விடுதலைப் புலிகள் தமிழக மீனவரை கொலை செய்த கதை! சென்சிடிவ் விக்கிலீக்ஸ் கேபிள்!

தமிழகத்தில் இலங்கை தமிழர் விவகாரத்தை வைத்து, தி.மு.க. உட்பட அனைத்துக் கட்சிகளும் அரசியல் செய்து கொண்டிருக்கும் நேரத்தில் விநோதமான ஒரு சிக்கல். இந்த நேரத்தில் பார்த்து விக்கிலீக்ஸின் சென்சிட்டிவ்வான கேபிள் ஒன்று வெளியாகியுள்ளது. தி.மு.க.வுக்கும், அதன் தலைவர் கருணாநிதிக்கும் சங்கடமான விவகாரம் இது. “தமிழக மீனவர்களை கடத்தி படுகொலை செய்தது தமிழீழ விடுதலைப் புலிகள் இயக்கத்தினர்தான் என்று தமிழக சட்டசபையில் முதல்வராக இருந்தபோது கருணாநிதி அறிவித்தது ஆச்சரியமானது” என்று அமெரிக்க தூதரகம் கருத்து தெரிவித்திருக்கும் ஆவணங்களை விக்கிலீக்ஸ் வெளியிட்டிருக்கிறது. இந்த விவகாரம், 2007-ம் ஆண்டில் நடந்தது. அந்த ஆண்டில் கன்னியாகுமரி மாவட்டத்தைச் சேர்ந்த 5 மீனவர்கள் படுகொலை செய்யப்பட்டனர். 12 மீனவர்கள் கடத்தப்பட்டனர். இந்த மீனவர்களை கடத்தியதும் படுகொலை செய்ததும் இலங்கை கடற்படை அல்ல, விடுதலைப் புலிகள் இயக்கத்தினர் தான் என்று அப்போது சட்டசபையில் தி.மு.க. தலைவர் கருணாநிதி பேசியிருந்தார். அப்போது, அவர்தான் முதல்வர். இலங்கையில் யுத்தம் நடந்து கொண்டிருந்தது.

கருணாநிதியின் இந்தக் கூற்றை, சென்னையில் உள்ள அமெரிக்க தூதரகம் பதிவு செய்து டில்லி, கொல்கத்தா, மும்பை, கொழும்பு ஆகிய இடங்களில் உள்ள அமெரிக்க தூதரகங்களுக்கும், வாஷிங்டனுக்கும் அனுப்பி வைத்திருக்கிறது. இதில் ஏதும் ரகசியம் கிடையாது. அப்போதைய முதல்வர் கருணாநிதி, சட்டசபையில் பகிரங்கமாக செய்த அறிவிப்புதான் அது.
அமெரிக்க தூதரகம் அனுப்பி வைத்த அந்த ஆவணங்களை விக்கிலீக்ஸ் தற்போது பகிரங்கப்படுத்தியிருக்கிறது.
அமெரிக்க தூதராக ஆவணம் சொல்வது என்ன?
“(2007-ம் ஆண்டு) மார்ச் 29ம் தேதியன்று தமிழ்நாடு மீனவர்கள் 5 பேரை தமிழீழ விடுதலைப் புலிகள்தான் சுட்டுக் கொன்றனர் (இலங்கை கடற்படை அல்ல) என்று அறிவிக்கப்பட்டிருப்பதன் மூலம், தமிழகத்தில் உள்ள விடுதலைப் புலி ஆதரவாளர்கள் வாயடைக்கப்பட்டுள்ளனர்.
தமிழகத்தின் இந்தக் குற்றச்சாட்டு உறுதியானால், தமிழகத்தில் புலிகளுக்கான ஆதரவு மீண்டும் குறைய வாய்ப்பிருக்கிறது. ஏற்கனவே, 1991-ம் ஆண்டு ராஜிவ் காந்தி படுகொலையின் பின் விடுதலைப் புலிகளின் ஆதரவு தமிழகத்தில் பாதிப்புக்குள்ளானது.
“தமிழக மீனவர் படுகொலைக்கு புலிகளே பொறுப்பு” என்று ஆளும் தி.மு.க. கூறியிருப்பதன் மூலம், அந்த பயங்கரவாத அமைப்புக்கு எதிராக கடும் நிலைப்பாட்டை அக்கட்சி மேற்கொள்ளக் கூடும். இதன் மூலம் காங்கிரஸ் கட்சியுடனான தி.மு.க. உறவு வலுப்படும்.

ஏப்ரல் 27-ம் தேதியன்று தமிழக காவல்துறை தலைவர் முகர்ஜி தமது அதிகாரப்பூர்வ ஊடக அறிக்கையில், விடுதலை புலிகளின் கடற்படை பிரிவான கடல் புலிகள், மார்ச் 29-ம் தேதியன்று 5 தமிழக மீனவர்களை சுட்டுக் கொன்றதாக தெரிவித்திருந்தார்.

அவரது அறிக்கையில், ஏப்ரல் 11-ம் தேதியன்று இந்திய கடலோர காவல்படையால் கைது செய்யப்பட்ட 6 கடற்புலிகளை விசாரித்தபோது, மீனவர்களை படுகொலை செய்ததை ஒப்புக் கொண்டிருக்கின்றனர் என்று தெரிவிக்கப்பட்டுள்ளது.

