ஓமந்தை வேதனைச் சாவடி

புலிகள் அழிக்கப்பட முன் கொழும்பு யாழ்ப்பாணம் பிரயாணம் எவ்வளவு கஸ்டமானதாக இருந்தது. கொழும்பு செல்வோர் கோண்டாவிலுக்குச் சென்று புலிகளின் நந்தவனத்தில் பாஸ் எடுக்கவேண்டும். முகமாலையில் இராணுவத்தினதும் புலிகளினதும் சோதனைச் சாவடியில் இறங்கி ஏறவேண்டும். பின்னர் புலியங்குலத்தில் புலிகளின் சோதனைச் சாவடி, பிறகு ஓமந்தையில் இராணுவத்தின் சோதனைச் சாவடி கொழும்பு செல்லும் வரையில் ஆங்காங்கே இராணுவத்தின் சொதனைச் சாவடிகளைக் கடந்து கொழும்பு சென்று திரும்பும்போது அதே கதைதான் ஓமந்தையில் இராணுவத்தின் சோதனைச் சாவடியைக் கடந்தபின் புளியங்குளத்தில் புலிகளின் வேதனைச் சாவடி.

பல மணித்தியாலங்கள் புலிகளின் வேதனைச் சாவடியில் கழிக்க வேண்டிவரும். துருவி துருவிச் சோதனை நடைபெறும் இராணுவம் கூட அப்படிச் சோதனை செய்வதில்லை. கொண்டு செல்லும் பொருட்களின் விபரங்கள் பெறப்படும். போட்டோக்கள் வீடியோக்கள் வைத்திருப்பவர் பாடு அவ்வளவுதான். வீடியோக்கள் பரிசோதனையின் பின் கையளிக்கப்படும்.பொருட்களுக்கு வரி செலுத்த வேண்டும். வெளிநாடுகளிருந்து செல்வோர் 1000 ரூபாய் செலுத்த வேண்டும். அதைவிட ஒரு ரிக்கற் புத்தகத்தை நீட்டுவார்கள். நவம் அழிவுக்கூடமாம். அதுவும் இலங்கை ரூபாயில் அல்ல யூரோக்களில்.40 யூரோக்கள். மறுப்பதற்குப் பயத்தில் எல்லோரும் வாங்குவார்கள். கனடாவில் இருந்து செல்பவர்கள் அதற்குச் சமனான கனேடிய டொலர்களில் பணம் செலுத்த வேண்டும்.

எல்லாம் முடிந்து வெளிநாட்டுக் காரரை உள்ளே அழைப்பார்கள். நீங்கள் வழும் நாட்டில் பங்களிப்புச் செய்தீர்களா? அப்படிச் செய்தால் பின் இலக்கத்தைத் தாருங்கள் நாங்கள் அடிச்சுபார்த்திட்டுப் போகவிடுவம். இல்லாவிட்டால் ஒரு லட்சம் ரூபாய் நீங்கள் பங்களிப்பாகச் செலுத்த வேண்டும்.

என்னிடம் ஒரு லட்சம் ரூபாய் செலுத்தும்படி கேட்டார் சபேசன் என்ற அந்தப் புலி உத்தியோகத்தர். என்னிடம் பணம் இல்லை என்றேன். நான் வெளியே சென்று எனது மச்சானிடம் இவன் காசு கட்டச் சொல்லிக் கேட்கிறான் என்றேன். காசு கொடுக்க வேண்டாம் சமாளித்துவிட்டு வா என்றான் அவன். அவனும் உள்ளே வந்து அவரிடம் காசு இல்லை என்றான். அதற்கு சபேசன் என்ற அந்தப் புலி நீங்கள் வெளியில் நில்லுங்கள் நான் இவருடன் கதைத்து விட்டு அனுப்புகிறேன் என்றான். இறுதியில் 20.000 ரூபா கட்டுகிறேன். அதுவும் யாழ்ப்பாணம் போய்த்தான் என்னால் கட்ட முடியும் என்றேன். நீங்கள் திரும்ப வருவதற்கு கோண்டாவிலில் உள்ள நந்தவனத்தில் பாஸ் எடுக்க வேண்டும். அங்கே பணத்தைச் செலுத்தும்படி அந்தப் புலி சொன்னான். அது மட்டுமல்ல ஒரு விண்ணப்பப் படிவத்தைக் கொடுத்து என்னுடைய வங்கி கணக்கு விபரத்தை எழுதும்படி கேட்டான். மாதா மாதம் உங்கள் வங்கிக் கணக்கிலிருந்து தங்களுக்கு பணம் கிடைக்கும் என்றான். நான் மறுத்துவிட்டேன். வன்னியைக் கடந்து முகமாலையில் பாஸ் காட்டிவிட்டு யாழ்ப்பாணம் சென்று திரும்ப கனடா வந்துவிட்டேன். என்னைக் கோண்டாவில் சென்று பாஸ் எடுக்க வேண்டும் என்று சொன்ன அந்தப் புலிக்கு யாழ்ப்பாணத்தில் இருந்து கொழும்புக்கு விமானத்தில் செல்லலாம் என்பது தெரியாமல் போய்விட்டது.

இன்று புலிகள் அழிக்கப்பட்டதால் இந்த வேதனைச் சாவடிகள் பிரச்சனை இல்லை. யாழ்தேவி என்ற சீதேவியும் யாழ்ப்பாணம் வந்துவிட்டாள். கடந்த வருடம் இலங்கை சென்ற போது புளியங்குளத்தில் புலிகளின் வேதனைச் சாவடியைத் தேடினேன் காணவில்லை. எங்கே புலிகளின் வேதனைச் சாவடி என்று என்னோடு வந்தவரிடம் கேட்டேன். அதிலை இப்ப ரெயில் ஓடுது என்றார். தண்டாளங்கள் இருந்த இடத்தில்தான் புலிகளின் வேதனைச் சாவடி இருந்தது. ஆனால் புலிகள் இருந்த காலத்தில் தாங்கள் பட்ட துன்பங்களை பலர் மறந்துவிட்டார்கள்.

(Ragu Kathiravel)