அவர்களே அவர்களைப்பற்றி கூறுகின்றார்கள்......

ஐயா ஜெயானந்த மூர்த்தி அவர்களே! ஓய்வூதியம் அல்ல ஒற்றுமை ஐயா ஒற்றுமை வேண்டும்!

முன்னாள் பாராளுமன்ற உறுப்பினரே ! உங்களுக்கு மீண்டும் ஒரு மடல். பல மடல் எழுதியும் நீங்கள் பதில் தருவதில்லை என்பது எனது வருத்தம். ஆனாலும் தமிழீழ தேர்தலில் உங்களுக்கு வாக்களித்தவன் என்ற முறையில் ஒரு திறந்த மடல்.

உங்கள் ஓய்வூதியம் மாவீரர் குடும்பத்துக்கு அளிப்பது பற்றி அறிந்தேன். மிக்க மகிழ்ச்சி !. உங்கள் பணம் அல்ல மனம் இங்கே முக்கியமாக தெரிகிறது ! ஆனால் இது வெறுமனே இலங்கையில் செய்யும் அரசியலாக மாற கூடாது . உங்கள் ஓய்வூதியம் இங்கிலாந்தில் ஒருவருட அடிப்படை சம்பளத்தின் சிறு பகுதியாகத்தான் இருக்க முடியும் என்பது எனது கணிப்பீடு. இங்கேதான் நான் கூறுகிறேன் , இது அரசியல் பேச்சாக இருக்க வேண்டாம்.

நீங்கள் உண்மையில் எங்கள் மக்களுக்கு பல விதங்களில் உதவலாம். தமிழீழ அரசை நிர்மாணிக்கும் போது என்னை போன்ற சாதாரண மக்கள் எவ்வளவு மகிழ்வடைந்தோம் ! தமிழர் போராட்டங்களில் மேடைகளில் முழங்கிய நீங்கள் தமிழீழத்துக்கு செல்ல முடியாமல் போக (ஆனால் அதே மேடைகளில் முழங்கிய சிவாஜிலிங்கம் , பத்மினி …என பலர் இப்போதும் தாய் மண்ணில்தான் இருகின்றனர் என்பதையும் நினைவில் கொள்வோம் !) உங்கள் குரல் எங்களுக்கு வேண்டும் என்பதற்காக வாக்களித்து உங்களை தமிழீழ அரசில் இணைத்தோம்.

நீங்கள் தாய் மண்ணிற்கு செல்லமுடியாமல் போனது பற்றி கணிப்பீடுகள் பல இருந்தாலும் அது உயிர் சம்பந்த பட்ட விடயம் என்பதால் கருத்து கூற முடியவில்லை. ஆனால் தமிழீழ அரசின் அமர்வுக்கு போக முடியாமல் போக, காரணங்களாக நாங்கள் நினைப்பது , போட்டி, பொறாமை , அல்லது பதவி ஆசை என்பது மட்டுமே . உருத்திரகுமாரன் ஒருமுதல் அரசின் முன்னோடி மட்டுமே. நாங்கள் அவரையும் பார்த்து கொண்டுதான் இருக்கிறோம் ! உங்கள் கதைகளையும் கேட்டு கொண்டுதான் இருக்கிறோம் !

உங்களோடு இயங்கும் அந்த கூட்டம், பிரித்தானிய தமிழ் மன்றம் என்ற ஒரு இல்லாத அமைப்பின் பேரில் விட்ட அந்த போஸ்டர்கள் இன்னமும் கையில் உள்ளது . உருத்திரகுமாரன் முன்னெடுத்த முயற்சியில் இணைய மாட்டேன் என்று அறிக்கை விட்டு ஒதுங்கி இருந்தால் நிச்சயம் அதை பற்றி கருத்து கூறி இருக்க மாட்டேன். போட்டியிடுவது போல நடித்து, உள்ளே நுழைந்த பின் தமிழீழ அரசை பால் பொங்கி வரும் போது பானையை உடைக்கும் முயற்சியில் நீங்களும் உங்கள் பின்னால் இருப்பவரும் செயற்பட்டது ஒரு கோழைத்தனமே !

