யாழ்ப்பாணத்தில் மேதின கூட்டமைப்பு 

(தமிழ்நேசன், கனடா)

 தமிழ்த்தேசிய கூட்டமைப்பானது   இலங்கையின் பிரதான எதிர்க்கட்சியான யு.என்.பியுடன் இணைந்து இம்முறை யாழ்ப்பாணத்தில் மேதினத்தைக்கொண்டாட இருக்கின்றார்கள். இவர்களின் உறவு இன்றைக்கு நேற்று ஏற்பட்டது அல்ல அன்று  யு.என்.பி அரசு ஆட்சியில் இருந்தபோது அதன் பங்காளிக்கட்சியாக பங்கெடுத்த தமிழரசுக்கட்சி அமைச்சுப்பதவியையும் ஏற்றுக்கொண்டது அன்றில் இருந்து இன்றுவரைஇந்த பிரதான சிங்களக்கட்சியுடன்  தமிழ்த்தேசிய கூட்டமைப்பு  இறுக்கமான உறவை ஏற்படுத்தி வருகின்றது.  

இலங்கையில் தமிழ்மக்களுக்கு பிரச்சினை இருக்கின்றது கட்டாயமாகத் தீர்க்கப்படவேண்டும் என்று தேர்தல் பிரச்சாரத்தின் போது துணிந்து கூறியவர் ஜனாதிபதி சந்திரிக்கா அவர்கள்.  ஏனைய சிங்களத்தலைவர்கள் போன்று அல்லாது உதட்டளவில் கூறாமல் தனது உள்ளத்தினால் சிங்கள மக்கள்மத்தியில் பகிரங்கமாகக்கூறி  ஆட்சியைகைப்பற்றி ஆட்சிக்கு வந்தவுடன் உடனடியாக புலிகளுடன் யுத்தநிறுத்தத்தை மேற்கொண்டு பின்னர் புலிகளின்  தாக்குதலினால் யுத்தம் முறிவடைந்து சண்டை ஏற்பட்டபோதும் பலத்த சவால்களுக்கு மத்தியில் பாராளுமன்றத்தில் தமிழர்களுக்குரிய அரசியல் தீர்வை முன்வைத்தபோது யு.என்.பி  தலைவர் ரணில் விக்கிரசிங்கா அதனை கடுமையாக எதிர்த்ததுமட்டுமல்ல அதன் நகலை பாராளுமன்றத்திலேயே வைத்து எரித்து ஓரு சிங்கள அபிமானியாகவும் இனவாதியாகவும் தனது சுயரூபத்தைக் காட்டிக்கொண்டார் என்பது முழு இலங்கை மக்களுக்கும் தெரிந்தவிடயம். இப்படியான இனவாத நஞ்சை நெஞ்சினில் வைத்திருப்பவரிடம் எப்படி தமிழ்தேசியகூட்டமைப்பு கைகோர்த்து அதுவும் யாழ்ப்பாணத்தில் மேதினத்தை கொண்டாட முன்வந்திருக்கின்றார்கள் என்ற விடயம் பலத்தகேள்விகளை எழுப்பியுள்ளது.                                

இன்றைய ஜனாதிபதி மகிந்த அவர்கள் இனப்பிரச்சினைக்கான தீர்வை இழுத்தடிக்கின்றார், தமிழ்ப்பகுதியில் இராணுவ ஆக்கிரமிப்பு புத்தவிகாரைகள் கட்டப்படுகின்றன, மற்றும் சிங்களக்குடியேற்றங்கள் போன்ற குற்றச்சாட்டுக்கள் தமிழ்த்தேசியகூட்டமைப்பினால் முன்வைக்கப்படுகின்றன இதில் உண்மை இருக்கின்றது.  

