ஈழத்தமிழர்களை கொன்றுகுவித்த போர்த் தளபதி பொன்சேகாவுக்கு கனேடிய தமிழ் காங்கிரஸ் ஆதரவு

(தி. வண்ணமதி)

தமிழருக்கு எதிரான போரை முன்நின்று நடாத்தியவர் முன்னாள் சிறிலங்கா இராணுவத்தளபதி சரத் பொன்சேகா. தமிழருக்கு எதிரான போரை முன்னெடுத்தவர்கள் வரிசையில் சிறிலங்காவின் தற்போதய அதிபர் மகிந்த ராஜபக்சவைவிட பொன்சேகவுக்கு அதிகமானதும், காத்திரமானதும் பங்கு உண்டு. இவர் முன்னர் ஒருகாலத்தில் யாழ்ப்பாணமாவட்டத்தில் தளபதியாக பணியாற்றியவர். இவர் தளபதியாக இருந்த காலத்தில் பல இளைஞர், யுவதிகள் சிறிலங்கா படையினரால் கைது செய்யப்பட்டு காணாமல் போயினர்.

இன்று, அனோமா பொன்சேகா வடிக்கும் இதே கண்ணீரை யாழ்ப்பாணத் தமிழ் தாய்மாரும், தம் கணவன்மாரை படையினரிடம் பிடிகொடுத்த துணைவிமாரும் ஏற்கனவே வடித்தனர். இப்பாடிப்பட்ட சரத் பொன்செகாவுக்கு கடந்த அதிபர் தேர்தலில் 4 மில்லியன் மக்கள் வாக்களித்திருந்தனர். மகிந்தவின் பிடியிலிருந்து சிறிலங்காவுக்கு விடிவு கிட்டட்டும் என வாக்களித்த தமிழர்கள், முஸ்லிம்கள் போக, ஏனைய சிங்கள இனவாதிகளின் வாக்குகள் ஏன் வழங்கப்பட்டன தெரியுமா? போரில் இரக்கமின்றி ஆயிரக்கணக்கான தமிழர்களை குழந்தைகள், பெண்கள், முதியவர்கள் என்ற பேதமின்றி கொன்று குவித்த கொலைவீரன் என்பதால் தான்.

இப்படிப்பட்ட சரத் பொன்சேகாவுக்காக கனேடியத் தமிழ் காங்கிரஸ் ஆதரவளிக்கிறது. இதில் 'கனடிய தமிழ் காங்கிரஸ் ஏன் ஆதரவளிக்கின்றது என விளக்கமளிக்கிறார் அதன் பேச்சாளர் டேவிட் பூபாலப்பிள்ளை, இது தொடர்பாக ’யாகூ நியூஸ்’[yahoo news.] இணையத்தளம் செய்தி வெளியிட்டுள்ளது.

அந்த செய்தியில் தெரிவிக்கப்பட்டுள்ளதாவது, கடந்த வாரம் 30 மாதகாலக் கடூழியச் சிறைத் தண்டனை வழங்கப்பட்டிருக்கும் சிறிலங்காவினது முன்னாள் இராணுவத் தளபதியும் போரின் போது தமிழர்களுக்கு எதிரான அடக்குமுறையினைக் கட்டவிழ்த்துவிட்டவருமான சரத் பொன்சேகாவிற்குத் தங்களது ஆதரவினை வழங்கி நிற்கும் கனேடியத் தமிழர்கள் முன்னாள் இராணுவத் தளபதியினை ராஜபக்ச அரசாங்கம் மோசமாக நடாத்துவதைக் கண்டித்திருக்கிறார்கள்.

"இராணுவ ஜெனராலாகப் பொன்சேகா இருந்தபோது அவருக்கும் தமிழர்களுக்குமிடையில் பிரச்சினைகள் நிலவியது என்னவோ உண்மைதான். ஆனால் தற்போது அவர் ஒரு அரசியலாளன் என்ற வகையில் பொன்சேகாவிற்கும் எங்களுக்குமிடையில் எந்தப் பிரச்சினையுமில்லை என கனேடியத் தமிழ் காங்கிரசினது தேசிய பேச்சாளர் டேவிட் பூபாலப்பிள்ளை கூறுகிறார்.

