மனிதனின் வேகம்

நன்றாக ஓடும் ஒருவரால் சுமார் 3 நிமிடம், 50 வினாடி நேரத்தில் ஒன்றரை கிலோமீற்றர் தூரம் ஓட முடியும். 1958 ஆம் ஆண்டு நிகழ்த்தப்பட்ட உலக சாதனை 3 நிமிடம் 36.8 வினாடி. சாதாரணமாக ஒரு மனிதர் நடக்கும்போது அவர் ஒரு வினாடிக்கு 7 மீற்றர் தூரத்தைக் கடக்கிறார். ஆனால் இந்த வேகங்களை அப்படியே ஒன்றோடு ஒன்று ஒப்பிட்டுப் பார்க்கக் கூடாது. ஏனென்றால் நடந்து செல்கையில் தொடர்ந்து பல மணி நேரத்துக்கு மணிக்கு 5 கிலோ மீற்றர் வேகத்தில் நீங்கள் நடக்க முடியும். ஆனால் ஓடுபவரால் ஒரு குறுகிய நேரத்துக்குத்தான் ஒரே வேகத்தில் ஓட முடியும்.

தரைப்படை துரித நடையில் செல்லும்போது அதன் வேகம், ஓடுபவரின் வேகத்தில் மூன்றில் ஒரு பங்குதான். வினாடிக்கு 2 மீற்றர் அல்லது மணிக்கு ஏறத்தாழ 7 கிலோ மீற்றர்தான். ஆனால் அடிப்படை வீரர்களால் மிக அதிகத் தொலைவு செல்ல முடியும். உங்களது சாதாரண நடை யின் வேகத்தை, மெல்ல ஊர்வதற்குப் பேர் போன நத்தை அல்லது ஆமையின் ‘வேகத்துடன்’ ஒப்பிட்டுப் பார்ப்பது நிச்சயமாய் உங்களுக்கு வேடிக்கையாய் இருக்கும். நத்தையின் வேகம் வினாடிக்கு 1.5 மில்லி மீற்றர் அல்லது மணிக்கு 5.4 மீற்றர், அதாவது உங்களது வேகத்தை விடச் சரியாக ஓராயிரம் மடங்கு குறைவானது. மெல்ல நகர்வதற்குப் பேர் போன மற்றொரு பிராணியான ஆமையின் வேகமும் அதிகமல்ல. மணிக்கு 70 மீற்றர்தான்!

நத்தை, ஆமை ஆகியவற்றுடன் ஒப்பிட்டால் நீங்கள் விரைவாகச் செல்லக்கூடியவர்களே. ஆயினும் உங்களுடைய இயக்கத்தை உங்களைச் சுற்றிலும் உள்ள வேறு பல இயக்கங்களுடன் ஒப்பிட்டால் வேகத்தில் உங்களை மிஞ்சும் இயக்கங்கள் பலவும் இருப்பதைக் காண்பீர்கள்.

சமவெளிகளில் பாயும் பெரும்பாலான நதிகளின் வேகத்தை நீங்கள் சுலபமாக மிஞ்ச முடியும், சாதாரணமாக வீசும் காற்றின் வேகத்துக்கு அதிகம் குறையாத வேகத்தில் நீங்கள் போக முடியும் என்பது உண்மைதான். ஆனால் வினாடிக்கு 5 மீற்றர் வேகத்தில் பறக்கும் ஈயை எட்டிப் பிடிக்க வேண்டும் என்றால் நீங்கள் ‘ஸ்கீ’ எனப்படும் பனிச்சறுக்கு மிதியடிகளை அணிந்துகொண்டால்தான் உங்களுக்கு அது சாத்தியமாகும். வேகமாகச் செல்லும் குதிரை மீது சென்றால் கூட முயலையோ, வேட்டை நாயையோ உங்களால் எட்டிப் பிடிக்க முடியாது. விமானத்தில் சென்றால்தான் கழுகுடன் உங்களால் போட்டியிட முடியும். ஆனால் மனிதன் கண்டுபிடித்திருக்கும் இயந்திரங்கள், வேகத்தில் அவனை எதற்கும் இளைக்காதவனாக்கி உள்ளன.

விமானத் தயாரிப்பாளர்கள் ‘ஒலித் தடை’யைத் தாண்டுவதற்கு முயற்சி மேற்கொண்டனர். அதாவது வினாடிக்கு 330 மீற்றர் அல்லது மணிக்கு 1200 கி. மீ. என்னும் ஒலியின் வேகத்தையும் கடந்த விமானங்களை உருவாக்குவதற்கு முயற்சிசெய்தனர். இன்று அது சாத்தியமாகிவிட்டது. மணிக்கு 2500 கி. மீ. வேகத்தில் செல்லும் விமானம் முதலில் ரஷ்யாவில் உருவாக்கப்பட்டது. இன்று சக்திமிக்க ஜெட் இயந்திரங்கள் கொண்ட சிறிய விமானங்கள் மணிக்கு 3 ஆயிரம் கி. மீ. வேகத்தில் செல்லக்கூடியதாக இருக்கின்றன.

‘ஸ்புட்னிக்’ ரொக்கெட்டின் தொடக்க வேகம் வினாடிக்கு ஏறத்தாழ 8 கி. மீ. பிற்பாடு வினாடிக்கு சுமார் 11 கி. மீ. என்ற அளவுக்கு அது உயர்ந்தது.