தீர்ப்பு வந்ததும் ஜெயலலிதா எவ்வாறு செயற்பட்டிருக்க வேண்டும்

மாநிலத்தின் முதலமைச்சர், ஆளுங்கட்சியின் மிகப்பெரும் தலைவர் என்ற முறையில் தனது கட்சியின் தொண்டர்களுக்கு வேண்டுகோள் விடுத்திருக்க வேண்டும் - தீர்ப்பு எப்படி வந்தாலும் அதை ஏற்று அமைதி காக்க வேண்டும் என்று. எது எதற்கோ உடனுக்குடன் அறிக்கை விடுகிற அவர் இந்த முக்கியப் பிரச்சனையில் ஏன் அப்படிப்பட்ட அறிக்கை வெளியிடவில்லை? தொண்டர்கள் உணர்ச்சி வசப்பட்டவர்களாக கோபத்தோடு செயல்படக்கூடும் என்ற நிலையில், அவர்களைக் கட்டுப்படுத்தும் வகையில் அறிக்கை விடுத்திருந்தால் அது ஆரோக்கியமானதாக இருந்திருக்கும்.

தமிழக மக்கள் இயல்பாக இருந்தது போல் தெரிந்தாலும், தீர்ப்பு நாள் நெருங்க நெருங்க உள்ளார்ந்த ஒரு பதற்றத்தோடுதான் இருந்தார்கள். இந்த வழக்கில் இப்போதாவது முதலமைச்சருக்கு சாதகமாகவோ, அல்லது பாதகமாகவோ தீர்ப்பு வழங்கப்பட்டு வழக்கு முடிவுக்கு வரவேண்டும், தங்களுடைய பதைப்பு ஓய வேண்டும் என்ற எதிர்பார்ப்பு மக்களுக்கு இருந்தது.

வழக்கு நியாயமானதாக இருக்கலாம், ஆனால் வழக்கைத் தொடுத்தவர் நியாயமானவர்தானா என்று கேட்கத்தான் வேண்டியிருக்கிறது. அண்மையில் கூட, தமிழக மீனவர்களின் படகுகளைக் கைப்பற்றி வைத்துக்கொள்ளுமாறு இலங்கை அரசுக்கே ஆலோசனை கூறியது தான்தான் என்று அவர் தயக்கமில்லாமல் அறிவித்தார். ஒடுக்கப்பட்ட மக்களை உதாசீனப்படுத்துகிறவர் அவர்...

ஜெயலலிதாவுக்கு பாதகமான முறையில் வந்திருக்கிற தீர்ப்பால் அவருடைய அரசியல் செல்வாக்கு சரிந்துவிடும், எதிர்க்கட்சிகளுக்கு பெரிய வாய்ப்பாக அமைந்துவிடும் என்று நான் நினைக்கவில்லை. அவருடைய ஆட்சியின் மீது பெரும் ஏமாற்றமோ, விமரிசனமோ பெரும்பகுதி மக்களுக்கு இல்லை என்பதே என்னுடைய மதிப்பீடு. அரசியலாக உள்ளவர்களுக்கு இந்த ஆட்சி பற்றிய விமரிசனம் இருக்கிறது. ஆட்சியை சட்டமன்றத்திற்கு உள்ளே விமரிசித்தால் வெளியேற்றம், வெளியே விமரிசித்தால் அவதூறு வழக்கு என ஜனநாயக உரிமை மறுக்கப்படுகிறது என்பதான குற்றச்சாட்டு இருக்கிறது. ஆனால், கணிசமான பகுதி மக்களைப் பொறுத்தவரையில் இந்த ஆட்சியைப் பற்றிய கடுமையான அதிருப்தி ஏதும் இல்லை என்றே சொல்ல வேண்டும். மாறாக, அம்மா உணவகம், அம்மா மருந்தகம், அம்மா சிமென்ட் போன்ற அரசின் பல்வேறு திட்டங்களை எளிய மக்கள் வரவேற்கவே செய்கிறார்கள்.

ஆகவே, நீதிமன்றத் தீர்ப்பால் உடனடியாக அவருடைய அரசியல் தளம் சரிந்துவிடாது என்பது மட்டுமல்ல, அவர் மீதான அனுதாப அலையாகவும் மாறக்கூடும். எனவே, அவருக்கு அளிக்கப்பட்டிருக்கிற தண்டனையை மட்டும் மையப்படுத்தி, அதை மட்டுமே அரசியலாக்குவன் மூலம் எதிர்க்கட்சிகள் வலுப்பெற்றுவிட முடியாது. தொடர்ந்து மக்கள் பிரச்சனைகளுக்காக உண்மையாகப் போராடுவதன் மூலமாகவும், உண்மைகளைப் புரிய வைப்பதன் மூலமாகவும்தான் எதிர்க்கட்சிகள் மக்களின் ஆதரவைத் திரட்ட முடியும்...

(இன்று (செப்.27) தீர்ப்பு வருவதற்கு முன் ‘புதிய தலைமுறை’ தொலைக்காட்சியில் நடந்த விவாதத்தின்போது நான் கூறிய கருத்துகளிலிருந்து.)

(தீக்கதிர் ஆசிரியர் கதிரேசன்)