அவர் மேலும் தெரிவிக்கையில், சிறிலங்காவினது அதிபர் ராஜபக்சவினதும் நாட்டினை ஆண்டுவரும் ராஜபக்ச குடும்பத்தினதும் பணிப்புக்கமைய பொன்சேகாவிற்கு அநீதி இழைக்கப்பட்டு அவர் சிறையிலிடப்பட்டிருக்கிறார். 

முன்னாள் இராணுவத் தளபதி இவ்வாறு இழிவாக நடாத்தப்படும் முறையானது, தமிழர்கள் உள்ளிட்ட தனது அரசியல் எதிராளிகளை தற்போதைய கொடுங்கோல் அரசாங்கம் எவ்வாறு நடாத்துகிறது என்பதை தெளிவாகக் காட்டுகிறது. சிறிலங்காவினது சிறைகளில் வாடும் ஆயிரக்கணக்கான தமிழர்களுக்காக மாத்திரமல்லாமலாது பொன்சேகாவின் விடுதலைக்காகவும் புலம்பெயர் தமிழர்களாகிய நாங்கள் போராடுவோம்.

கொழும்பு ஆட்சியாளர்களுக்கெதிராக கடுமையான நடவடிக்கைகளை எடுக்கும் வகையில் புலம்பெயர் தமிழர்கள் பொருத்தமான சர்வதேசக் கட்டமைப்புகளிடம் இந்த விடயத்தினை எடுத்துச் செல்கிறார்கள்.

உழுத்துப்போனதோர் ராஜபக்ச இராச்சியத்திற்குள் சிறிலங்கா சென்றுவிட்டது. இந்த இராச்சியம் உருவாவதற்கு வாக்களித்த தென்பகுதிச் சிங்களவர்கள் நிலைமையினைப் புரிந்துகொண்டு விழித்தெழாவிட்டால் ராஜபக்சக்களின் இராச்சியத்திலிருந்து இலங்கைத் தீவினை எவராலும் மீட்கமுடியாது.

பொன்சேகாவினைச் சிறையில் அடைத்ததன் மூலம், கடந்த சனவரியில் இடம்பெற்ற குடியரசு அதிபர் தேர்தலில் ராஜபக்சவிற்கு ஆதரவாக வாக்களித்த நான்கு மில்லியன் மக்களை மகிந்த அரசாங்கம் அவமதித்திருக்கிறது.

மனித உரிமைகள் மற்றும் சனநாயகப் பண்புகள் தொடர்பில் ஆளும் மகிந்த அரசாங்கம் எள்ளளவும் கவலைகொள்ளவில்லை என்பதையே இது காட்டுகிறது. சர்வதேசம் கடுமையாக எதிர்த்துநிற்கும் கொடுங்கோலாட்சியின் பிடியில் சிறிலங்கா சிக்கித் தவிக்கிறது.

இதேவேளை, மே 2009இல் போர் முடிவுக்கு வந்ததைத் தொடர்ந்து விடுதலைப் புலிகளமைப்புக்கு எதிரான போரைத் தலைமையேற்று நடாத்திய முன்னாள் இராணுவத் தளபதி பொன்சேகாவிற்கும் அதிபர் ராஜபக்சவிற்கும் இடையிலான உறவில் விரிசல் ஏற்பட கடந்த சனவரியில் இடம்பெற்ற குடியரசு அதிபர் தேர்தலில் பொன்சேகா ராஜபக்சவினை எதிர்த்துக் களமிறங்கினார்.

ஆனால், அதிபர் தேர்தல் முடிவுக்கு வந்த கையோடு கைதுசெய்யப்பட்டுத் தடுப்பில் வைக்கப்பட்டிருந்த பொன்சேகாவினது பட்டிகள், பதக்கங்கள் அனைத்தையும் கடந்த மாதம் இராணுவ நீதிமன்றம் பறித்திருந்தது. தற்போது இராணுவ நீதிமன்றினால் மூன்று ஆண்டுகாலக் கடூழியச் சிறைத்தண்டனை வழங்கப்பட்டிருக்கும் தளபதி பொன்சேகா சிறையில் அடைக்கப்பட்டிருக்கிறார்.