பகுத்தறிவாளர் ஆப்ரஹாம் கோவூர்

நண்பர் ஒருவர், காலம் சென்ற பகுத்தறிவாளர் ஆப்ரஹாம் கோவூர் பற்றி எழுதியிருந்ததை இன்று படித்தேன் . இதைப்படித்ததும் , பழைய ஞாபகம் ஒன்று வருகின்றது, 1976ம் ஆண்டு ஆரம்பப் பகுதியில் நடந்த சம்பவம் இது. யாழ் .பலாலி வீதியில் இருக்கும், தோழர் ஹென்ஸ் மோகன் வீட்டுக்கு இயக்க அலுவலாக நானும் இன்னும் சிலரும் சென்றிருந்தோம். நாம் சென்றிருந்த சமயம் பகுத்தறிவாளர் ஆப்ரஹாம் கோவூர் அவர்களின் நிகழ்ச்சியொன்று அங்குள்ள சன்மார்க்க சனசமூகநிலையத்தில் நடைபெற்றுக்கொண்டிருந்தது. கோவூர் பற்றி நிறையக் கேள்விப்பட்டும் ,அவர் எழுதிய மூட நம்பிக்கைகளுக்கு எதிரான பல உண்மைச் சம்பவங்களின் தொகுப்புக்களையும் ஏற்கனவே படித்தும் இருந்ததால் ,அவரை நேரில் பார்க்க நாமும் அங்கு சென்றோம். அப்போது கோவூர் அவர்கள் ஆங்கிலத்தில் பேசுவதைத் தமிழில் ஒருவர் மொழி பெயர்த்துக் கொண்டிருந்தார்.

மொழிபெயர்ப்ப்பாளர் மொழி பெயர்க்கும் போது பலதடவை குறுக்கிட்டுச் சரியான தமிழில் பிழை திருத்திச் சொன்னார் கோவூர். "நான் ஒரு மலையாளியாக இருந்த போதிலும், ,எனக்குத் தமிழ் நன்றாகத் தெரியும் . ஆனால் கூட்டங்களில் தமிழைச் சரளமாகப் பேசமுடியாது" என்பதையும் அங்கு குறிப்பிட்டார். அவர் பேசிக்கொண்டிருக்கும் போது ,குடிவெறியில் இருந்த ஒருவர் ,"சாயி பாபா போல வாயிலிருந்து லிங்கம் எடுக்க முடியுமா? திருநீறு எடுத்துத் தர முடியுமா? பூ எடுத்துத் தர முடியுமா?  என்றெல்லாம் கேட்டுக்கொண்டே இருந்தார்

கோவூர் உடனுக்குடன் எல்லாம் எடுத்துக் கொடுத்தார் ,,பின்னர் ,அதை எப்படி எடுத்தார் என்பதையும் விளக்கிக் காட்டினார், நீண்ட கைச் சட்டை போட்டிருந்த அவர் ,சட்டையின் நுனிப்பகுதியில் இருந்து சுருக்குப்பை போன்றிருந்த உள் அமைப்பையும் இழுத்துக் காட்டினார், அதை எப்படி மற்றவர்களுக்குத் தெரியாமல் நாடாவை இழுத்துத் திருநீறு போன்றவற்றை வரச் செய்வதையும் ,வாயிலிருந்து லிங்கம் எடுப்பதையும் சிரிப்பலைகள் மத்தியில் தெளிவாகப் புரிய வைத்தார்.

கோவூர் போன்றவர்கள் தலை குத்தி நின்று உண்மையை எடுத்தியம்பினும் சாயிபாபா போன்றோரை நம்பிப் பின்னே செல்லும் பகுத்தறிவற்ற கூட்டம் இன்னும் ஏமாந்து கொண்டுதான் இருக்கின்றது. .மக்களை ஏமாற்றுவதில் ருசி கண்ட , கள்ளச் சாமியார்களும் மலிந்து செல்வத்தில் புரள்கின்றனர், செல்வத்தில் மட்டுமா புரள்கின்றனர்.....?????

(இதே மாதிரியான அனுபவம் எனக்கும் இதேகாலப்பகுதியில் அச்சுவேலிச் சந்தியில் ஏற்பட்டது. அப்போது எல்லாம் நான் உன் தந்தை வழியில் கடவுள் நம்பிக்கை மிகுந்த ஒருவனான திகழ்ந்த காலகட்டம். எனது நண்பன் முற்று முழுதாக கடவுள் நம்பிக்கையற்றவன். அவனின் வற்புறுத்தலால் இந்நிகழ்வைப் பார்க்கச் சென்றேன். அவனித் தூண்டுதலினால் சீனாவின் சஞ்சிகைககள்இ சோவியத் யூனியனின் புத்தகங்கள் மாக்சிச லெனினிச புத்தகங்கள் என்று வாசிக்கத் தொடங்கினேன். இதுவேஎன்னை இன்று வரை ஒரு கம்யூனிட்ஸ்டாக வாழவைத்துள்ளது, போராட வைத்தது. எனது நண்பன் தற்போது தீவிர கடவுள் பக்தன் - சாகரன்)

(புஷ்பராணி)