உத்தேச மாகாண சபைத் தேர்தல்களும் பூர்வாங்க நிலைப்பாடுகளும்

மூன்று மாகாண சபைகளுக்கான தேர்தல்களை நடத்துவதற்குரிய அரங்கை அரசாங்கம் ஆயத்தம் செய்துள்ளதாக தெரிய வருகிறது. அண்மையில் இடம்பெற்ற சுதந்திரக் கட்சி மீள்புனரமைப்பு வேலைத் திட்டம் தொடர்பாக கருத்துக் கூறிய அரச குரல்தரவல்ல அதிகாரி வட மத்திய மாகாண சபைக்கான தேர்தலையும் நடத்துவதன் பொருட்டே அந்த மாகாணத்தின் முக்கிய நகரங்களில் ஒன்றான அநுராதபுரம் பிரதேசத்தில் கட்சி மறுசீரமைப்பு நடவடிக்கைகள் மேற்கொள்ளப்பட்டதாக தெரிவித்தார். அதேபோன்று மறுசீரமைப்பு வேலைத் திட்டங்களை விரைவில் சப்ரகமுவ மற்றும் கிழக்கு மாகாணங்களிலும் நடத்த இருப்பதாகவும் சுட்டிக்காட்டத் தவறவில்லை.

அதேவேளை வடமத்திய, கிழக்கு, சப்ரகமுவ மாகாண சபைகளை ஜூன்/ ஜுலை காலப் பகுதியில் கலைத்து செப்டம்பரில் தேர்தல்களை நடத்துவதற்கான முயற்சிகள் மேற்கொள்ளப்படுவதாக தெரிவிக்கப்படுகிறது. மூன்று மாகாண சபைகளின் ஆட்சிக்காலம் அடுத்த வருடத்திலேயே முடிவடையவுள்ளது. என்றாலும் அரசாங்கம் அதன் செல்வாக்கை இழந்து தேர்தல்களுக்கு முகங்கொடுக்க முடியாத நிலைக்குள்ளாகியுள்ளது என்ற எதிர் சக்திகளின் பிதற்றல்களை பொய்ப்பிக்கும் நோக்கத்துடனேயே, குறித்த திட்டமான காலப் பகுதிக்கு முன்பதாக தேர்தல்களை நடத்த முற்படுவதாக ஊடக அமைச்சர் கூறினார். அரசாங்கம் செல்வாக்கை இழந்துவிட்டது என்று வர்ணிக்கும் எதிர்த்தரப்பினருக்கு, போட்டியிட்டு வெற்றிபெற்றுக் காட்டுமாறு அழைப்பு விடுத்த அமைச்சர், காலத்துக்கு முந்திய தேர்தல்கள் சர்வதேச அழுத்தங்களை மறுதலிப்பதற்கு மஹிந்த ராஜபக்ஷ அரசாங்கத்தை பலப்படுத்தும், மக்கள் அரசாங்கத்துடன் இணைந்திருப்பதையும் வெளிக்காட்டும் என்றார்.

கால அட்டவணைக்கு ஒரு வருடத்துக்கு முன்பதாக தேர்தல்களை நடத்துவது புதியதொன்றல்ல. கடந்த காலத்திலும் அவ்வாறு நடத்தப்பட்டமை தெரிந்ததே. உரிய திகதிக்கு முன்பதாக வாக்களிப்பதற்கு மக்களுக்கு உரிமையளிக்கிறோம் என ஆளும்தரப்பு கூறுகிறது. தேர்தல்களுக்கு தயாராகுவது எதிர்க் கட்சிகளின் பொறுப்பு. ஆனால் பிரதான எதிர்க் கட்சிகளான யு. என். பி., ஜே. வி. பி. தங்களது மாற்றுக் கருத்துக்களை முன்வைக்கையில் - தேர்தல்களுக்கு முகங்கொடுக்க தாங்கள் தயாராக உள்ள போதிலும், அதற்குச் செல்வதற்குரிய சரியான காலமல்ல என்ற கருத்து தெரிவிக்கப்பட்டது.

