சிவாஜிலிங்கத்தின் சின்னத்தனம்!

(ஊரிக்காட்டான்)

தனது தவறான நடைமுறைகளால் இந்தியாவுக்குச் செல்ல முடியாமல் சென்னை விமான நிலையத்தில் திருப்பி அனுப்பப்பட்ட சிவாஜிலிங்கம், தற்போது இலங்கையில் செய்து வரும் குளறுபடியான வேலைகளால், கிழக்கு மாகாணத்துக்கும், முஸ்லீம் பகுதிகளுக்கும் செல்ல முடியாத நிலை ஏற்பட்டாலும் ஆச்சரியப்படுவதற்கில்லை. தமிழரசுக் கட்சியின் ஆயுட்காலத் தலைவராக இருந்த சாமுவேல் ஜேம்ஸ் வேலுப்பிள்ளை செல்வநாயகத்தின் நினைவு தினம் நேற்று முன்தினம் யாழ் நகரில் கொண்டாடப்பட்ட பொழுது, அதில் சிறப்பு அதிதியாகக் கலந்து கொள்வதற்கு சிறீலங்கா முஸ்லீம் காங்கிரசின் தலைவரும், அமைச்சருமான ரவூப் ஹக்கீம் அவர்களும் அழைக்கப்பட்டிருந்தார்.

'தந்தை செல்லா அறங்காவல் குழு' என்ற அமைப்பே இந்த நிகழ்வை ஏற்பாடு செய்திருந்தது. செல்வநாயகத்தின் புதல்வர் எஸ்.ஸி.சந்திரஹாசன் பல வருடங்களாக தமிழகத்தில் தங்கியிருந்து 'ஈழத் தமிழ் ஏதிலியர் புனர்வாழ்வு அமைப்பு' என்ற தன்னார்வத் தொண்டு நிறுவனம் ஒன்றை நடாத்திவிட்டு, இலங்கையில் போர் முடிவுற்ற பின்னர் இலங்கை திரும்பி, 'தமிழ் கட்சிகளின் அரங்கம்' என்ற தமிழ் அரசியல் கட்சிகளின் ஒற்றுமை அமைப்பை உருவாக்குவதில் முன்னின்று உழைத்தார்.

ஆனால் சில மாதங்களே உயிர்வாழ்ந்த அந்த அமைப்பை, தமிழ் தேசியக் கூட்டமைப்பும், தமிழ் விரோதிகளும் உள்ளிருந்து உடைத்து சீர்குலைத்த பின்னர், சந்திரஹாஸன் நேரடி அரசியல் ஈடுபாடுகள் அற்று தெல்லிப்பழையிலுள்ள தமது பூர்வீக வீட்டில் குடியேறி வாழ்ந்து வருவதுடன், தனது தந்தையாரான எஸ்.ஜே.வி.செல்வநாயகத்தின் நினைவு நிகழ்வையும் சிறப்பாக நடாத்தி வருகின்றார்.

சென்ற வருடம் செல்வநாயகம் நினைவு தினத்திற்கு மட்டக்களப்பின் 'முடிசூடா மன்னன்' என ஒரு காலத்தில் தமிழரசுக் கட்சியால் வர்ணிக்கப்பட்டு, பின்னர் தமிழரசுக் கட்சி செய்த துரோகத்தால் அதிலிருந்து விலகி ஐக்கிய தேசியக் கட்சியில் இணைந்து அமைச்சரானதற்காக 'தமிழினத்தின் துரோகி' என அதே தமிழரசுக் கட்சியால் வர்ணிக்கப்பட்ட செல்லையா இராசதுரையை சந்திரஹாஸன் அழைத்திருந்தார்.

