பாகிஸ்தானை 29 ஓட்டங்களால் வீழ்த்தி

இலங்கையுடனான இறுதிப் போட்டியில்  விளையாட இந்திய அணி தகுதி

பாகிஸ்தானுடனான அரையிறுதிப் போட்டியில் 29 ஓட்டங்களால் வெற்றிபெற்ற இந்திய அணி இலங்கையுடனான இறுதிப் போட்டியில் விளையாடத் தகுதி பெற்றுள்ளது. இந்திய - இலங்கை அணிகள் மோதும் இறுதிப் போட்டி எதிர்வரும் சனிக்கிழமை மும்பாய் வெங்கடே மைதானத்தில் இடம்பெறுகிறது. இந்தியா - பாகிஸ்தான் அணிகளுக்கிடை யிலான போட்டியில் பாகிஸ்தான் அணி 261 ஓட்டங்கள் பெற்றால் வெற்றி எனப் பதிலெடுத்தாடிய அவ்வணியின் ஆரம்பத் துடுப்பாட்ட வீரர்களாக கம்ரான் அக்மல், ஹபீஸ் ஆகியோர் களமிறங்கினர்.

கம்ரான் 19 ஓட்டங்களையும், ஹபீஸ் 43 ஓட்டங்களையும் அஷாட் சபீக் 30 ஓட்டங்களையும், யுனுஸ்கான் 13 ஓட்டங்களையும், உமர் அக்மல் 29 ஓட்டங்களையும் ரஸ்ஸாக் 3 ஓட்டங்களையும் அணித் தலைவர் அப்ரிடி 19 ஓட்டங்களையும் வஹாப் றியாஸ் 8 ஓட்டங்களையும் பெற்றனர். உமர்குல் 2 ஓட்டங்களையும் இதேவேளை தனியாளாக நின்ற மிஸ்பா உல் ஹக் 76 பந்துகளை எதிர்கொண்டு 5 பெளண்டரிகள் மற்றும் ஒரு சிக்சர் அடங்களாக 56 ஓட்டங்களைப் பெற்றார். இவர் ஒரு நாள் போட்டியில் பெற்ற 14வது அரைச்சதமாகும். இதேவேளை பாகிஸ்தான் அணி 49.5 ஓவர்களில் 231 ஓட்டங்களைப் பெற்றது. பாகிஸ்தான் அணி 29 ஓட்டங்களால் தோல்வியடைந்து அரையிறுதிப் போட்டியில் இருந்து வெளியேறியது. இந்திய அணி சார்பாக சஹீர்கான், நெஹ்ரா, பட்டேல், ஹர்பஜன் சிங், யுவராஜ் சிங் ஆகியோர் தலா இரண்டு விக்கெட்டை பதம்பார்த்தனர்.

இப்போட்டியின் ஆட்ட நாயகனாக டெண்டுல்கர் தெரிவானார். இதேவேளை பாகிஸ்தான் அணித் தலைவர் சஹீட் அப்ரிடி இந்திய நாட்டுக்கும், ரசிகர்களுக்கும், இந்திய அணியினருக்கும் பாராட்டுத் தெரிவித்தார்.

உலக கிண்ண கிரிக்கெட் போட்டியில் நேற்று மொகாலியில் நடைபெற்ற அரை இறுதி ஆட்டத்தில் இந்தியா- பாகிஸ்தான் அணிகள் மோதின. இதில் நாணயச் சூழற்சியில் வென்ற இந்திய அணி முதலில் துடுப்பெடுத்தாட தீர்மானித்தது. இந்திய அணியில் அஷ்வினுக்கு பதிலாக ஆஷிஸ் நெஹ்ரா சேர்க்கப்பட்டார். இந்த போட்டியை இந்திய பிரதமர் மன்மோகன் சிங், பாகிஸ்தான் பிரதமர் யூசுப் ராசா கிலானி ஆகியோர் பார்வையிட் டனர்.

அதன் படி தொடக்க வீரர்களாக சச்சினும், ஷேவாக்கும் களம் இறங்கி விளையாடினர். முதல் ஓவரில் இந்தியா 4 ஓட்டங்கள் எடுத்து ஷெவாக் அதிரடியாக விளையாடி வந்தார். வகாப் ரியாஸ் வீசிய 6வது ஓவரில் ஷெவாக் ஆட்டமிழந்தார். எல்.பி. டபிள்யூ முறையில் ஆட்டமிழந்தார். அவர் 38 ஓட்டங்கள் எடுத்தார். இதில் 9 பவுண்டரிகளும் அடங்கும்.