வடக்கு இலங்கைப் பகுதியில் புலிகளின் கப்பலில் இருந்து ஆயுதங்களை இறக்கும்போது மீனவர்களை கொன்றதாக கடற்புலிகள் கூறியதாகவும் அந்த அறிக்கையில் கூறப்பட்டுள்ளது.

மேலும் 12 மீனவர்கள் (11 தமிழக மீனவர்கள், ஒருவர் கேரளா மீனவர்) மார்ச் 4-ம் தேதி முதல் காணாமல் போயினர். அவர்களும் புலிகளின் முகாம் ஒன்றில் தடுத்து வைக்கப்பட்டுள்ளதாகவும் முகர்ஜி கூறியுள்ளார்.

ஏப்ரல் 28-ம் தேதி முதல்வர் கருணாநிதி சட்டசபையில் இந்த செய்தியை உறுதிப்படுத்தினார்.

“மீனவர் படுகொலைக்கு இலங்கை கடற்படைதான் காரணம் என்று தொடக்கத்தில் நாம் கருதிக் கொண்டிருந்தோம். ஆனால் இந்த படுகொலைக்கு விடுதலைப் புலிகளே காரணம் என்ற அதிர்ச்சியான தகவலை வருத்தத்தோடு தெரிவிக்கிறேன். மேலும் கடத்தப்பட்ட 12 மீனவர்களையும் விடுவிக்க மத்திய அரசு மூலமாக அனைத்து நடவடிக்கைகளையும் எடுத்து வருகிறேன்” என முதல்வர் கருணாநிதி சட்டமன்றத்தில் உறுதியளித்தார்.

அதற்கு முந்தைய நாள் சட்டசபையில் பேசிய கருணாநிதி, “நாம் விடுதலைப் புலிகளை ஆதரிக்கவில்லை. அவர்களுக்கு இங்கே (தமிழகத்தில்) இடம் இல்லை. அவர்கள் இங்கே எந்த ஒரு நடவடிக்கையிலும் ஈடுபடவில்லை. அவர்களது குறிக்கோளும் நோக்கமும் வேறுபட்டதாக இருக்கிறது” என்று கூறியிருந்தார்.

மேலே குறிப்பிடப்பட்ட விஷயங்கள், தி.மு.க., மற்றும் அதன் தலைவர் கருணாநிதி பற்றியது. அமெரிக்க கேபிளில் பிற விஷயங்களும் உள்ளன. இதோ, அந்த விபரங்கள்:

தமிழக காங்கிரஸ் கட்சி, தடை செய்யப்பட்ட (விடுதலைப் புலிகள்) இயக்கத்துக்கு ஆதரவாக தொடர்ந்து அறிக்கைகளை வெளியிட்டு வரும் ம.தி.மு.க. பொதுச் செயலாளர் வைகோவை கைது செய்ய கோரியுள்ளது. இந்த விவகாரம் தொடர்பாக முதல்வர் மத்திய அரசுடன் ஆலோசிப்பார்.

(தமிழகத்தில், ஜெயலலிதா தலைமையிலான அ.தி.மு.க. ஆட்சிக் காலத்தில், விடுதலைப் புலிகளை ஆதரித்துப் பேசியதற்காக ஜூலை 2002 முதல் பிப்ரவரி 2004 வரை பொடா சட்டத்தின் கீழ் கைது செய்யப்பட்டு சிறையில் அடைக்கப்பட்டிருந்தார். மாநில அரசு பின்னர் அவர் மீதான குற்றச்சாட்டுகளை விலக்கிக் கொண்டது) என்று விரிகிறது அந்த அமெரிக்க தூதரகத்தின் ஆவணம்.
இவற்றை தவிர, தி ஹிந்து நாளிதழ் எழுதிய தலையங்கம் ஒன்றையும் அந்த ஆவணம் சுட்டிக்காட்டுகிறது.

“மத்திய அரசின் வெளியுறவுக் கொள்கை, டில்லியில்தான் முடிவெடுக்கப்பட வேண்டுமே தவிர சென்னையில் அல்ல” என்பதை வலியுறுத்துகிறது அந்த தலையங்கம்.

அதே நேரத்தில், கருணாநிதிக்கு சாதகமான ஒரு வாக்கியமும் அமெரிக்க கேபிளில் உள்ளது. “இலங்கைத் தமிழர்களுக்கு ஆதரவாக பேசும் தி.மு.க., இலங்கைக்கு ‘நேரடியாக’ இந்திய அரசு ராணுவ உதவி அளிப்பதை ஆதரிக்காது” என்பதே அமெரிக்க தூதரக ஆவணம் பதிவு செய்துள்ள கருணாநிதிக்கு சாதகமான வாக்கியம்.

இந்த இடத்தில், முக்கியமான ஒரு விஷயத்தை இணைத்துப் பார்ப்பது அவசியம்.

மேலேயுள்ள கேபிள் அனுப்பி வைக்கப்பட்ட அதே காலப்பகுதியில்தான், விடுதலைப் புலிகளின் ஆயுதக் கப்பல்களை ஒவ்வொன்றாக, நடுக் கடலில் வைத்து அழித்தது இலங்கை கடற்படை. விடுதலைப் புலிகளின் ஆயுதக் கப்பல்களை அடையாளம் காட்டியது, சாட்சாத் அமெரிக்காதான்.

(விறுவிறுப்பு)