மேற்கு ஆசியாவில் பதற்றம்  அமெரிக்கா அடிக்குது கொள்ளை லாபம்!

மேற்கு ஆசியாவில் ஏற்பட்டுள்ள மக்கள் எழுச்சியால் ஆட்சியாளர்கள் தலைகள் உருண்டு கொண்டிருக்கின்றன. எழுச்சியை அடக்கும் முயற்சியில் சில ஆட்சியாளர்கள் கடுமையான வன்முறையைக் கட்டவிழ்த்து விட்டுள்ளனர். மக்களின் எழுச்சி ஏற்படாத நாடுகள் கூட அத்தகைய எழுச்சி ஏற்பட்டுவிடாமல் பார்த்துக் கொள்வதற்கான வேலைகளில் இறங்கியுள்ளன. இந்தப்பகுதிதான் அமெரிக்காவின் ஆயுத ஏற்றுமதி அதிகமாக நடக்கும் இடமாகும். இத்தகைய நெருக்கடிகளால் அமெரிக்காவின் ஆயுத விற்பனை பாதிக்கப்படவில்லை. மாறாக, வழக்கத்தைவிட பெருமளவில் அதிக ஆயுதங்களை ஆட்சியாளர்கள் வாங்கிக் குவித்து வருகிறார்கள்.

அமெரிக்க ராணுவத்துறையின் கணிப்புப்படி, நடப்பாண்டில் மேற்கு ஆசிய நாடுகளுக்கான அமெரிக்காவின் ஆயுத ஏற்றுமதி 2 லட்சத்து 40 ஆயிரம் கோடி ரூபாயைத் தாண்டிவிடும். இவ்வளவு மதிப்பிலான ஆயுத விற்பனை இதுவரை எந்த ஆண்டிலும் நடைபெற்றதில்லை. மேலும், ராணுவ விமானங்கள் மற்றும் விமானத்தாக்குதல் தடுப்பு அமைப்புகள் ஆகியவற்றை பிரபலப்படுத்துவதில் ஒபாமா தலைமையிலான அமெரிக்க அரசு முனைப்புக் காட்டிவருகிறது. இந்தப்பணியால் ராணுவ ஆயுதத்தயாரிப்பு ஒப்பந்ததாரர்களான லாக்ஹீட் மார்ட்டின் மற்றும் போயிங் ஆகிய நிறுவனங்கள் குதூகலத்தில் உள்ளன. வானில் பயணித்து தாக்கும் ஆளில்லா விமானங்கள், எப்-35 ரகப் போர் விமானம் மற்றும் ஏவுகணைத்தடுப்பு அமைப்புகள் ஆகியவற்றிற்கு ஏகப்பட்ட கிராக்கி உள்ளது.

2006 ஆம் ஆண்டில்தான் மேற்கு ஆசிய நாடுகள் ஆயுதம் வாங்குவது அதிகரித்தது. இருப்பினும் இந்த ஆயுத விற்பனையின் மதிப்பு 50 ஆயிரம் முதல் 60 ஆயிரம் கோடி ரூபாய் வரைதான் ஒவ்வொரு ஆண்டும் இருந்து வந்தது. 2011 ஆம் ஆண்டில் 2 லட்சத்து 40 ஆயிரம் கோடி ரூபாயை மேற்கு ஆசிய நாடுகள் வாங்கப்போகும் ஆயுதங்களின் மதிப்பு தொடப்போகிறது என்பது அமெரிக்க ராணுவத்துறையின் மதிப்பீடாகும். தங்கள் போர் விமானங்களையும், சரக்கு விமானப்பிரிவையும் மேம்படுத்தத் திட்டமிடும் நாடுகளின் எண்ணிக்கையும் அதிகரித்ததே இதற்குக் காரணம் என்றும் அமெரிக்க ராணுவத்துறை சுட்டிக்காட்டுகிறது.

