அமெரிக்க நிர்ப்பந்தத்துக்கு அடிபணியாதீர்!

(கி.இலக்குவன்)

எண்ணெய் வள நாடுகளில் எல்லாம் தனது கட்டளைப்படி இயங்கக்கூடிய ஆட்சிகளைத் திணிப்பதற்காக ஆட்சிமாற்றங்களைக் கொண்டுவருவதையே தனது அயலுறவுக் கொள்கையாகக் கொண்டு அமெரிக்கா செயல்பட்டுவருகிறது. ஆப்கானிஸ்தான், இராக், லிபியா என்று தொடரும் அதன் பட்டியலில் இடம் பெற்றுள்ள நாடு ஈரான். இந்த நாடு யுரேனியத்தை செறிவூட்டும் பணியைக் கைவிட மறுத்ததால் அதற்கு எதிரான கடுமையான வர்த்தகத் தடைகளை அமெரிக்காவும் ஐரோப்பிய நாடுகளும் விதித்துள்ளன. ஈரான் நாட்டிலிருந்து எண்ணெய்யை இறக்குமதி செய்யக்கூடாது என்று இந்தியாவின் மீது அமெரிக்கா வெளிப்படையான நிர்ப்பந்தங்களைக் கொண்டுவந்ததை அடுத்து மிகவும் இக்கட்டான சூழலில் இந்தியா வைக்கப்பட்டுள்ளது. சவூதி அரேபியாவுக்கு அடுத்தபடியாக ஈரானிலிருந்து பெறப்படும் கச்சா எண்ணெய் இறக்குமதியின் மூலம் தான் இந்தியா தனது பெட்ரோலிய எண்ணெய்த் தேவைகளை நிறைவேற்றிக்கொள்கிறது. இந்தியாவின் எரிசக்தித்தேவை தொடர்ந்து அதிகரித்துவரும் நிலையில் ஈரானிலிருந்து இறக்குமதியை நிறுத்திக்கொள்வது இந்திய நாட்டின் பொருளாதார நலன்களுக்கு ஊறு விளைவிக்கும். ஐ.நா. சபையின் அங்கீகாரம் இன்றி தன்னிச்சையான முறையில் அமெரிக்காவும் ஐரோப்பிய நாடுகளும் விதித்துள்ள பொருளாதாரத்தடைகளைப் பொருட்படுத்துவதை விட தனது நாட்டு நலன்களுக்கு எது உகந்ததோ அந்த அடிப்படையிலேயே இந்தியா செயல்படவேண்டும்.

உண்மையில் ஓராண்டுக்கு மேலாக இதற்கான நிர்ப்பந்தங்கள் கொண்டு வரப்பட்டன. மேலை நாடுகளைத் தலைமையிடமாகக் கொண்ட வங்கிகள் எண்ணெய்க்காக ஈரானுக்கு தரவேண்டிய பணம் அதனைச் சென்றடையும் வழிகளை அடைத்துவிட்டன. ஒரு துருக்கிய வங்கியின் மூலம் பணத்தை அனுப்புவதற்கு இந்தியா ஏற்பாடு செய்தது. துருக்கியின் மீதும் அமெரிக்கா நிர்ப்பந்தம் செய்ததையடுத்து இறக்குமதியின் மதிப்பில் பாதியை இந்திய ரூபாய் மூலம் பட்டுவாடா செய்வதற்கு ஈரானும் இந்தியாவும் ஒப்பந்தம் செய்து கொண்டன. இப்போது ஈரானிலிருந்து இறக்கு மதியை முற்றிலும் நிறுத்த வேண்டும் என்ற நிர்ப்பந்தம் கொண்டுவரப்படுகிறது. இந்தியா மட்டுமின்றி ஜப்பான், சீனா ஆகிய நாடுகளின் மீதும் இப்போது நிர்ப்பந்தங்கள் கொண்டு வரப்பட்டுள்ளன. தனது இறக்குமதியின் ஒரு பகுதிக்கு தடையிலிருந்து விலக்களிக்க வேண்டும் என்று அமெரிக்காவுடன் ஜப்பான் பேரம் பேசிவருகிறது. சீனா இந்த நிர்ப்பந்தத்துக்கு அடிபணிய தொடர்ந்து மறுத்து வருகிறது.

