அரசியல் அதிகாரத்தை இழந்து வரும் பண்டாரநாயக்கா குடும்பம்

பிரதம மந்திரி துப்பாக்கியால் சுடப்பட்ட செய்தியை கேட்டவுடன் அன்று இலங்கையின் மகா தேசாதிபதியாக இருந்த சேர் ஒலிவர் குணதிலக்க தனது உத்தியோகபூர்வ வாசஸ்தலமான குயின்ஸ் ஹவுஸில் புதிதாக பதவியேற்ற இத்தாலிய தூதுவரின் சத்தியப் பிரமாண வைபவத்தில் கலந்து கொண்டிருந்தார். அந்த நிகழ்வு முடிவடைந்தவுடன் அவர் அவசரமாக பிரதம மந்திரியின் வாசஸ்தலமான ரொஸ்மிட் பிளேஸ் இல்லத்துக்கு விரைந்தார். செல்லும் வழியில் அவர் பாராளுமன்றம் வழமை போல் கூட வேண்டும் என்றும் கூட்டத்தை நடத்த வேண்டும் என்று உத்தரவு பிறப்பித்தார்.

பிரதம மந்திரி சுடப்பட்ட செய்தி கேட்டவுடன் நாட்டில் கலவரம் ஏற்படுவதை தடுப்பதற்காக அனுபவம் மிக்க அரசியல்வாதியான சேர் ஒலிவர் குணதிலக்க உடனடியாக அவசர காலநிலையை பிரகடனம் செய்தார். இதற்கு முன்னர் தமிழர்களுக்கு எதிரான வன்முறைகள் நாட்டில் ஏற்பட்ட போதும் 1958 மே 25ம் திகதி முற்பகல் 11 மணிக்கு மகா தேசாதிபதி அவசர காலநிலையை பிரகடனம் செய்து இராணுவம், கடற்படை, விமானப் படையை தயார்நிலைப்படுத்தி தொண்டர் படைகளையும் சேவைக்கு அழைத்தார். அன்றைய தினம் அவசரகால சட்டத்தை பிரகடனம் செய்ததற்காக மக்கள் சேர் ஒலிவர் குணதிலக்கவை பாராட்டினார்கள்.

கொழும்பு பெரிய ஆஸ்பத்திரிக்கு எடுத்துச் செல்லப்பட்ட பிரதம மந்திரி சத்திர சிகிச்சை முடிவடைந்த பின்னர் நாட்டிலுள்ள முக்கியஸ்தர்கள் சிகிச்சை பெறும் கொழும்பு பெரியாஸ்பத்திரியில் இருக்கும் மேட்சன் வார்ட்டில் சிகிச்சைக்காக அனுமதிக்கப்பட்டார். ஆஸ்பத்திரியில் மயக்க நிலையில் இருந்த போதிலும் பிரதம மந்திரி எஸ். டபிள்யூ. ஆர். டி பண்டாரநாயக்க தைரியமாக நாட்டு மக்களுக்கு விடுத்த செய்தியில் தன்னை ஒரு பெளத்த பிக்கு துப்பாக்கியால் சுட்டதை மறைத்து காவி உடை அணிந்த ஒரு முட்டாள் என்னை துப்பாக்கியால் சுட்டான் என்று அறிவித்து தன் மீது துப்பாக்கி பிரயோகம் செய்த அந்த மனிதன் மீது எவரும் பழிவாங்காமல் அவனை அன்புடன் நடத்த வேண்டும் என்று கேட்டுக் கொண்டார்.

நாட்டில் மீண்டும் 1958 ஆம் ஆண்டில் இடம்பெற்றதைப் போன்ற இரத்தம் சிந்தும் கலவரம் ஏற்படுவதை மகாதேசாதிபதி தனது ஆளுமைத் திறன் மூலம் இந்த தடவை தவிர்த்துக் கொண்டார். ஆஸ்பத்திரியில் திறமைமிக்க சத்திர சிகிச்சை நிபுணரான டாக்டர் பி. ஆர். அந்தனிசும் அவரது உதவியாளர்களும் 6 மணி நேரம் சத்திரசிகிச்சை செய்து பிரதம மந்திரியை காப்பாற்றுவதற்கு முயற்சிகள் எடுத்த போதிலும் மறுநாள் செப்டம்பர் 26ம் திகதி காலை 7.45 மணியளவில் பிரதம மந்திரி அமைதியான முறையில் தனது இறுதி மூச்சை விட்டார்.

பிரதம மந்திரியின் மறைவை அடுத்து டாக்டர் டபிள்யூ. யூ. தஹாநாயக்க பிரதம மந்திரியாக பதவி பிரமாணம் செய்து, காபந்து அரசாங்கத்துக்கு தலைமை தாங்கினார்.

ஓரிரு மாதங்களுக்குள் புதிய பிரதம மந்திரிக்கும் அவரது அமைச்சரவை சகாக்களுக்குமிடையில் முரண்பாடு ஏற்பட்டதனால் பிரதம மந்திரி டாக்டர் தஹாநாயக்க தமது அமைச்சர்கள் அனைவரையும் பதவி நீக்கம் செய்து அரசியலில் அனுபவம் இல்லாதவர்களை அமைச்சர்களாக நியமித்தார்.