ஆனால் சில மாதங்களுக்கு முன்னர் ஜனநாயக மக்கள் முன்னணித் தலைவர் மனோ கணேசன் அவர்கள் நியாயமான ஒரு கேள்வி ஒன்றை பகிரங்கமாக யு.என்.பி கட்சியிடமும் ஜே.வி.பி கட்சியிடமும் கேட்டிருந்தார் அந்தக்கேள்வி என்னவென்றால் அதுசரி தமிழர்களுக்கான இனப்பிரச்சினைத் தீர்வில் உங்கள் கட்சியின் நிலைப்பாடு என்ன? என்பதுதான் கேள்வி அதற்கு இன்றுவரை இந்தக்கட்சிகளிடம் இருந்து பதில் இல்லை. இவர்களும் தமிழ்மக்களுக்கு அரசியல் தீர்வை வழங்கத்தயார் இல்லை என்பது இவர்களின் மௌனங்களில் இருந்து தெரியவருகின்றது.                                     

யாழ்ப்பாணம் வரும்  கூட்டமைப்பின் கூட்டாளிக்கட்சியான யு.என்.பி கட்சியின் தலைவர் ரணில் விக்கிரமசிங்காவிடம்  தமிழ்த்தேசிய கூட்டமைப்பானது பகிரங்கமாக இரண்டு கேள்விகளை கேட்பார்களா?  

(1) ஜனாதிபதி மகிந்தராஜபக்ஸ அரசு இலங்கை--இந்திய ஒப்பந்தத்தின் மூலம் தமிழர் மாகாணங்களுக்கு  வழங்கப்பட்ட காணி பொலிஸ் அதிகாரத்தை அவர்களுக்கு வழங்கமுடியாது என்று திட்டவட்டமாகக் கூறுகின்றது  இதில் உங்கள் நிலைப்பாடு என்ன?. இந்த அதிகாரங்களை அரசாங்கம் தமிழ்மக்களுக்கு வழங்கவேண்டும் அதற்கு யு.என்.பியின் ஆதரவு உண்டு  என்பதை பகிரங்கமாக கூறுவீர்களா?                                                  

(2) தமிழ்ப்பகுதியில் இராணுவ ஆக்கிரமிப்பு புத்தவிகாரைகள் கட்டப்படுகின்றன  மற்றும் சிங்களக்குடியேற்றங்கள் போன்ற குற்றச்சாட்டுக்கள் தமிழ்த்தேசியகூட்டமைப்பான உங்களால் முன்வைக்கப்படுகின்றன.  எனவே மேற்குறிப்பிட்ட மூன்று விடயங்களையும் யு.என்.பி கட்சியின் தலைவர் ரணிலிடம் மகிந்த அரசு இந்த தழிழர் விரோதபோக்குகளை கைவிட்டுவிட்டு தமிழ்ப்பகுதிகளில் தமிழர்கள் சுதந்திரமாக வாழவழி செய்யவேண்டும்  என்பதை பகிரங்கமாக அறிக்கை விடும்படிகேட்பீர்களா?                                                            

தமிழ்த்தேசிய கூட்டமைப்பு ஒன்றை மட்டும் தெரிந்துகொள்ளவேண்டும். ரணில் யாழ்ப்பாணத்திற்கு வந்து தமிழர்களின் உரிமைகளைப்பற்றியோ இராணுவ அரசியல் விடயங்கள்பற்றியோ மூச்சுவிடமாட்டார். தமிழ் மக்களுக்கு ஆதரவானவர் போல நடித்து தமிழர்களை திருப்திப்படுத்தவும் நாசுக்காக சில விடயங்களை கூறிவிட்டு, கூட்டமைப்பினராகிய நீங்கள்  இழிச்சவாயர்கள் என்பதை உள்ளத்தில் நினைத்து தான் நினைத்ததை சாதித்துவிட்டதாகவும் பெருமிதம் கொள்ளுவார். இந்தக்கூட்டத்தினால் நன்மை அடைவது ரணிலும் யு.என்..பி கட்சியும்தான் தமிழர்கள் அல்ல என்பதைத் புரிந்து கொள்வீர்கள்.