அறிஞர் அண்ணாத்துரை பற்றி ஒரு கம்யூனிஸ்ட்

அண்ணா பிறந்தநாள் கொண்டாடப்படுகிறபோது அவரது பல முக்கியப் பங்களிப்புகளில் நான்கு விசயங்களை முன்வைக்க விரும்புகிறேன். ஒன்று, மாநில சுயாட்சி. திமுக எதிர்க்கட்சியாகச் செயல்பட்ட காலத்திலும், பின்னர் ஆளுங்கட்சியாக மாறிய பின்னரும் இதை வலியுறுத்தியவர் அவர். வலிமையான மாநிலங்கள் அமைவதுதான் வலிமையான இந்தியாவை உருவாக்கும் என்ற தெளிவோடு மாநில சுயாட்சி, மத்தியில் கூட்டாட்சி என்று கூறினார் அண்ணா. அடுத்து, மொழி உரிமை. அடிப்படையில் தமிழுக்காக அவர் குரல் கொடுத்தார் என்றாலும் அதன் பொருள், இந்தியா போன்ற பல்வேறு மொழிகளும் பன்முகப் பண்பாடுகளும் உள்ள நாட்டில் அனைத்து மொழிகளும் சமமாக மதிக்கப்படுவது முக்கியம். மூன்றாவதாக, விமர்சனங்களை அவர் எதிர்கொண்ட விதம். மாற்றுக் கருத்துகளையும், தன்னைப் பற்றிய எதிர்க்கருத்துகளையும் மனம் திறந்து வரவேற்றவர். இயக்கத்தின் வளர்ச்சிக்கும் அரசின் நல்ல செயல்பாட்டிற்கும் விமர்சனங்கள் தேவை என்று கருதியவர் அவர்.

மாநில சுயாட்சி, மொழி உரிமை, அரசியல் விமர்சனம் ஆகிய மூன்றுமே இப்போது அச்சுறுத்தலுக்கு உள்ளாகியுள்ளன. நான்காவது அம்சம், திராவிட முன்னேற்றக் கழக இயக்கத்தை வளர்த்தபோது அனைத்து ஊர்களிலும் தெருக்களில் படிப்பகங்களை அமைக்க வழிகாட்டினார் அண்ணா. திமுக ஆதரவு ஏடுகள் மட்டுமல்லாமல், திமுக எதிர்ப்புப் பத்திரிகைகளும் அந்தப் படிப்பகங்களில் கிடைக்கச் செய்தார். இதனால் தமிழக மக்களிடையே வாசிப்புப் பழக்கம் வளர்ந்தது, அரசியல் சிந்தனைகளும் வளர்ந்தன. திமுக-வின் வளர்ச்சியில் அந்தப் படிப்பகங்களுக்குப் பங்கு உண்டு. பிற்காலத்தில், அந்த மன்றங்கள், கட்டிங் - கமிஷன் பேரம் பேசுகிற இடங்களாக மாறிப்போனது ஒரு சோகம்.

அண்ணா பிறந்தநாளைக் கொண்டாடுகிற இயக்கங்கள், சடங்காக அல்லாமல், அண்ணாவின் இந்த நான்கு பங்களிப்புகளை நிலைபெறச்செய்யவும் மென்மேலும் வளர்த்துச் செல்லவும் இக்கருத்துகளைத் தமிழ்ச்சமுதாயத்தில் பரப்பவும் இதை ஒரு தொடக்கமாகப் பயன்படுத்தினால் மகிழ்வேன்.

‘இமயம்’ தொலைக்காட்சியின் ‘நெற்றிக்கண்’ நிகழ்ச்சியில் இன்று (செப்.15) அண்ணா பிறந்தநாள் தொடர்பாகத் தொகுப்பாளர் ஜீவசகாப்தன் கேட்ட கேள்விக்கு நான் அளித்த பதிலின் சுருக்கம்.

(தீக்கதிர் ஆசிரியர் குமரேசன்)