லிபியா மீது நடவடிக்கை எடுக்க ஐக்கிய நாடுகள் சபையின் ஒப்புதலைப் பெறுவது என்ற நாடகத்தை ஒருபுறம் நடத்திக்கொண்டிருக்கும் அமெரிக்கா, மறுபுறத்தில் கடாபி தலைமையிலான அரசுக்கு ஆயுதங்களை விற்பனை செய்து கொண்டிருக்கிறது. எகிப்து மற்றும் ஏமன் போன்றவை எக்கச்சக்கமாக ஆயுதங்களை வாங்கிக் குவிக்கும் மற்ற இரு நாடுகளாகும்.

பத்தில் ஏழு அமெரிக்க நிறுவனங்கள் சர்வதேச அளவில் நடக்கும் ஆயுத ஏற்றுமதியில் மூன்றில் ஒரு பங்கு அமெரிக்காவால் செய்யப்படுகிறது. சிப்ரி என்ற நிறுவனம் உருவாக்கியுள்ள பட்டியலில் உலகிலேயே அதிக அளவில் ஆயுதங்களைத் தயாரித்து விற்கும் முதல் பத்து நிறுவனங்களின் பெயர்கள் இடம் பெற்றுள்ளன. அதில் ஏழு நிறுவனங்கள் அமெரிக்காவைச் சேர்ந்தவையாகும். லாக்ஹீட் மார்ட்டின், போயிங், நார்த்ராப் கிரம்மன், ஜெனரல் டைனமிக்ஸ், ரேதியான், எல்-3 கம்யூனிகேஷன்ஸ் மற்றும் யுனிடெக் டெக்னாலஜிஸ் ஆகியவையே அந்த ஏழு நிறுவனங்களாகும். அமெரிக்காவின் ஆயுத விற்பனை இரண்டரை லட்சம் கோடி ரூபாயை நடப்பாண்டில் தாண்டினாலும் ஆச்சரியமில்லை என்கிறது ஆய்வு நிறுவனமான சிப்ரி.

இரண்டு அமெரிக்காக்கள்!

ஒருபுறம் ஆயுதங்களை விற்பதில் காட்டப்படும் முனைப்பு. அதற்காக உலகெங்கும் பதற்றங்களை உருவாக்குவதற்கான பணிகள். ஆயுதத் தயாரிப்பு நிறுவனங்களுக்குக் கொள்ளை லாபம். மறுபுறத்தில், அமெரிக்காவில் உள்ள 31 மாகாணங்கள் ஓய்வு பெற்றவர்களுக்கான ஓய்வூதியம் மற்றும் உறுதியளிக்கப்பட்ட சலுகைகள் ஆகியவற்றை வழங்க முடியாத நிலையில் இருக்கின்றன. சுமார் 60 லட்சம் கோடி ரூபாய் பற்றாக்குறையில் வண்டி ஓடிக்கொண்டிருக்கிறது என்று அமெரிக்காவைச் சேர்ந்த பியூ ஆய்வு மையம் தெரிவித்துள்ளது. ஓய்வு பெறும் நிலையில் இருக்கும் அமெரிக்கர்களில் பெரும்பாலானவர்கள், தங்களுக்குத் தேவையான பணம் ஓய்வுக்காலத்தில் இருக்காது என்ற அச்சத்தில் இருப்பதாக காலப் ஆய்வறிக்கை தெரிவிக்கிறது.

2012 ஆம் ஆண்டு நடைபெறவிருக்கும் ஜனாதிபதித் தேர்தலில் யார் வெற்றி பெற்றாலும், அவருடைய ஆட்சிக்காலத்திலேயே பொருளாதாரத்தில் முதலிடம் என்ற அந்தஸ்தை இழக்கக்கூடியவராகவே இருப்பார் என்று சர்வதேச நிதியம்(ஐ.எம்.எப்) சுட்டிக்காட்டியுள்ளது. 2016 ஆம் ஆண்டில் அமெரிக்காவை சீனா முந்திவிடும் என்று பல்வேறு கணிப்புகள் எடுத்துக்காட்டியுள்ளன.