சிறையில் ஜெயலலிதா...

செயலிழந்த தலைமைச் செயலகம்!

வருமானததிற்கு அதிகமாக 66 கோடி ருபாய் சொத்துக்குவித்ததாக தொடரப்பட்ட வழக்கில் 4 ஆண்டுகள் சிறைத்தண்டனையும் 100 கோடி ருபாய் அபாரதமும் விதிக்கப்பட்டிருக்கிறார் ஜெயலலிதா. அவர் சிறையிலடைக்கப்பட்டு இன்றோடு  10 நாட்களுக்கும் மேலாகிவிட்டது. தீர்ப்பு நாளன்று  ஒரு முதல்வராக நீதிமன்றத்திற்குள் நுழைந்த அவரது காரிலிருந்து, தீர்ப்புக்குப் பின்னர்  சைரன் கழற்றப்பட்டபோதே காரின் பளபளப்போடு சேர்ந்து தமிழக நிர்வாகத்தின் பளபளப்பும் மங்கிவிட்டது எனலாம். அதீத தன்னம்பிக்கை, துணிச்சல் என தன் தனிப்பட்ட குணங்களுக்காக, இந்திய அரசியல் பெரும் புள்ளிகளை  தமிழகத்தை நோக்கி எட்டிப்பார்க்க வைத்த ஜெயலலிதாவின் இந்தப் பண்புகளே, அவருக்கு விலாசம் தந்த தமிழகத்தி்ன் நிர்வாகம் முடங்கி கிடக்க முக்கிய காரணமாகவிட்டது. 

பதவி என்ற ஒற்றை மோகம், ஜெயலலிதாவின் ஆழ்ந்த அரசியல் அறிவு, எதையும் சந்திக்கும் போர்க்குணம், பெண் எனும் பலகீனத்தை புறந்தள்ளி தமக்கு முந்தைய தலைமுறையின் மூத்த அரசியல்வாதியோடு 30 ஆண்டுகளாக மல்லுக்கட்டும் திறமை போன்ற அரிதான அரசியல் சாமர்த்தியங்களெல்லாம், பின்னுக்குத் தள்ளப்பட்டு, இந்திய அளவில் தமிழகத்தின் மீது ஒரு ஏளனப்பார்வையையும், நிர்வாக முடக்கத்தையும் ஒரு சேர உருவாக்கிவிட்டிருக்கிறது இப்போது.
 
தனி மனுஷியாக, வழக்கிலிருந்து தான் விடுவிக்கப்படுவோம் என அவர் நினைத்தது அவரது நம்பிக்கை.  அதையே ஒரு மாநிலத்தின் முதல்வராக அவர் கருதியதுதான் அவரது சறுக்கல். மாநில முதல்வராக அவர் நீதிமன்றத்தில் தண்டனை பெற்றது இந்திய அரசியலமைப்பின் மீது தெறித்த கறை என்றால், தண்டனைக்குப் பிறகு தனக்கு நேரும் சம்பிரதாயங்களைக் கருதி முன்னேற்பாடாக சாதாரண நடைமுறைகளைக்கூட நிர்வாக ரீதியாக மேற்கொள்ளாமல், பெங்களுருக்கு விமானம் ஏறியது ஜெயலலிதாவின் மீது தெறித்த கறை அல்ல; அவரை நம்பி வாக்களித்த மக்களின் மீது படிந்த கறை.

மூலவர் இடம்மாறிவிட்டதால் உற்சவர்கள் மக்கள் பணியில் உற்சாகமின்றி இருக்கிறார்கள். வெற்றி தோல்வி ஒரு மனித வாழ்வில் சகஜமான ஒன்று. அதில் நமக்காக  வாக்களித்தவர்களின் வாழ்வாதாரத்தை அடகு வைப்பது ஒரு தேர்ந்த அரசியல்வாதிக்கு, குறிப்பாக அந்த மக்களின் நம்பிக்கையைப் பெற்று பதவிக்கு வரும் ஒருவருக்கு அழகா? என்பது மக்கள் ஒவ்வொருவரும்  கேட்க விரும்பும் கேள்வி.

துரதிர்ஷ்டவசமாக இப்போது அதைக் கேட்கும் ஆரோக்கியமான சூழல் இப்போது நிலவவில்லை. தம் அனுபவத்தின் பலனாக, தமக்கு ஏதேனும் தண்டனை வழங்கப்பட்டால் நிர்வாகத்தை செலுத்த வேண்டிய பாதை, பொறுப்புகள், திட்டங்களின் செய்ல்பாடுகள் என முக்கிய விஷயங்களில் அவர் தெளிவான முடிவுகளோடு மாற்று ஏற்பாடுகளை செய்திருக்கலாம். அப்படி செய்திருந்தால் தண்டனை பெற்ற பின்னரும் மக்களின் மனதில் கொலு வீற்றிருந்திருந்திருப்பார் ஜெயலலிதா. ஆனால் ... பதவி ஆசை யாரை விட்டது?

