இந்தியாவின் மனமாற்றம்?

(பரம் ஜி)

ஜ.நாவில் சிறீலங்காவின் போர்க்குற்றங்களுக்கு எதிரான தீர்மானத்திற்கு தாம் ஆதரவாக வாக்களிக்கப்போவதாக இந்தியா அறிவித்துள்ளதானது, மக்கள் சக்த்தியே மகேசன் சக்தி என்பதனை, ஆயுத சக்தியை நம்பும் அல்லது விரும்பும் மனிதர்களுக்கு மீண்டும் ஒரு முறை ஞாபகப்படுத்தி இருக்கின்றது எனலாம். மதில்மேல் பூனையாக இதுவரை காலமும் இருந்து வந்த இந்தியா எந்தப்பக்கம் பாயும் என்பது கோள்விக்குறியாக சென்ற வாரம் வரை இருந்ததனால், அமெரிக்காவின் தீர்மானத்திற்கு எத்தனை நாடுகள் ஆதரவு கொடுத்தாலென்ன, எத்தனை நாடுகள் எதிர்ப்பு தெரிவித்தாலென்ன, அதாவது சிறீலங்காவிற்கு ஆதரவு தெரிவித்தாலென்ன, உலக நாடுகள் பார்த்து கொண்டிருப்பது இந்தியா என்ன செய்யப்போகின்றது என்பதையே பிரதமர் மன்மோகன்சிங் இப்போது தந்து இருப்பதானது ஜ.நாவில் சிறீலங்காவின் போர்க்குற்றங்கள் பற்றிய தீர்மான நிலைமைகளை சூடேற்றி வைத்துள்ளது எனலாம். இந்தியாவிடம் இந்த மனமாற்றத்தை கொண்டு வரவைப்பதற்கு பல விடயங்கள் காரணமாக இருந்திருப்பதாவே எண்ணத்தோன்றகின்றது.

முதலாவது காரணமாக, மக்கள் சக்தியையும் மனிதத்தையும் மதித்து, சிறீலங்காவில் ஏற்பட்ட தமிழர்களின் அழிவுகளுக்கு காரணமாக இருந்தவர்களை தண்டித்து மனித இனத்திற்கு உண்டான மாசினை துடைக்கும் வகையில் மனுநீதி தேடவேண்டும் என இந்தியா நினைத்து இருக்குமோ எனில் நிச்சயமாக இல்லை என்றுதான் சொல்ல வேண்டும். காரணம், இலங்கை தீவில் தமிழர்களின் அழிவுகளுக்கு ஒருவகையில் தாமும் காரணமாக இருந்ததுடன் போர் முடிவுக்கு வந்தும் கடந்த மூன்று வருட காலங்களாக இலங்கையில் வாழும் தமிழர்களின் அரசியல் தேவைகளுக்கு தீர்வாக ஜனாதிபதி மகிந்தாவின் சிறீலங்கா அரசு கொடுத்து வந்த சப்பைக்கட்டு வாக்குறுதிகளையே, ஆதாவது பதின்மூன்றாவது திருத்த சட்டத்திற்கும் அப்பால் சென்று தீர்வு காணுவது பற்றி, சொன்னவற்றை திரும்பவும் சொல்லும் கிளிப்பிள்ளைகள் போல இவர்களும் சொல்லி காலத்தை கடத்தி வந்திருக்கின்றனர். எனவே மனிதத்தை காக்கும் நோக்கில் இந்தியா எடுத்த முடிவானது இந்த மனமாற்றங்களுக்கு காரணமில்லை என்பது தெளிவாகின்றது. ஆனால் மக்கள் சக்திதான் மனமாற்றங்களுக்கான முதல் காரணம் என்பதானால் அது நிச்சயமாக இந்திய நாட்டு மக்களின் சக்தி என்றுதான் சொல்ல வேண்டும்.

