சகோதர படுகொலையால் படு கொலைசெய்யப்பட்ட

சக போராளி அமைப்பின் தலைவர்களையும் அவர்களின் விடுதலை உணர்வையும் ஏற்றுகொள்ளவேண்டும் -  பிரித்தானிய தமிழர் பேரவை, நாடு கடந்த தமிழீழ அரசு

சகோதர படுகொலையால் படு கொலைசெய்யப்பட்ட சக போராளி அமைப்பின் தலைவர்களையும் அவர்களின் விடுதலை உணர்வையும் ஏற்றுகொள்ளவேண்டும் என்ற வேண்டுகோளை பிரித்தானிய தமிழர் பேரவையும் நாடுகடந்த தமிழீழ அரசின் பிரதநிதிகளும் கொள்கை ரீதியாக ஏற்றுகொள்ளுவதாகவும் தெரிவித்துள்ளனர்.

 பிரித்தானியாவில் ஈழப் பிரச்சனை சார்ந்து செயற்படும் சில அமைப்ப்புக்களின் வேலைத்திட்டமும் எதிர்காலமும் குறித்து கருத்தாடல் நிகழ்வு ஒன்றை புதிய திசைகள் அமைப்பினர் பிரித்தானியாவில் ஞாயிற்றுக்கிழைமை ஒழுங்கு செய்திருந்தனர்.

 இதில் கலந்துகொண்ட நாடுகடந்த தமிழீழத்தின் அரசியல் வேலைத் திட்டம் குறித்து உரையாற்றிய வெளிநாட்டு அமைச்சர் தயாபரன் நாடுகடந்த தமிழீழரசு ஒரு ஜனநாயக கட்டமைப்பு எனவும் அந்த ரீதியிலே பல்வேறு வேலை திட்டங்களை முன் எடுத்துவருவதாகவும் கடந்த காலங்களில் நடந்த கசப்பான சம்பவங்களை மறந்து தமிழ் மக்கள் அனைவரும் ஒன்று திரளவேண்டும் எனவும் தெரிவித்தார்.

இங்கு உரையாற்றிய பிரித்தானிய தமிழர் பேரவையின் செயற்பாட்டளார்களான ஸ்கந்தா மற்றும் சிவராஜா தமிழ் மக்கள் நாட்டின் பிரிவினையை கேட்கவில்லை எனவும் விடுதலை கேட்கிறார்கள் என்றும் போர்க் குற்றவிசாரணை தொடர்பாக பாரிய செயற்பாட்டினையும் அத்தோடு இலங்கை சிறையிலே வாழ்கின்ற தமிழ் கைதிகள் தொடர்பாகவும் வடகிழக்கிலே யுத்தால் பாதிக்கப்பட்ட பெண்கள் சிறுவர்கள் தொடர்பாக தாங்கள் மேற் கொண்டிருக்கும் பணிகள் தொடர்பாக விளக்கம் அளித்தனர்.

இங்கு உரை நிகழ்த்திய அரசியல் ஆய்வாளரும் விமர்சகருமான இதயசந்திரன் உலக அரசியலலில் இலங்கை நிலைதொடர்பாக கருத்துக்களை முன்வைத்தார். இலங்கை அரசின் போர்க் குற்ற மீறல்கள் தொடர்பாக மேற்குலக நாடுகள் மனித உரிமை அமைப்புகள் மேற்கொள்ளுகின்ற நடவடிக்கைகள் ஆரோக்கிமாக இருந்தாலும் இதே மேற்குலக நாடுகள் உலகவங்கியின் ஊடாக இலங்கையை பாதுகாப்தையும் சுட்டிகாட்டினார்.

இதில் கலந்து கொண்டு உரையாற்றிய ஈழ தேசிய ஜனநாயக விடுதலை முன்னணியின் செயற்பாட்டாளரும் ரிபிசியின் பணிப்பாளருமான வீ இராமராஜ் தமிழ் மக்களின் அபிலாசைகளான தமிழ் ஈழத்தை உலகநாடுகள் தடைசெய்வில்லை எனவும் ஒரு தவறான தலைமையின் போரட்டத்தால் தமிழ் மக்கள் பாரிய இழப்புகளை சந்திக்கநேர்ந்தது எனவும் அதற்கான பொறுப்பினையும் புலம் பெயர்ந்த மக்களும் ஏற்றுக்கொள்ள வேண்டும் எனவும் தெரிவித்தார். இதேவேளை இன்றைய சூழ்நிலையில் இந்திய மத்திய அரசின் உதவியைப் பெற்று தமிழ் மக்களின் உரிமைப் போரட்டத்தினை முன் எடுக்கவேண்டும் எனவும் அதற்காக தமிழ் மக்கள் ஒன்று சேரவேண்டும் எனவும் கேட்டுகொண்டார்.

இங்கு உரையாற்றிய புதிய திசைகள் அமைப்பின் செயற்பாட்டாளர் சபா நாவலன் தேசிய அரசியலில் சிங்கள பௌத்த மேலாதிக்கத்தின் நடவடிக்கை தொடர்பாக எடுத்து கூறினார். அத்தோடு மேற்குலக நாடுகளின் தயவை நாடுவதைவிட அங்கு உள்ள பாட்டளி மக்களின் அமைப்புகளின் தொடர்பினை ஏற்படுவதன் அவசியத்தையும் அதற்கான வேலை திட்டம் ஒன்றையும் உருவாக்க வேண்டும் எனவும் கேட்டுகொண்டார்.

இறுதியாக உறையாற்றிய புதிய திசைகள் அமைப்பின் செயற்பாட்டாளர் மாசில் பாலன் சமகால தேசிய அரசியலில் பரிமாணங்களையும் கருத்துகளையும் முன்வைத்தார். அடிப்படைக் கொள்கைகளுடன் தெளிவான வேலை திட்டம் ஒன்றின் அவசியம் தொடர்பாக கருத்துகளை முன்வைத்தார்.

சகோதர படுகொலையால் படு கொலைசெய்யப்பட்ட சக போராளி அமைப்பின் தலைவர்களையும் அவர்களின் விடுதலை உணர்வையும் ஏற்றுகொள்ளவேண்டும் என்ற வேண்டுகோளை பிரித்தானிய தமிழர் பேரவையும் நாடுகடந்த தமிழீழ அரசியின் பிரதநிதிகளும் கொள்கை ரீதியாக ஏற்றுகொள்ளுவதாகவும் இது தொடர்பாக தங்களின் உயர் மட்டத் தலைவர்களுடன் பேசுவதாகவும் தெரிவித்துனர்.

இக் காலகட்டத்தில் இது போன்ற கலந்துரையாடல்கள் அவசியம் என கலந்து கொண்ட பலராலும் கருத்துக்கள் முன்வைக்கபட்டிருந்தமையும் குறிப்பிடத்தக்கது.