கடந்த 10 நாட்களாக தலைமைச்செயலகம் வெறிச்சோடி காணப்படுகிறது. மக்கள் பிரதிநிதிகள் மக்கள் பற்றிய கவலைகளை ஒதுக்கிவிட்டு, ஜெயலலிதா பற்றிய கவலையில் மூழ்கியுள்ளனர். பாதிக்கும் மேற்பட்ட அமைச்சர்கள் தங்கள் தொகுதியில் அறப்போராட்டங்கள் நடத்தி தங்கள் இருப்பை காத்துக்கொள்ள சுற்றிச் சுழன்று பணியாற்றிவருகின்றனர். மீதமுள்ள அமைச்சர்களோ தமிழக - கர்நாடக எல்லையில் ஜெயலலிதாவை எதிர்நோக்கி காத்துக்கிடக்கின்றனர். இது ஒருபுறமருக்க 10 நாட்களாகியும் இன்னமும் மக்களுக்கு தெருக்களில் கைவீசி நடக்கிற துணிச்சல் வரவில்லை. பயம் அப்படியே தொடர்கிறது.

கைதுக்குப் பின் தமிழகத்தில் நிலவும் அசாதாரண சம்பவங்களின் மீது அமைச்சர்களுக்கு அக்கறை இல்லை.  அதிகாரிகளோ அல்லது அசாதாரண சூழல்களில் முடிவெடுக்க வேண்டிய கவர்னரோ வேடிக்கை பார்ப்பதோடு தங்கள் கடமையை முடித்துக்கொள்கின்றனர்.'ஆட்டுக்குத் தாடியும், நாட்டுககு கவர்னரும் தேவையா?" எனக் கேட்டார் அண்ணா. இம்மாதிரி சூழல்களில் அதற்கான விடை இருக்கிறது. பட்ட காலிலே படும் என்பதுபோல இங்கும் தமிழகத்தின் ராசி வெளிப்பட்டது. பதவிப்பிரமாணம் என்ற ஜனநாயக கடமையை மட்டும் ஆற்றி தம் பதவியின் மாண்பை காப்பாற்றிக்கொண்டுவிட்டார் அவர்.

தவிர்க்க முடியாத அம்சமாக புதிய அமைச்சரவை, கவர்னர் மாளிகையில் பதவியேற்ற மறுதினம் சம்பிரதாயமாக கோட்டைக்கு வந்தனர் அமைச்சர்கள். அவரவர்கள் அறைக்கு சென்றவர்கள் அடுத்த அரை மணி நேரத்தில் தங்கள் அடுத்த வேலையைப் பார்க்க கிளம்பிவிட்டனர். மக்கள் தரும் மனுக்களை இப்போதெல்லாம் மந்திரிகளின் உதவியாளர்கள்கூட வாங்க விரும்பவில்லை. முதல்வர் ஓ.பன்னீர் செல்வம்  முதல்வருக்கான பிரத்யேக அறைக்கு செல்லக்கூட துணிவின்றி  தன் பழைய அறையிலேயே சில பணிகளை பார்த்த கையோடு, சில   மந்திரிகளோடு  பெங்களுருக்குப் புறப்பட்டார்.

முதல்வர் பொறுப்பேற்றதில் இருந்து அவருக்கு இருந்த படபடப்பு, அம்மாவைச் சென்று பார்த்துவிடுவது என்பதுதான். மக்களுக்கான திட்டங்கள் பற்றியோ அதன் செயல்பாடுகள் குறித்தோ அவரது கவலை வெளிப்படவி்ல்லை. பெங்களுருக்கு டிக்கட் கன்ஃபார்ம் ஆகிவிட்டதா என்பதுதான் அவரது அப்போதைய கவலை.  

ஒரு நாட்டின் உச்சபட்ச அதிகாரம் கொண்ட அமைப்பான நீதிமன்றத்தையும், நீதிபதிகளையும் பொது இடங்களில் வட்டங்களும், ஒன்றியங்களும் மேடை போட்டு வறுத்தெடுக்கிறார்கள். நீதிமன்றத்தை விமர்சிப்பது, வழக்கு தொடுக்கும் அபாயமுள்ள குற்றம் என்பது அக்கட்சியின் வழக்கறிஞர் அணிக்குக்கூட இப்போது நினைவுக்கு வராமல் போனது ஆச்சரியமா அல்லது ஆச்சரியமில்லையா எனச்சொல்லத்தெரியவில்லை. தங்கள் கட்சி தொலைக்காட்சிகளில் இந்த போராட்டங்கள் பற்றிய செய்திகளில் “தாங்களே முன்வந்து“ என்ற வார்த்தையை பாதுகாப்பாக பயன்படுதக்ச் சொன்னதே இவர்களின் அதிகபட்ச சட்ட அறிவுரை. 