தமிழகம் முதலாக இந்தியாவில் இதுவரையில் மாறி மாறி நடைபெற்று வந்த மாநில தேர்தல்களில், மத்திய அரசில் ஆட்சியில் இருக்கும் காங்கிரஸ் கட்சியினரும் தமிழகத்தின் தி.மு.க போன்ற அவர்களது தோளமை கட்சிகளும் வாக்காளர்கள் நம்பிக்கைகளை தொலைத்து மக்கள் சக்தியை இழந்ததனால் அடைந்து வரும் தேர்தல் தோல்விகள் கொடுத்த அழுத்தங்களுடன், தற்போது தமிழகத்தின் முதல்வர் ஜெயலலிதா உட்பட பல முன்னணி கட்சிகளின் அரசியல்வாதிகள் காங்கிரஸ் கட்சியினரின் தமிழர் விரோதப்போக்குகளுக்கு எதிராக கொடுத்து வரும் ஆர்ப்பாட்ட எதிர்ப்பு கோச அழுத்தங்கள் காரணமாகி தமிழகத்தில் தாம் கூட்டு வைத்துள்ள தி.மு.காவின் எதிர்கால அரசியல் இலாபங்களுக்கு வேட்டு வைத்து அதன் மூலம் தமது கட்சியும் பாதிக்கப்பட்டு விடுவதனை தவிர்ப்பதற்காக எடுத்த ஒரு முடிவுதான் சிறீலங்காவிற்கு எதிரான வாக்களிப்பு என சொல்லலாம். அதே வேளை, ஜ.நாவில் மகிந்த அரசுக்கு எதிராக வாக்களிக்க போவதாக பிரதமர் மன்மோகன்சிங் தெரிவித்த பின்னரும் சிறீலங்காவிற்கு எதிராக கண்டனங்கள் தெரிவிக்கவில்லை என அ.தி.மு.காவின் முதல்வர் ஜெயலலிதாவும், எதிர்த்து வாக்களிப்பதே போதுமானது என தி.மு.காவின் தலைவர் கருனாநிதியும் தொடர்ந்து அறிக்கைகள் மூலம் மோதிக்கொள்ளுவது, ஜ.நா வாக்களிபு;பு மூலம் இலங்கை தமிழர்களுக்கு ஏதாவது நன்மைகள் நடைபெறின் அதற்கான உரிமைகளை தாம் கோரிக்கொள்ளத்தான் என்பது எந்த முட்டாள்களும் விளங்கி கொள்ள வேண்டிய விடயம்.

ஆரம்பத்தில் காங்கிரஸ் ஆட்சியின் போக்குகளுக்கு எதிராக குரல் கொடுத்ததுடன் ஆதரவுகளையும் வாபஸ் பெறபோவதாக அறிவித்திருந்த தி.மு.க தலைவர் கருனாநிதி, பிரதமர் மன்மோகன் மற்றும் சோனியா காந்தி போன்றவர்களிடம் இருந்து கிடைத்த விளக்கங்களை தொடர்ந்து இப்போது அடக்கி வாசிக்க ஆரம்பித்திருப்பதை காணக்கூடியதாக இருக்கின்றது. கொடுக்கப்பட்ட விளக்கம் ஒரு கேள்வியாகவும் அதே வேளை எச்சரிக்கையாசவும் இருந்திருப்பின் அது, சிறிலங்காவில் ஆட்சிமாற்றம் வரும்வரை பொறுமையாக காரியங்களை கையாளுவதா அல்லது அந்நாட்டில், மகிந்தா சகோதரர்கள் சீனா இரஸ்யா போன்ற நாடுகளின் ஆதரவுகளுடன் இன்று சிரியாவில் நடப்பதை போன்றதொரு இராணுவ ஆட்சியை நிறுவ வழிவகுப்பதா என்றும் இருந்திருக்கும். அதே வேளை தமிழக மீனவர்களை இன்று கச்சதீவு பகுதிகளில் சிங்கள கடற்படை வீரர்கள் துன்புறுத்துவதா அல்லது சீனக்கடற்படை தொல்லையாக இருப்பதா மேல் என்பனவையாகவும் இருந்திருக்கலாம்.

ஏதோ பல அரசியற்காரணங்களுக்காக மகிந்தா அரசு சொல்லி வந்த சல்ஜாப்புகளை எல்லாம் இந்தியா இதுவரை பொறுத்து கொண்டே வந்திருக்கின்றது. உலக அரங்கில் ஒரு வல்லரசுக்கு ஒப்பான தானத்தை இந்தியா வகித்து வருகின்ற போதும் இந்திய அரசு சிறீலங்காவில் இழைத்த சில அரசியல் தவறுகள் காரணமாக இந்தியாவின் பரம எதிரிகாளான மக்கள்சீனக்குடியரசு சிறீலங்கா ஊடாக இந்து சமுத்திர பிராந்தியத்தில் ஊடுருவ வழிசெய்ய வைத்தது. அதன் காரணமாக சிறீலங்கா ஒரு சிறிய வறிய நாடாக இருந்தபோதும் அந்நாட்டு ஆட்சியாளர்களை இந்தியா மதிப்பளித்து நடாத்தி வந்திருக்கின்றது. இன்று தமது தீர்மானத்திற்கு ஜ.நாவில் ஆதரவினை தரும்படி ஜக்கிய அமெரிக்கா தூதுவர்களை அனுப்பி இந்தியாவிடம் பல முறை கேட்டிருந்தபோதும் நேரடியாக பதில் ஏதும் சொல்லாமல் இந்தியா இருந்து வந்தது. ஆனால் ஜக்கிய அமெரிக்கா சிறீலங்காவிற்கு எதிரான தனது ஜ.நா தீர்மானத்திற்கு இந்தியா தவிர்ந்த மற்றய நாடுகளின் ஆதரவுகளை பெற்று வாக்கெடுப்பில் வெல்லுமாயின் இந்தியாவின் செல்வாக்கு செல்லாக்காசாகி விடும் என்பதையும் இந்தியா உணர்ந்திருக்க கூடும். அதுவும் வாக்களிப்பில் சிறீலங்காவிற்கு எதிராக வாக்களிக்க முன்வந்ததன் காரணங்களில் ஒன்றாக இருக்கலாம்.