எனினும் அமெரிக்க நிர்ப்பந்தத்துக்கு இந்தியா அடிபணிந்துவிடும் என்பது போலத் தோன்றுகிறது. மிகப்பெரும் அளவில் ஈரானிய கச்சா எண்ணெய்யை இறக்குமதி செய்து சுத்திகரித்து வரும் மங்களூர் சுத்திகரிப்பாலை தனது அடுத்த ஆண்டு இறக்குமதியை சரிபாதியாகக் குறைக்க திட்டமிட்டுள்ளது. இந்தியாவின் கச்சா எண்ணெய்த் தேவையில்

12 சதவீதம் ஈரானிலிருந்து தான் இறக்குமதி செய்யப்பட்டு வருகிறது. இன்றைய எண்ணெய்ச்சந்தை பெரும் நெருக்கடியை எதிர்கொண்டுவரும் சூழலில் இந்த அளவு எண்ணெய்யை இறக்குமதி செய்வதற்கான மாற்று ஏற்பாடுகள் எளிதானதாக இருக்காது. அதன் விலையும் அதிகரிக்கக்கூடும். அமெரிக்காவின் நிர்ப்பந்தத்துக்கு ஆட்சியாளர்கள் அடிபணியக்கூடாது. ரஷ்யா போன்ற நாடுகள் எண்ணெய்க்கு பதிலாக கோதுமையை வழங்கும் பண்டமாற்று வர்த்தகத்தில் ஈடுபட்டு வருகின்றன. நாம் உணவுதானியங்களை ஏற்றுமதி செய்யாவிட்டாலும் ஈரானிய கச்சா எண்ணெய்யை சுத்திகரித்து அனுப்பும் பொறுப்பை ஏற்றுக்கொள்ளலாம். ஏனென்றால் கச்சா எண்ணெய் உற்பத்தியில் முன்னணி நாடாக உள்ள ஈரானில் அதனை சுத்திகரிப்பதற்கான வாய்ப்பு வசதிகள் போதுமானவையாக இல்லை. எனவே கச்சா எண்ணெய்க்காக கொடுக்கவேண்டிய பணத்துக்கு பதிலாக ஈரானிய கச்சா எண்ணெய்யை இறக்குமதி செய்து அதனை சுத்திகரித்துத் திரும்ப அனுப்பலாம். காப்பீடு தொடர்பான பிரச்சனைகளால் கப்பல் களை வாடகைக்கு அமர்த்த முடியவில்லை என்றால் தனது சொந்தக் கப்பல்கள் மூலம் கச்சா எண்ணெய்யை அனுப்பி வைக்க ஈரான் தயாராக உள்ளது. இவ்வாறு கடந்த சில வாரங்களாக ஈரான் இந்தியாவுக்கு எண்ணெய்யை ஏற்றுமதி செய்து வருவதாகத் தெரிகிறது. இறக்குமதிக்கு பணம் கொடுப்பதற்கும் எண்ணெய்யை இந்தியாவுக்குக் கொண்டு வருவதற்கும் பல்வேறு வாய்ப்புகள் உள்ளன. எனவே அமெரிக்கா தனது ஏகாதிபத்திய நலன்களை மேம்படுத்துவதற்காக கொண்டு வரும் சுயநல சூழ்ச்சித் திட்டங்களுக்கும் மிரட்டல்களுக்கும் அடிபணியாமல் இந்திய நாட்டின் நலன்களுக்கே இந்திய ஆட்சியாளர்கள் முன்னுரிமை அளிக்கவேண்டும்.

ஆதாரம்: ‘இந்து’ (12.03.2012)