அதை அடுத்து அவரது அரசாங்கம் பதவி இழந்தது. பின்னர் நாட்டில் நடைபெற்ற பல்வேறு அரசியல் மாற்றங்களை அடுத்து திரு. எஸ். டபிள்யூ. ஆர். டி பண்டாரநாயக்கவின் கைம்பெண் திருமதி சிறிமாவோ பண்டாரநாயக்கா 1960 ஆம் ஆண்டு ஜூலை மாதம் தேர்தலில் ஸ்ரீலங்கா சுதந்திரக் கட்சிக்கு தலைமை தாங்கி தேர்தலில் போட்டியிட்டு உலகில் முதலாவது பெண் பிரதமர் என்ற சாதனையை ஏற்படுத்தினார்.

எஸ். டபிள்யூ. ஆர். டி பண்டாரநாயக்காவின் கொலை வழக்கில் பல்வேறு சாட்சிய முரண்பாடுகள் இருந்தன என்றாலும் நீதிமன்றம் சோமராம தேரர், அவரை துப்பாக்கியால் சுட்டுக் கொன்றார் என்ற ஆதாரம் இருந்தமையினால் அவருக்கு மரண தண்டனை விதிக்கப்பட்டு இறுதியில் அவர் கிறிஸ்தவராக மாறி பீட்டர் என்ற பெயரில் வெலிக்கடை சிறைச்சாலையில் தூக்கிலிடப்பட்டார். இந்த வழக்கில் இன்னுமொரு தேரரான களனி விகாரையின் புத்த ரகித்த தேரர் என்பவர் மீதும் குற்றம் சாட்டப்பட்டிருந்தது. அவருக்கு நீதிமன்றம் ஆயுட்கால சிறைத்தண்டனை விதித்தது. புத்த ரகித்த தேரர் வெலிக்கடை சிறைச்சாலையில் 1960 ஆம் ஆண்டு தசாப்தத்தின் ஆரம்ப காலத்தில் மாரடைப்பினால் மரணித்தார்.

எஸ். டபிள்யூ. ஆர். டி பண்டாரநாயக்க அன்று கொழும்பு முகத்துவாரத்தில் அமைந்திருந்த தற்போது கல்கிசையில் அமைந்திருக்கும் சென். தோமஸ் கல்லூரியில் கல்வி கற்றார். அவரது தந்தை சேர். சொலமன் டயஸ் பண்டாரநாயக்க ஒரு பெரும் செல்வந்தராக இருந்ததனால் தன்னுடைய மகனை பாடசாலைக்கு அதிகம் அனுப்ப விரும்பாமல் அத்தனகல்லை ஒரகொல்ல மாளிகையில் தனிப்பட்ட ஆசிரியர்களை அழைத்து கல்வியை புகட்டினார். அன்று எஸ். டபிள்யூ. ஆர். டி பண்டாரநாயக்கா சிங்கள அங்கிலிக்கன் கிறிஸ்தவ குடும்பத்தைச் சேர்ந்தவராக இருந்தார். அரசியலில் ஈடுபட்டதையடுத்து அவர் பெளத்த மதத்தை தழுவினார். பின்னர் அவர் லண்டன் சென்று ஒக்ஸ்போர்ட் பல்கலைக்கழகத்தில் பரிஸ்டர் பட்டம் பெற்று பின்னர் நாடு திரும்பினார்.

1940 ஆம் ஆண்டில் சிறிமாவோ ரத்வத்த கண்டிய உயர் குடும்பத்தைச் சேர்ந்த பெண்ணை மணம் முடித்த திரு. எஸ். டபிள்யூ. ஆர். டி பண்டாரநாயக்கவுக்கு மூன்று பிள்ளைகள் இருந்தார்கள்.

முதலாவது மூத்த மகள் சுனித்ரா பண்டாரநாயக்க ஆவார். பண்டாரநாயக்கா தம்பதிகளின் இரண்டாவது மகள் சந்திரிகா குமாரதுங்க பண்டாரநாயக்க ஆவார். இவர் முதலில் பிரதம மந்திரியாகவும் பின்னர் இரண்டு தடவைகள் நாட்டின் ஜனா திபதியாகவும் இருந்தார்.

பண்டாரநாயக்கா குடும்பத்தின் கடைக்குட்டியான அனுர பண்டாரநாயக்கா தாயாரின் செல்லப் பிள்ளையாக இருந்தமையினால் கல்வியிலும் அரசியலிலும் அந்தளவுக்கு ஜொலிக்கவில்லை.

அனுர பண்டாரநாயக்க பிரதம மந்திரியாக வருவார் என்று பலரும் எதிர்பார்த்த போதும் அவருக்கு அந்த வாய்ப்பு கிடைக்கவில்லை. இறுதியில் அமைச்சராகவும் பின்னர் எதிர்க்கட்சி தலைவராகவும் இருந்தார். அவர் பாராளுமன்றத்தின் சபாநாயகராக தெரிவு செய்யப்பட்ட போது தன்னுடைய ஆங்கில அறிவின் மூலம் பாரா ளுமன்றத்தில் நல்ல பல தீர்ப்புக்கள் கொடுத்து பாராட்டுக்களைப் பெற்றார். அனுர பண்டாரநாயக்கா நோய் வாய்ப்பட்டு சில வருடங்களுக்கு முன்னர் மரணமானார்.

இவ்விதம் எங்கள் நாட்டில் சுதந்திர இலங்கையின் அரசியலில் கொடிகட்டிப் பறந்த பண்டாரநாயக்காவின் குடும்ப ஆட்சி இன்று படிப்படியாக வலுவையிழந்து வருகின்றது.

பண்டாரநாயக்கா குடும்பத்திலிருந்து இன்னுமொருவர் ஜனாதிபதி பதவிக்கோ பிரதம மந்திரி பதவிக்கோ வருவார் என்பது கேள்விக்குறியாக இருக்கின்றது.

(எஸ். தில்லைநாதன்)