உங்களுக்கு மாவீரர் குடும்பங்களுக்கு உதவி செய்யும் நிஜ எண்ணம் இருந்தால் , தமிழீழ அரசில் ஒரு அமைச்சை பொறுப்பெடுத்தோ அலது தமிழீழ அரசின் மாவீர குடும்ப அலுவல்களுக்கான அமைச்சரூடாக செய்வதுதானே சரி ? இது எப்படி உங்களுக்கு நாங்கள் காசு தருவது ? நீங்கள் யார் ?

சிறிதரன் எம் பி, ஒரு நாடாளுமன்ற உறுபினராக செய்கிறார். நீங்கள் தமிழீழ நாடாளுமன்ற உறுப்பினராகவோ அமைச்சராகவோ செய்யக்கூடிய ஒரு விடயத்தை தனிப்பட்ட முறையில் செய்வதும் , உங்கள் “ஓய்வூதியத்தை அளித்தேன் ” என்ற அரசியல் வசனமும் உங்கள் மேல் எனக்கு நம்பிக்கையை தரவில்லை . இலங்கை அரசியலுக்கே பழக்கப்பட்டு போன ஒரு தலைமுறையின் இணையதளங்கள் உங்கள் வாக்கை பெரிதாக போட்டு ஏதோ பெரிய அலுவல் செய்துவிட்டார் என நம்பவைக்கலாம் ! நாங்கள் நம்ப மாட்டோம் !

உங்கள் ஓய்வூதியத்தை நீங்கள் கொடுத்துவிட்டு என்ன பட்டினி கிடக்க போகிறீர்களா ? இல்லையே ! தனக்கு பின் தானே தானம் ?இங்கிலாந்தில் வாழும் உங்களுக்கு உங்கள் நாளாந்த செலவுடன் ஒப்பிடும் பொது உங்கள் ஓய்வூதியம் ஒரு பெரிய விடயமே அல்ல என்பது எனக்கும் பலருக்கும் தெரிந்த ஒரு விடயம்.

இங்கே மக்கள் பலர் எமது மக்களுக்கு உதவ தனிப்பட்ட முறையிலும் பல்லாயிரம் அமைப்புகள் ஊடாகவும் செய்து வருகின்றனர். தனிப்பட்ட நபரை விட அமைப்பை மக்கள் நம்புவது ஏன் என்பது வெளிப்படை . தினமும் அங்கே செய்கிறோம் இங்கே செய்கிறோம் என்று பல அழைப்புகள் வருகின்றன. அதனால் நீங்கள் மட்டும் ஏதும் புதிய முயற்சி செய்வதாக தோன்றவில்லை .

ஆனால் நீங்கள் , மனம் திருந்தி , தமிழீழ அரசின் கீழ் இணைந்து ஒரு பாராளுமன்ற உறுபினராக தமிழீழ அரசின் அமைச்சர் ஊடாக இந்த முயற்சியை செய்து இருந்தால் அது பெரிய மாற்றத்தை தரும் . இதை செய்தியாக ஒரு இணையத்தளம் போட்டால் அது அந்த இணைய தளத்தின் நல்லெண்ணத்தை வெளிகாட்டும் ! இங்கே உங்கள் ஓய்வூதியம் போல ஆயிரம் மடங்கு பணம் மாதம் தோறும் சேர கூடும் ! இதற்காகத்தான் மக்கள் உங்கள் எல்லோரையும் முதலில் தமிழீழ அரசாக ஒன்றாக நின்று , முதல் அடியை , சட்ட வல்லுநர் உருதிரகுமாரனின் வழிகாட்டலில் வையுங்கள் என வாகளிதோம் !