ஜக்கிய அமெரிக்காவின் சிறீலங்கா மீதான போர்க்குற்ற பிரேரணை ஒரு வேளைஆடு நனைகிறது என ஓநாய் அழுத கதை போன்றதாக இருக்குமோ என சந்தேகம் கொள்ள வைக்கிறது. ஆயிரத்து தொள்ளாயிரத்து அறுபதுகளில் இலங்கையின் மன்னார் தங்காலை கடற்பரப்புகளின் அடியில் மசகு எண்ணை வளங்கள் இருப்பதாக வந்த இரகசிய கதைகள் இன்றய காலகட்டத்தில் பரகசியமாகி, இந்தியா சீனா போன்ற நாடுகள் அவ்வளங்களை தமது நாடுகளுக்கு சாதகமாக்கி நன்மை அடையும் நோக்கிலேயே சிறீலங்காவின் தான்தோன்றி தனமான நடப்புக்களுக்கு எல்லாம் ஆதரவுகளை கொடுக்கின்றன அதன் காரணமாகவே விடுதலைப்புலிகளை அழிப்பதற்கு வேண்டிய ஆயுதங்களையும் ஆதரவுகளையும் கொடுத்தன என்றும் கூறப்படுகின்றது. அந்த எண்ணை வளத்தை கருத்தில் கொண்டே ஜக்கிய அமெரிக்காவும் சிறீலங்காவை தனது ஜ.நா போர்க்குற்ற மிரட்டல்களால் பணிய வைக்கவும் முடிவில் தனது கைப்பொம்மை அரசியல்வாதி ஒருவரை ஜனாதிபதி பதவியில் அமரவைப்பர் எனவும் எதிர்பார்க படுகிறது. யார் இடித்தாலும் பறவாயில்லை பிச்சை எடுக்கும் நிiயில் இருக்கும் தமிழர்களுக்கு அரசி கிடைத்தால் சரி.

இலங்கை தீவில் இருக்கின்ற மக்களின் தலைவிதிகளை நிர்ணயிக்கும் உரிமைகளை தமது கைகளில் இதுவரைகாலமும் வைத்திருக்கும் சிங்கள தமிழ் அரசியல்வாதிகள், சேகுவேரா ஜே.வி.பி மற்றும் தமிழீழ விடுதலை போரளிகள் போன்ற சிங்கள தமிழ் விடுதலை இயக்கங்கள் போன்றவைகள் எல்லாம் அரசியல் சூனியர்களாக இருந்ததுடன் இனவெறியை மக்களிடையே பரப்பி வளர்த்து விடுவதே அரசியல் தந்திரங்களாக்கி அந்நாட்டையும் மக்களையும் அழிவுப்பாதையிலேயே இட்டு சென்று இருக்கின்றனர். இன்று தமது நாட்டு நிலவரங்களை சரிவர புரிந்து கொள்ளாமல் ஜக்கிய அமெரிக்கா இந்தியா போன்ற நாடுகளின் பலம் இராஜ தந்திரங்கள் பற்றி உணராது அவர்களை ஏதோ தம்மை ஒத்த தெருச்சண்டியர்களாக எண்ணி வம்புக்கு இழுப்பது தூசிப்பது சவால்கள் விடுவது போன்ற நடந்து கொள்ளும் ஜாதிக ஹெல உறுமய போன்ற கட்சிகளை சார்ந்தவர்கள் தகுந்த பாடங்கள் விரைவில் படிக்கும் காலங்கள் வரவேண்டும்.

கடைசியாக கிடைத்த தகவல்களின் படி இந்தியாவின் ஆதரவுடன் ஜ.நாவில் ஜக்கிய அமெரிக்கா சிறீலங்காவிற்கு எதிரான தீர்மானத்தில் போதிய வாக்குகளை பெற்று வெற்றி கண்டுள்ளதாக தெரிய வருகிறது. முப்பது வருடங்களுக்கு மேலாக தமிழர்கள் கற்றுக்கொண்ட பொறுமை எனும் பாடம் வேண்டிய காரியங்கள் ஆகும் வரையில் இனித்தான் தேவைப்படும்.