பகுதி பகுதியாகவன்றியும், தேர்தல்களை நடத்துவதற்கு அதிகாரங்களை துஷ்பிரயோகம் செய்யாமலும் உத்தேச தேர்தல்களை ஏககாலத்தில் நடத்துமாறு அரசுக்கு சவால்விடுவதாக ஐ. தே. க. பொதுச் செயலாளர் சமீபத்தில் குறிப்பிட்டிருந்தார்.

வடக்கில் மாகாண சபைத் தேர்தல் இதுவரையில் நடத்தப்படவில்லை. அரசாங்கம் – விரைவில் நடத்தப்படும் எனக் கூறுகிறது. தனது வளங்கள் அனைத்தையும் ஒன்றுகூட்டி, சில மாகாண சபைகளை வென்றெடுப்பதற்காக முயற்சிப்பதாக அக்கட்சியின் செயலர் குறிப்பிட்டார். சகல மாகாண சபைகளதும் தேர்தல்களை ஏக காலத்தில் நடத்தினால் அதி கூடுதலான கவனத்தை அதன்பால் செலுத்த வேண்டியிருக்கும் என்பதால் ஒரு சில மாகாண சபைகளுக்கு தேர்தல்களை நடத்தினால் சிரமமிருக்காது என்றும் குற்றஞ்சாட்டினர்.

இதே வேளை மாகாண சபைகளுக்கான கால எல்லை இன்னும் முடிவுறாத நிலையில் பண வீண் விரயம் என்பதை சுட்டிக்காட்டுவோரும் உள்ளனர். உரிய காலத்துக்கு முன்பு தேர்தல்களை நடத்துவதும் ஒரு வகை ஜனநாயகமே. என்றாலும் பணத்தை விழுங்கிவிடுகின்ற விகிதாசார தேர்தல் முறைமையில் பொதுவாக அரசு - எதிர்க் கட்சி என்ற பாகுபாடின்றி சமகாலத்தில் இருக்கக் கூடிய உறுப்பினர்களுக்கு முன்கூட்டியே தேர்தல்களை நடத்துவது விருப்பத்துக்குரியதல்ல என்பதை விட மத்திய மாகாண சபை உறுப்பினர்கள் கையொப்பமிட்டு ஒப்படைத்துள்ள மகஜர் வெளிப்படையாகவே உணர்த்துகிறது.

எவ்வாறாயினும் வடமத்திய, சப்ரகமுவ மற்றும் கிழக்கு மாகாண சபைகளை கலைக்கும் தீர்மானத்தை முன்னெடுத்து, செப்டம்பர் மாதத்தில் தேர்தல்களை நடத்துவது என்ற நிலைப்பாட்டிலேயே அரசாங்கம் இருப்பதாக அறிய முடிகிறது. அதேவேளையில் தேர்தல் தொடர்பில் விமர்சனங்களை முன்வைத்த அரசியல் கட்சிகளும் அடிமட்ட செயல்பாடுகளை முடுக்கிவிட்டுள்ளதாகவே தெரிவிக்கப்படுகிறது. திடீரென தேர்தல்கள் பிரகடனப்படுத்தப்பட்டால், அவற்றை சிறப்பாக எந்த அடிப்படையில் எதிர்கொள்வது என்பது தொடர்பில் பிரதான எதிர்க்கட்சியான ஐ. தே. க. கலந்து பேசியுள்ளது. மூன்று சபைகளதும் ஐ. தே. க. மாகாண சபை அங்கத்தவர்கள் சமுகமளித்திருந்த கூட்டத்தில், தேர்தல்களை எதிர்பார்த்திருப்பதாக அவர்களே கூறியதாக ஐ. தே. க. வட்டாரங்கள் தெரிவித்தன.

சட்டத்தரணி

இஸ்மாயில் பி. மஆரிப்

தலைவர்