ஜே.வி.பி பாடம் கற்றுக் கொண்டால் அக்கட்சிக்கு மக்கள் ஆதரவு கிடைக்கும்

ஏப்ரல் மாதம் 1ம் திகதி முட்டாள்கள் தினமாக உலகெங்கிலும் வாழும் மக்கள் நினைவு கூர்ந்து அன்றைய தினம் அதிகாலை யிலேயே ஒவ்வொருவரும் மற்றவர்களை முட்டாள்களாக்கி குதூகலிக்கும் வினோத விளையாட்டுக்களில் ஈடுபடுவதுண்டு. அதுபோன்று ஏப்ரல் மாதம் 5 ஆம் திகதியன்று ஜே.வி.பியினர் சுதந் திர இலங்கையில் முதல் தடவையாக மேற்கொண்ட வன்முறைக் கும் ஆயுதப் போராட்டங்களுக்கும் வித்திடும் ஒரு முட்டாள் தனமான முயற்சியில் தவறான வழியில் இட்டுச் செல்லப்பட்ட சிங்கள இளைஞர்கள் அநியாயமாக பலிகடாக்களாக்கப்பட்டார்கள். இது ஒரு தற்கொலை முயற்சி என்று பாராளுமன்ற ஜனநாயக வெஸ்ட் மினிஸ்ரர் சம்பிரதாயத்தின் மீது நம்பிக்கை வைத்துள்ள வர்கள் கண்டனம் தெரிவிக்கவும் தயக்கம் காட்டவில்லை.

1971 ஆம் ஆண்டு ஏப்ரல் மாதம் 5ம் திகதியன்று 5 பாடங்களை கற் றுக்கொடுத்ததன் மூலம் உங்களுக்கு அரசியல் விடுதலையை பெற் றுக்கொடுத்து உங்கள் வாழ்க்கையை வளமாக்குவோம் என்ற போலி வாக்குறுதிகளை அளித்து சிங்கள இளைஞர்களை ஏமாற்றிய விரல் விட்டு எண்ணக்கூடிய சர்வதிகாரத்தின் மீது நம்பிக்கை கொண்டுள்ள சிலர் இந்த ஆயுதப் போராட்டத்திற்கு வித்திட்டனர்.

அரசாங்கத்தை கவிழ்க்க வேண்டும் என்ற நோக்கத்துடன் வீடுகளில் தயாரிக்கப்பட்ட கைக்குண்டுகளையும், கல்கட்டாஸ் என்று அழைக் கப்படும் உள்ளூரில் தயாரிக்கப்படும் துப்பாக்கிகளையும் பயன் படுத்தி நாட்டின் பல பகுதிகளிலுள்ள பொலிஸ் நிலையங்களின் மீது அன்றிரவு எதிர்பாராத வகையில் தாக்குதல்களை நடத்தி தங்களின் எவ்வித திட்டமும் அற்ற ஆயுதப் போராட்டம் ஜே.வி.பி. தலைவர்களின் வழிநடத்தலின் மீது அரங்கேற்றப்பட்டது.

ஆரம்பத்தில் லத்தீன் அமெரிக்காவில் பாமர மக்களுக்கு விடுதலை பெற்றுக்கொடுப்பதற்காக ஆயுதப் போராட்டத்தை ஆரம்பித்து கியூபாவில் பிடல் கஸ்ரோவை ஆட்சி பீடத்தில் அமர்த்திய மாவீரன் ஷேகுவேராவின் பெயரில் இவ்வியக்கத்தை ஆரம்பித்த இந்த தவறான வழியில் இட்டுச் செல்லப்பட்ட சிங்கள இளைஞர் கள், பின்னர் அதனை மக்கள் விடுதலை முன்னணி அதாவது ஜே.வி.பி என்று இயக்கத்திற்கு பெயர் சூட்டினார்கள்.

1971 ஆம் ஆண்டில் சிங்கள இளைஞர்கள் ஆரம்பித்த ஆயுதப் போராட்டம் ஓரிரு தினங்களில் அன்றைய பிரதம மந்திரி ஸ்ரீமாவோ பண்டாரநாயக்கவின் அரசாங்கத்தினால் அடக்கப்பட்டது. தங்கள் மீது வெறி கொண்டு காட்டுமிராண்டித்தனமாக தாக்குதல்களை மேற்கொண்ட ஜே.வி.பி யைச் சேர்ந்த பல்லாயிரக்கணக்கான அப்பாவி சிங்கள இளைஞர்கள் பொலிஸாரினால் கண்ட கண்ட இடமெல்லாம் கைது செய்து படுகொலை செய்யப்பட்டனர்.