அறப்போராட்டங்கள் நடத்துவது ஆளும் கட்சி என்பதால் கைகட்டி நிற்கவேண்டிய நிலை காவல்துறையினருககு. மக்களின் வரிப்பணத்தில் ஊதியம் பெறும் அவர்கள்,கடந்த கால ஆட்சியாளர்களால்  அப்படி பழகிவிட்டது தமிழகத்தின் துரதிர்ஷ்டம்.  நிலைமை எல்லைமீறி போகிற இம்மாதிரி தருணங்களில் சாட்டையை சுழற்றவேண்டியவர் கவர்னரோ, மறுநாள் தான் கலந்துகொள்ள வேண்டிய தனியார் விழாக்களின் பட்டியலை உதவியாளரிடம் வாசிக்கக் கேட்டு மகிழ்கிறார். காங்கிரஸால் நமக்கு இன்றும் தொடரும் துர்பாக்கியம் இது.  ஆட்டுக்குத் தாடியாக நாட்டுககு கவர்னரை உருவகப்படுத்திய அண்ணா நிச்சயம் ஒரு தீர்க்கதரிசிதான்.

ஒரு மாநில முதல்வர் கடந்த 10 தினங்களில் 2 வாழ்த்து அறிக்கைகளை வெளியியிட்டு, ஒரு மாலை அணிவிப்பு நிகழ்சசியில் மட்டுமே கலந்துகொண்டு சாதனை படைத்திருக்கிறார். கோட்டையில் பலா இல்லை. அதனால் ஈக்களும் இல்லை. அதிகாரிகளின் நிலை சொல்ல வேண்டியதில்லை. சாட்டை சுழன்ற இடத்தில்  சர்க்கரை டப்பா இருக்கிறது. அள்ளித்தின்னும் அதிர்ஷ்டம் அவர்களுக்கு.

ஒரு அரசு இயந்திரம் முடங்குவது என்பது ஜனநாயத்தின் வேரில் வெந்நீர் ஊற்றுகிற ஒரு ஆபத்தான விஷயம். மக்களின் அடிப்படை தேவைகள் தடுக்கப்பட்டு பெரும் சிக்கல்களுக்கு அது வழிவகுக்கும். மக்களின் வாக்குகளால் அதிகாரங்களை கைப்பற்றும் மக்கள் பிரதிநிதிகள், தாங்கள் ஆற்றவேண்டிய பணிகளில் சுணக்கம் காட்டினால் அது மக்களுக்கு செய்யும் துரோகம் மட்டுமல்ல; இந்திய அரசமைப்பு சட்டத்தின் உறுதிமொழிகளின்படி பதவி ஏற்ற அவர்கள், அந்த அரசமைப்புக்கு ஏற்படுத்தும் அவமானமும் கூட.

சாதாரண ஒன்றியங்களாகவும், வட்டங்களாகவும் டி.வி.எஸ். 50-களில் கட்சிப் பணியாற்றிய தங்களை சைரன் காரில் உலா வரச்செய்த இன்ப அதிர்ச்சியிலிருந்து இன்னும் மீளாமல் இருக்கிறார்கள் மந்திரிகளும் மற்ற பிரதிநிதிகளும்.  இந்த வாழ்க்கையைத் தந்த தங்கள் தலைவிக்கு இந்த தருணத்தில் தங்களது விசுவாசத்தைக் காட்டுவதைக் காட்டிலும், மக்கள் பணியாற்ற அவர்கள் என்ன விவரம் தெரியாதவர்களா ?

ஜெயலலிதாவின் ஜாமீன் மனு இன்று விசாரணைக்கு வருவதையொட்டி அவர், எப்படியும் ஜாமீனில் விடுதலையாகிவிடுவார்; 'அம்மா' வரும்போது அவரது பார்வையில் பட்டு தனது விசுவாசத்தை காண்பிக்க வேண்டும் என்ற எண்ணத்தில் பெங்களூரு அக்ரஹாரா நீதிமன்றத்திற்கே படையெடுக்கத் திட்டமிட்டிருந்தனர் அமைச்சர் பெருமக்கள்.

ஆனால் "அநாவசியமாக இங்கே வந்து கூட்டம் போட்டுக்கொண்டிருக்காதீர்கள்..போய் பணிகளை கவனியுங்கள்!"என ஜெயலலிதா நேற்று அமைச்சர்களுக்கு விடுத்த டோஸ் காரணமாக அவர்கள்  அங்கே செல்லவில்லை. இருப்பினும் ஜாமீன் கிடைத்து ஜெயலலிதா வரும்போது அவரது பார்வையில் படாமல் இருந்துவிடக் கூடாது என்பதற்காக ஓசூர், வேலூர் என கர்நாடக எல்லையையொட்டிய பகுதிகளில் உள்ள பங்களாக்களில் தங்கியிருந்த  நிலையில், ஜெயலலிதாவுக்கு ஜாமீன் மறுக்கப்பட்டுவிட்ட தகவல் அவர்களுக்கு அதிர்ச்சியை அளித்துள்ளது.

இதன் பின்னராவது கோட்டைக்குத் திரும்பி தத்தமது அமைச்சகப் பணிகளைக் கவனிப்பார்களா என்றால் அதற்கான அறிகுறிகளே தென்படவில்லை.

 -எஸ். கிருபாகரன்