுவர்களின் இப்பிரச்சினையினை உணர்ந்து கொண்ட அரச, அரச சார்பற்ற அமைப்புகள் வடமாகாணத்தில் பாடசாலைகளுக் கூடாக உளவளப் பயிற்சிகளுக்கான விசேட செயற்திட்டங்களினை முன்னெடுத்து சிறுவர்களின் நலன்களைப் பேணவுள்ளதாக அறிவித்துள்ளன.

இதற்கமைய இச் செயற்திட்டங்கள் வடமாகாணப் பாடசாலைகளில் உடனடியாக ஆரம்பிக்கப்படவுள்ளன. இதற்கான உளவளத் துணையாளர்கள் நட்பு நெறியாளர்கள் அப்பாடசாலைகளில் கற்பிக்கும் ஆசிரியர்களிலிருந்து தெரிவுசெய்யப்பட்டுள்ளனர். பாதிக்கப்பட்ட மாணவர்களை உளவளப் பயிற்சிகளுக்கு உட்படுத்துவதனூடாக மீண்டும் இயல்புநிலைக்கு கொண்டுவர முடியுமென ஆய்வாளர்கள் நம்புகின்றனர். இத்திட்டத்தின் கீழ் இப்பயிற்சிகளை மாணவர்களுக்கு வழங்கவுள்ள ஆசிரியர்கள் தெரிவுசெய்யப்பட்டு பயிற்றுவிக்கப்படுகின்றன.

வன்னி யுத்தத்தில் இறுதியாக முல்லைதீவு மாவட்டத்தில் அகப்பட்ட மாணவர்களை அதிகமாகக் கொண்ட வடமாராட்சி கல்விவலயத்திற்குட்பட்ட மருதங்கேணிக் கோட்டப்பாடசாலைகளில் கல்விகற்கும் மாணவர்களுக்கான செயற்திட்டங்களுக்கான ஏற்பாடுகள் இன்னமும் ஆரம்பிக்கப்படவில்லை. இதற்கான ஆசிரியர்கள் எவருமே தெரிவுசெய்யப்பட்டு பயிற்சி வழங்கப்படவில்லை என அப்பகுதி பாடசாலைகளில் கல்விகற்கும் ஆசிரியர்கள் கவழை வெளியிட்டுள்ளனர்.

வடமாகாண மாணவர்களைப் பொறுத்தவரை நகரப்புறப் பாடசாலைகளில் கல்வி கற்கும் மாணவர்களுக்கும், கிராமப்பறப் பாடசாலைகளில் கல்வி கற்கும் மாணவர்களுக்கும் அதிக ஏற்றத் தாழ்வுகள் இருந்து வருவதாக குறை கூறி வருகின்றனர். இது உண்மைதான். கிராமப்புறப் பாடசாலைகளின் கல்வி நடவடிக்கைகள் திருப்தியாக இல்லை என்பதை அவர்களுடைய பெறு பேறுகளுடன் ஒப்பிட்டுக் கதைப்பதும் வழமையாகியுள்ளது.

ஆனால் யுத்தத்தின் பின்னர் அரச கட்டுப்பாட்டுப் பகுதிக்குள் இருந்த சிறுவர்களுக்கும் யுத்தத்தின் பிடியில் அகப்பட்ட சிறுவர்களுக்குமிடையில் நிறைய ஏற்றத்தாழ்வுகள் இருப்பதை அவதானிக்கக் கூடியதாகவுள்ளது.

குறிப்பாக யுத்தத்தின் பிடியில் அகப்பட்ட சிறுவர்கள் உளரீதியான பாதிப்புகளுக்கு உள்ளானதற்கு அப்பால் அவர்கள் அழிவுகளை நேரில் கண்டவர்களாகவும் குடும்ப உறவுகளை இழந்தவர்களாகவும் உள்ளனர். இவர்களால் மிகவும் எளிதாக நடந்தவைகளை மறந்து இயல்பு நிலைக்கு திரும்ப முடியாது.

இது இவர்களின் கற்றல் திறனில் பாதிப்பினை ஏற்படுத்தும். இதனை இவர்களுடன் நெறுங்கிப் பழகக் கூடிய ஆசிரியர்களால் ஓரளவுக்குச் சீர்படுத்தி மாணவர்களின் மன நிலையில் மாற்றத்தினைக் கொண்டுவர முடியும்.

எனவே இவ்விடயத்துடன் தொடர்புடைய அதிகாரிகள் தேவையான மாணவர்களைச் சரியான முறையில் அடையாளங்கண்டு உடனடியாகவே உளவளப்பயிற்சிகளுக்கு உற்படுத்த வேண்டும் என்பதும் இச்சிறுவர்கள் நடந்ததை மறந்து இயல்பான சமுக வாழ்க்கைக்கு உட்பட உதவ வேண்டும் என்பது உரிய அதிகாரிகளின் கோரிக்கையாக உள்ளது.

(தி. சிவகுமார்)