பின்னர் களம் வந்த காம்பீர் 27 ஓட்டம் எடுத்து ஆட்டம் இழந்தார். மறு முனையில் அதிரடியாக விளையாடி சச்சின் அரை சதம் அடித்தார். காம்பீர் ஆட்டமிழப்பை தொடர்ந்து பின்னர் களம் வந்த கோலி 9 ஓட்டங்களிலும், யுவராஜ் சிங் ஓட்டம் எதுவும் எடுக்காமல் ஆட்டமிழந்தார்.

அடுத்ததாக வந்த கப்டன் டோனி விக்கெட்டை காப்பாற்றும் நோக்கத்துடன் விளையாடி வந்தார். சிறப்பாக விளையாடி வந்த சச்சின் 37 வது ஓவரில் அஜ்மல் பந்தில் அப்ரிடியிடம் பிடிகொடுத்தார். அவர் 85 ஓட்டங்கள் எடுத்தார். அடுத்ததாக வந்த ரெய்னா அடித்து விளையாடி வந்தார். பொறுப்புடன் விளையாடி வந்த டோனி 25 அடித்திருந்தபோது எல்.பி.டபிள்யூ. முறையில் ஆட்டம் இழந்தார். அப்போது இந்தியாவின் ஸ்கோர் 205 ஓட்டங்களாக இருந்தது.

பின்னர் வந்த ஹர்பஜன் சிங் 12 ஓட்டங்களுக்கு ஆட்டமிழந்தார். அதைதொடர்ந்து வந்த வீரர்கள் சஹீர்கள் 9 ஓட்டங்களிலும் நெஹ்ரா ஒரு ஓட்டத்துடனும் பெவலியன் திரும்பினார். இறுதியாக இந்திய அணி 50 ஓவர்கள் முடிவில் 260 ஓட்டங்கள் எடுத்தது. ரெய்னா 38 ஓட்டத்துடனும் பட்டேல் ஓட்டம் எதுவும் எடுக்காமல் களத்தில் இருந்தனர். பந்து வீச்சாளர்கள் தரப்பில் அதிக பட்சமாக வகாப் ரியாஸ் 5 விக்கெட்டையும் அஜ்மல் 2, விக்கெட்டையும் ஹபிஸ் ஒரு விக்கெட்டையும் பதம் பார்த்தனர்.

இதேவேளை போட்டி ஆரம்பிப்பதற்கு பிரதமர் மன்மோகன் சிங், பாகிஸ்தான் பிரதமர் கிலானி ஆகியோர் இரு அணி வீரர்களுக்கும் கைலாகு கொடுத்தனர். பாகிஸ்தான் பிரதமர் கிலானி இந்த அழைப்பை ஏற்றுக்கொண்டார். அதன்படி கிரிக்கெட் போட்டியை பார்ப்பதற்காக கிலானி நேற்று மதியம் சன்டிகார் வந்தார். அவருடன் 45 பேர் குழுவினர் வந்தனர். முன்னதாக அவர் பாகிஸ்தானில் இருந்து புறப்படும் முன்பு, தனது மொகாலி பயணம் கிரிக்கெட்டை மேம்படுத்தும். இந்தியாவுடன் நட்புறவும் மேம்படுத்தும் என்றார்.

புறப்படும் முன்பு அவர் பாகிஸ்தான் கெப்டன் அப்ரிடிக்கு தொலைபேசியில் வாழ்த்து தெரிவித்தார். பிரதமர் மன்மோகன் சிங், காங்கிரஸ் தலைவர் சோனியா காந்தி உட்பட பிரபலங்கள் போட்டியை பார்த்து ரசித்தனர். இரு அணிகளுக்கான வீரர்கள் விபரம்:

இந்தியா: ஷெவாக், சச்சின் டெண் டுல்கர், கம்பீர், விராட் கோலி, யுவராஜ்சிங், டோனி (கப்டன்), சுரேஷ் ரெய்னா, ஹர்பஜன்சிங்க, சஹிர்கான், முனாப்பட்டேல், நெஹரா.

பாகிஸ்தான்: கம்ரன் அக்மல், முகம்மது ஹபீஸ், ஆசாத் ஷபிக், யூனிஸ்கான், மிஸ்பா உல் ஹக், உமர் அக்மல், அப்ரிடி (கப்டன்), அப்துல் ரசாக், சயீத் அஜ்மல், உமர்குல், வஹாப் ரியாஸ்.