சிங்கள சாப்பாடு அது என்னவோ தனிச்சுவை தான் , சுவைகள் வித்தியாசப்படும், எங்களது சமையல் வேறு மாதிரி சுவை.

சிங்களவர் போல " கொஸ் கறி,," , " அம்புள் தியால் மீன் கறி,," ," கொட்டுக் கொளை சம்பல் " , " சுது மாலு ஓதி ," " தெல் தால கால் மெஸ்சோ பிறை ," " உம்பளக்கட உருட்டல் " ," காலி மிரிஸ் தாள அள பிரட்டல் " , " அழுத் அவருது சிங்கள அச்சாறு," செய்ய எங்களால் தலை கீழாக நிண்டாலும் முடியவே முடியாது. எனக்கு அதுகளின் டெக்னிகல் சமையல் விடயங்களை சொல்லித் தந்த செப் குனதாதாச(வின் மில் பீச் ஹோட்டல் ,ஏத்துக்கள ), செப் அன்டனி பெர்னாண்டோ( சீஜோய் , குடாப்பாடுவ ) ,செப் பீரிஸ் லியனகே (ஆசியான் இண்டர்னசினால் ஹோட்டல் ஸ்கூ ல், ,நுகேகொடை) இவர்களை இன்று நினைக்கிறன் , இந்த மூன்று பேருமே இப்ப மண் உலகில் இல்லை, விண் உலகில்.

சிங்களவர்களின் சாப்பாடில் உள்ள உறைப்பு விசியம் அவர்கள் அரைக்கும் " துன பகாக் குடு " என்ற சரக்குத் தூள், இதன் ரகசியம் என்னவோ மகா வம்ச ரகசியம் போலச் சொல்லுவார்கள்,உண்மையில் அதில பெரிதா வடக்குத் தமிழர்களின் வறுத்த மிளகாத் தூளில் உள்ள அளவு விசயமே இல்லைப் போல இருக்கும். யாழ்ப்பாணதில பிள்ளைப் பெற்ற பெண்களுக்கு அம்மியில் வைச்சு இழுத்து அரைச்சுக் கொடுக்கும் சரக்குத் தூளின் " பண்டக்க சுண்டா சுண்டக்க பண்டா " போன்ற ஒரு எளிமையான வடிவம்தான் சிங்களவர்களின் துன பகாக் குடு சரக்குத் தூள் , ஆனால் அதை அவர்கள் போடும் நேரத்தில் ஒரு தீபிகவம்ச ரகசியம் இருக்கு ,அந்த " துன பகாக் குடு " என்ற சரக்குத் தூளை அவர்கள் எண்ணையில் போட்டு கொஞ்சம் சூடேற்றி அதன் வாசத்தைப் பிடுங்கி வெளியே எடுக்கும் நளினத்தில் சிகிரியாக் குகை ஓவிய அப்சரஸ் பெண்களின் கை வண்ணம் இருக்கு....

யாழ்ப்பாண அரைச்ச மிளகாய்,கருவேப்பிலை கலந்த ஸ்டைலில் கணவாய்க்குளம்பு, நண்டுக்கறி ,செய்ய, யாழ்பாணத்தை அடிக்க தலை கீழாக நிண்டாலும் சிங்களவர்களால் முடியவே முடியாது.,சிங்கங்களே அதுக்காகவே யாழ்பாணம் வந்து ரசித்து, கடைசிச் துளி இன்பத்தையும் இழக்க விரும்பாமல் விரலைச் சூப்பி சாப்பிடுவார்கள். சாப்பிட்டு மயங்கி அதை சமைத்த யாழ் அணங்குகளின் கையில் கல்யாண மோதிரம் போட்டு வாழ்க்கைத் தொலைத்தும் இருக்குறார்கள் எண்டு சிங்கள நாட்டில்ப் புகையிலைக் கடை போட்டு முன்னேறிய யாழ் தமிழர்கள் எண்பதுகளின் முன்னர் வரலாற்றில் எழுதி வைத்து இருக்குறார்கள்.