அந்த வைபவம் நடந்து கொண்டிருக்கும் போது அங்கு அழையா விருந்தாளியாக நுழைந்த ரெலோ இயக்கத்தின் பிரமுகரும், முன்னாள் பாராளுமன்ற உறுப்பினரும், புலிகளின் தீவிர ஆதரவாளருமான எம்.கே.சிவாஜிலிங்கம், இராசதுரையை தூசண வார்த்தைகளாலும், 'துரோகி' என்ற சொற்பதத்தாலும் திட்டி அவமதித்ததுடன், கிழக்கு மாகாண மக்களுக்கும் வட மாகாண மக்களுக்கும் இடையில் ஆப்பு வைக்கவும் முயன்றார். அவரது இந்த அநாகரிகமான, அசிங்கமான செயலை அவரது ரெலோ இயக்கத் தலைமை உட்பட அனைவரும் அந்த நேரத்தில் கண்டித்திருந்தனர்.

இந்த வருடம் ரவூப் ஹக்கீம் அவர்களை செல்வநாயகம் நினைவு தினத்திற்கு அழைத்ததையும், சிவாஜிலிங்கம் மிகவும் அசிங்கமான முறையில் கண்டித்துள்ளார். ரவுப் ஹக்கீம் அவர்களை 'தமிழினத்தின் விரோதி' எனவும், 'சிங்களப் பேரினவாதத்தின் கைக்கூலி' எனவும் வசைபாடிய சிவாஜிலிங்கம், யாழ்ப்பாணம் அவரது பாட்டனார் கொடுத்த பூர்வீகச் சொத்து என்ற நினைப்பில், 'ஹக்கீமுக்கு யாழ்ப்பாணத்தில் என்ன வேலை?' எனவும் கேள்வி எழுப்பியுள்ளார்.

குறைந்த பட்ச அரசியல் நாகரீகம் கூட இல்லாமல் அவர் செய்துள்ள ரவூப் ஹக்கீம் மீதான கண்டனம், தமிழ் மக்களைத் தலைகுனிய வைத்துள்ளது. சிவாஜிலிங்கத்தின் சென்ற வருட நடவடிக்கை கிழக்கு மக்களையும், வடக்கு மக்களையும் பிரிக்கும் முயற்சியாக அமைந்தது. இந்த வருட நடவடிக்கை தமிழ் மக்களையும், முஸ்லீம் மக்களையும் பிரிக்கும் வகையில் அமைந்துள்ளது.

புலிகளின் தலைவரும், சிவாஜிலிங்கத்தின் ஊரவரும் (வல்வெட்டித்துறை), உறவினருமான பிரபாகரனும் இதே வேலையை, அதாவது வடக்கு தமிழ் மக்களிலிருந்து கிழக்கு மக்களையும், முஸ்லீம் மக்களையும் பிரிக்கும் வேலையைத்தான் செய்தார். அதே வேலையைத்தான் இப்பொழுது சிவாஜிலிங்கமும் செய்கிறார். பிரபாகரன் வடக்கிலிருந்து முஸ்லீம் மக்களை விரட்டியடித்து இனச் சுத்திகரிப்பு செய்த வேலையை, இப்பொழுது சிவாஜிலிங்கம் பொறுப்பெடுத்துள்ளார் போல் தெரிகிறது.

தனது தவறான நடைமுறைகளால் இந்தியாவுக்குச் செல்ல முடியாமல் சென்னை விமான நிலையத்தில் திருப்பி அனுப்பப்பட்ட சிவாஜிலிங்கம், தற்போது இலங்கையில் செய்து வரும் குளறுபடியான வேலைகளால், கிழக்கு மாகாணத்துக்கும், முஸ்லீம் பகுதிகளுக்கும் செல்ல முடியாத நிலை ஏற்பட்டாலும் ஆச்சரியப்படுவதற்கில்லை.

கட்டுரையில் உள்ள தவறு ஒன்றை சுட்டிக்காட்ட விரும்புகின்றோம். தமிழ் கட்சிகளின் அரங்கம் வரதராஜப்பெருமரின் முயற்சியினால் உருவாக்கப்பட்டது மாறாக சந்திரகாசனின் முன்முயற்சி அல்ல. ஆனால் அவரும் இதில் ஒரு முன்னணி செயற்பாட்டாளர் - ஆர்