அப்படி என்னதான் நடக்கப் போகின்றது ஜெயலலிதாவிற்கு

தமிழகம் பூரா ஆர்ப்பாட்டம் செய்து கடைகளை அடித்து நொறுக்கி பேருந்துகளை எரிக்கும் ஆதிமுகவினர் ஏதோ உணர்சசி வேகத்தில் செய்வதாக நான் நினைக்கவில்லை. இப்படி ஒரு தீர்ப்பு வரப் போகிறது என ஏற்கனவே கட்சியினருக்கு தெரியும். அதற்காக தயாராக தான் இருந்திருக்கிறார்கள். அவரக்ளின் இலக்கு எப்போதுமே பொதுமக்களும் சாதாரண வியாபாரிகளும் தான். ஒரு நட்சத்திர ஓட்டலுக்குள் போய் தாக்குவார்களா? நீதிமன்றம் முன்பு போய் தர்ணா பண்ணுவார்களா? மாட்டார்கள். டாஸ்மாக் அதன் பாட்டுக்கு திறந்தே ஜெகஜோதியாக இயங்குகிறது. அதை உடைக்க மாட்டார்கள். ஏனென்றால் அங்கு போய் குடித்து விட்டு கிடைக்கிற மிதப்பில் தானே ஆர்ப்பாட்டம் பண்ண முடியும். பொதுச்சொத்தை ஆளுங்கட்சியினர் உடைப்பதை வேடிக்கை பார்க்கும் போலீஸ்காரர்கள் ஏதோ பள்ளிக்கூட பிள்ளைகளை விளையாட விட்டு கண்காணிக்கும் டீச்சரை போல் தோன்றுகிறார்கள்.

கடைகுள் புகுந்து குண்டர்கள் உடைத்ததுமே அங்கு ஒரு போலீஸ்காரர் போய் “போதும் போங்க” என அமைதிப்படுத்துகிறார். மாணவர்கள் சாலை மறியல் செய்தால் மாட்டடி அடித்து சிறையில் ஏற்றும் இவர்கள் ஏதோ குடித்து விட்டு கலாட்ட பண்ணும் மாப்பிள்ளையை சமாதானம் பண்ணும் மாமனாரை போல் நடந்து கொள்கிறார்கள். இதைப் போல் மற்றொரு அவலம் இல்லை. இதையெல்லாம் சேர்த்து பார்க்கையில் இந்த ஆர்ப்பாட்டம் ஜெயலலிதா, போலீசார் மற்றும் ஆளுங்கட்சி நிர்வாகிகள் இணைந்து நடத்தும் ஒரு நாடகம் எனத் தெரிகிறது. ஜெயலலிதாவுக்கு தேவை கட்சியில் தான் இன்னும் ஒரே தலைவர் என வலுவான ஒரு சேதியை விடுப்பது; இன்னும் கட்சியினர் தன் மீது மட்டுமே விசுவாசமாக இருப்பதாய் சித்தரத்தை உருவாக்குவது. அந்த காட்சி கச்சிதமாக நடந்தேறி விட்டது.

எப்படியும் அடுத்தது திமுக ஆட்சி தான். ஜெயலலிதாவுக்கு இந்த தீர்ப்பு வராதிருந்தாலும் கூட விலைவாசி உயர்வு. மின்சார பிரச்சனை காரணமாய் மக்கள் கடும் அதிருப்தியில் இருக்கிறார்கள். ஜெயலிதா அதுவரை சோனியா காந்தி போல் நிழல் அரசாங்கம் நடத்தலாம். ஆனால் அடுத்த தேர்தலுக்கு அடுத்த தேர்தல் தான் முக்கியம். அப்போது அவரால் தேர்தலில் நிற்க முடியுமா என்பது தான் பிரதான கேள்வி. எப்படியும் அவர் சிறைக்கு போகப் போவதில்லை. கட்சி அதிகாரம் வழியாய் மொத்த அதிகாரமும் அவரிடம் தான் இருக்க போகிறது. ஜெயலிதாவின் நஷ்டம் கௌரவத்துக்கு ஏற்பட்டுள்ள சின்ன இழுக்கு மட்டும் தான். புறங்கையால் துடைத்துக் கொண்டு போய்க் கொண்டே இருப்பார்.

(அபிலாஷ் சந்திரன்)