நாட்டின் இளைஞர்கள் விரல்விட்டு எண்ணக்கூடிய ஒருசில தேசத் துரோக தலைவர்களின் வழிநடத்தல்களினால் தங்கள் உயிர்களை இழப்பதைக் கண்டு மனம் நொந்து போன அன்றைய பிரதம மந்திரி ஸ்ரீமாவோ பண்டாரநாயக்க அம்மையார் சகல இளைஞர்களையும் உடனடியாக வந்து சரணடையுமாறு உத்தியோகபூர்வமாக விடுத்த வேண்டுகோளை ஏற்றுக் கொண்ட பல சிங்கள இளைஞர்கள் சரணடைந்தார்கள்.

அவ்விளைஞர்கள் ஓரிரு வருடங்கள் புனர்வாழ்வு முகாம்களில் வைக்கப்பட்ட பின்னர் நீதிமன்றங்களின் ஊடாக அவரவர் பெற் றோர்களிடம் கடுமையாக எச்சரிக்கை செய்த பின்னர் விடுவிக் கப்பட்டனர். ஜே.வி.பி.யின் தலைவர் ரோஹன விஜயவீர போன்ற பல முக்கிய தலைவர்கள் நீதிமன்றத்தின் மூலம் தண்டிக்கப்பட்டு சிறைத்தண்டனையை அனுபவித்தனர்.

இத்தகைய காலகட்டத்தில் 1977 ஆம் ஆண்டின் பொதுத் தேர்தலில் ஐந்தில் ஒரு பெரும்பான்மை பாராளுமன்ற ஆசனங்களுடன் பதவிக்கு வந்த ஜே.ஆர். ஜெயவர்தன தலைமையிலான அரசாங் கம், தனது சுயநலத்தைக் கருத்திற் கொண்டு ரோஹன விஜயவீர போன்றவர்களை விடுவித்தது.

அதையடுத்து தமிழ் இளைஞர் களின் ஆயுதப் போராட்டங்களை அடக்குவதற்கு இருக்கும் ஒரே வழியாக தமிழ் மக்கள் மீது வன்முறைகளை கட்டவிழ்த்து விட வேண்டும் என்ற இன்னுமொரு முட்டாள் தனமான முயற்சியில் இறங்கிய அன்றைய யு.என்.பி அரசாங்கம், 1983 ஆம் ஆண்டில் இனக்கலவரங்களை தமிழ் மக்கள் மீது மேற்கொண்டு அந்தப் பலியை மிகவும் சாதுரியமான முறையில் ஜே.வி.பி யினர் மீதும் தமிழ், சிங்கள மக்களை என்றும் நண்பர்களாக நினைத்து அரசி யல் நடத்தி வந்த விஜயகுமாரதுங்கவின் மீதும் சுமத்தி அவர் களை கைது செய்தது.

இதையடுத்து மீண்டும் ஜே.வி.பியினர் 1987 முதல் 1989 வரை கட்ட விழ்த்துவிட்ட வன்முறைகளில் பல்லாயிரக்கணக்கான அப்பாவி சிங்கள இளைஞர்களும், பொதுமக்களும் மரணத்தை தழுவிக் கொண்ட நிகழ்வுகளும் உங்களுக்கு நிச்சயம் ஞாபகத்தில் இருக்கும்.

நாம் இதுவரை தெரிவித்த கருத்துக்கள் எமது நாட்டின் வரலாற்றில் சிவப்பு எழுத்துக்களினால் பொறிக்கப்பட வேண்டிய வேதனைக் குரிய நிகழ்வுகளாகும். இன்று 5 ஆம் திகதியன்று ஜே.வி.பி யினர் தங்கள் கட்சியின் 40 வது ஆண்டு நிறைவை விமர்சையாக நாடெங் கிலும் கொண்டாடுவதற்கான ஒழுங்குகளை செய்திருக்கிறார்கள்.

எனவே இந்த 40 ஆண்டு நிறைவு கொண்டாட்டங்களின் போதாவது ஜே.வி.பியினர் வெறுமனையே மக்களை ஏமாற்றி தங்களை ஜனநாயக வாதிகளாக அழைத்துக் கொள்ளும் கபட நாடகத்தை அடியோடு கைவிட்டு மனம்மாறி பாராளுமன்ற ஜனநாயகத்திற்கு வாழ்நாள் பூராவும் விசுவாசமாக இருப்போம் என்ற பிரதிக்ஞையை எடுத்துக் கொள்வது மிக மிக அவசியமாகும். ஜே.வி.பியினர் இந்த நல்வழியை கடைப்பிடிப்பார்களே ஆனால் அவர்களுக்கு நிச்சயம் விமோசனம் கிடைக்கும்.

ஜே.வி.பியினர் இவ்விதம் நல்வழியில் அரசியல் நடத்தினால் அவர் களுக்கு கடந்த காலத்தில் இருந்து வந்த மக்கள் எதிர்ப்பு நீங்கி, ஜே.வி.பியையும் மக்கள் இன்னுமொரு அரசியல் கட்சியாக கருதி ஆதரவை நல்கக் கூடிய ஒரு சாதகமான வாய்ப்பு உருவாகு வதற்கும் இடமுண்டு.

(தினகரன்)