இலங்கையின் ஆயிரம் அரசியல் குழப்பங்களுக்கு நடுவிலும் ,அன்பாக எனக்கு சமையல் சொல்லித்தந்த அந்த சிங்களவர் நினைவோடு நாக்கு வெளிய தொங்குது ..." மாத்தற பத் காமே " என்ற இந்த தென் இலங்கை உணவு ஸ்டைலில் உள்ள இந்த மெனுவைப் பார்க்க,சிங்கள நாட்டில்,சிங்கள மக்களுடன் வாழ்ந்த எல்லாருக்கும் நுனி நாக்கில் இதன் சுவை சிங்கம் புலி தேசிய இனப்பிரச்சினையை ஒரு நிமிடம் மறக்க வைக்கலாம் ...

சில வருடம் முன் நான் பஞ்சம் புளைக்கும் ,என்னோட அன்றாட வாழ்க்கைக்கு கஞ்சி ஊத்திக் குப்பை கொட்டும், ,எப்பவுமே எழுத விரும்பாத சமையல் தொழில் பற்றி எழுதவே விரும்பாமல் இருந்தாலும் ," யான் பெற்ற துன்பம் பெறுக இவ் வையகம் " எண்டு ,வாய்க்கு ருசியா சமைப்பது பற்றியும் சமயல்க் குறிப்பு என்ற ரெசிப்பி பற்றியும் ஒரு பேஸ் புக் " சாப்பாட்டு ரசிகர்கள் குருப்பில் " மட்டும் ஆங்கிலத்தில் எழுதுவேன்,அந்தக் குரூப்பில் இருந்த, தற்சமயம், இங்கிலாந்தில் வடக்கு லண்டனில் வசிக்கும் ஒரு யாழ்பாணப் பெண்மணி ஆர்வமா என்னிடம் நிறைய டெக்னிகல் சமையல் விஷயம் கேட்பா ,,நானும் முடிந்தளவு சொல்லுவேன் ,அவாவின் ஆர்வத்தால் கவரப்பட்டு ஒரு அட்டமி நவமி நாள்,

" நீங்க வீடில் இதெல்லாம் சமைத்துப் பார்ப்பின்களா " எண்டு துணித்து கேட்டேன்,

அதுக்கு அவா,,,

" நான் உங்கள் ரெசிப்பி ஒன்லைனில் வாசித்து சொல்லுவேன்,என்னோட ஹஸ்பன்ட் ,எல்லாம் வெட்டிக் கொத்தி , சட்டி பானையோடு மல்லுக்கட்டி சமைப்பார் , நான் கடைசியில் உப்புப் ,புளி மட்டும் டேஸ்ட் செய்து நல்லா இல்லை எண்டு சொல்லுவேன் " எண்டு சொன்னா..

" அடக் கடவுளே,,உங்க ஹஸ்பண்டும் என்னைப்போல ரெஸ்ட்றோரென்ட் குக் ஆக வேலை செய்யும் ஒரு நெருப்போட விளையாடும் பாவப்பட்ட ஜீவனா " எண்டு கேட்டேன் .

" இல்லை அவர் நோர்த் லண்டனில் ஒரு பெட்ரோல் ஸ்டேஷனில் பெட்ரோல் பம்ப்புகலோட நிண்டு பம்புற வேலை, எனக்குதான் விதம் விதமா சமைத்து சாப்பிட விருப்பம் ,,வாய்க்கு ருசியா சாப்பாடு இல்லை எண்டா எனக்கு பாணைப் பச்சை தண்ணியில தோச்சு சாப்பிட்டது போல நாக்கு தென்னம் கிளி பேப்பர் திண்ட மாதிரி சப் எண்டு இருக்கும் .. ,," எண்டு சொன்னா ..

விதி யாரைத்தான் விட்டு வைக்குது எண்டு நினைச்சு அதுக்கு மேல கேட்கவில்லை..

என்ன சீவியமடா இது!

(Naavuk Arasan)