உங்களோடு நான் வாக்களித்த , டெல் மொரிஸ் , கருணாகரன் , பாலாம்பிகை முருகதாஸ் போன்றோர் இன்று நாங்கள் வைத்த நம்பிக்கைக்கு ஏற்ற மாதிரி முன்னெடுக்கிறார்கள் . உங்களை போல சிலர் , முகம் தெரியாமல் ஓடி ஒளித்த சில புலம் பெயர் தலைவர்களின் பொம்மைகளாக , என்றைக்கும் ஒரு பகிஸ்கரிக்கும் நபராக , இன்று எமக்கு தெரியும் பொது என்ன நம்பிக்கையில் உங்களுக்கு பணம் அனுப்புவது ?

நீங்கள் பிரித்தானிய தமிழர் ஒன்றியத்தின் பேரில் பணம் கேட்கிறீர்களா ? தமிழீழ அரசின் பேரில் பணம் கேட்கிறீர்களா ? இலங்கை முன்னாள் நாடாளுமன்ற உறுப்பினர் என்ற ரீதியில் பணம் கேட்கிறீர்களா ? இல்லை தனி மனிதராக கேட்கிறீர்களா ! தனி மனிதராக நீங்கள் செய்வதற்கு உங்களை ஆதரிப்போர் பணம் தரக்கூடும் , ஆனால் நீங்கள் தமிழீழ அரசின் ஊடாக செய்ய மறுபதனால் உங்கள் முயற்சியை மீண்டும் இலங்கையில் வழமையாக செய்யும் ஒரு அரசியல் முயற்சி ஆகவே பார்கிறேன் . உங்கள் சரிந்து போன விம்பத்தை நிலை நிறுத்தும் ஒரு முயற்சியாக பார்கிறேன். தவறு என்றால் மன்னிக்கவும். இப்படிதானே கருணாநிதியும் பல தடவை உண்ணாவிரதம் இருந்தும் தன சம்பளத்தை கொடுத்ததும் இருக்கிறார் ?

ஒரு தலைமைத்துவம் நிறைந்தவன் தவறுகளை உணரவேண்டும் ! மனம் மாறி , தமிழீழ அரசில் இணைந்து , தமிழீழ அரசின் அமைச்சறூடாக உங்கள் முயற்சியை தொடரவேண்டும் .

நீங்கள் பகிஷ்கரித்தாலும் , தமிழீழ அரசு வீறு நடை போடும் ! அங்கே தமிழீழ அரசின் சில்லுகள் வேகமாக உருள தொடங்கும் பொது , புகையிரதத்தை தொலைத்து நிற்கும் பயணியாக நீங்கள் தனித்து விட பட கூடும் !

நீங்கள் மனம் திருந்தி எங்கள் ரத்தத்தில் அரசியல் செய்வதை நிறுத்தி , ஒற்றுமைக்கு வித்திட மறுத்தால் , இந்த தேர்தலில் உங்களை ஆதரித்து வாக்களித்த நான் , அடுத்த தேர்தலில் உங்களை எதிர்த்து பிரசாரம் செய்வேன் . அந்த நிலைக்கு புலம் பெயர் இளையோரை தள்ளவேண்டாம் !

வார்த்தைகளும் வெறும் பரிசுகளும் எங்களுக்கு வேண்டாம் ! பணம் இங்கே ஏராளமாகவே உண்டு. எங்களுக்கு வேண்டும் ஒற்றுமை ! சகலரும் தமிழீழ அரசை வளர்த்தெடுக்க வேண்டும். உருத்திரகுமாரன் பிடிக்கவில்லை என்றால் அடுத்த தேர்தல் வரை பொறுத்திருங்கள் , ஆனால் அடுத்த தேர்தலுக்கு இடையில் நீங்கள் அரசியல் அரங்கில் இருந்து மறைந்து விடுவீர்கள் போல அல்லவா உள்ளது !

மாவீரர் குடும்பங்களுக்கு உதவும் அதே நேரம் எங்கள் மாவீரர் விட்டு சென்ற கனவை அடைய தமிழீழ அரசின் பயணம் தொடரும் !

(ஒரு புலிதாசனின் ஈனக்குரல்)