உடப்பூரில் சித்திரை செவ்வாய் முளைக்கொட்டு

(உடப்பூர் க. மகாதேவன்)

புத்தளம் மாவட்டத்திலே பரந்து வாழும் மக்களில் தமிழ் மக்களும் ஒரு குடியினர். அந்த வகையில் தமிழ் மக்கள் கூட்டாக செறிந்து வாழும் தமிழ் கிராமம் உடப்பூராகும். இந்த கிராமத்தில் ஜீவனோபாய தொழிலாக கடற்றொழில் இருந்தாலும், இவர்கள் கலை கலாசாரத்தை கண்ணியமாக மதித்து வந்ததை இன்றும் பல கலை நிகழ்ச்சிகளின் மூலம் காணக்கூடியதாக உள்ளது.  அந்த வகையில் உடப்பு கிராமத்தில் 'சித்திரைச் செவ்வாய்' முளைக்கொட்டு வம்சாவழியாக தொன்றுதொட்டு நடைபெற்று வருகின்றது. இந்த நிகழ்ச்சி ஆரம்ப நிகழ்வுகள் ஞாயிற்றுக்கிழமை 22 ஆம் திகதி 'முளைப்பதித்தல்' மூலம் ஆரம்பிக்கப்பட்டது. தொடர்ந்து பத்து நாட்கள் நடைபெறும். இந்நிகழ்வு இறுதி நிகழ்ச்சி நாளை (2013.05.01) புதன்கிழமை காலை வேளையில் இடம்பெறும்.

உடப்பின் மாரியம்மன் வழிபாட்டின் மற்றொரு அம்சமாகச் சித்திரை மாதத்தில் திறந்த வெளி, வீடுகளின் வளவுகளில் நடத்தப்படும் சித்திரைச் செவ்வாய் விழாவை குறிப்பிடலாம். அக்கினி நட்சத்திரம் என மக்கள் குமுறுகின்ற காலம் இது. அக்கினி நட்சத்திரம் என்பது சித்திரை மாதம் அவிட்ட நட்சத்திரத்தில் இருந்து விசாக நட்சத்திரம் வரை 21 நாட்களைக் குறிக்கும்.

இக் காலப் பகுதி மிகவும் வெப்பமானது. இந்த காலத்திலேயே தமிழ் நாட்டின் மாரியம்மன் கோவில்களில் விழாக்கள் இடம்பெறும். முளை வரவிருப்பதையே இவ் வழிபாடு உணர்த்தும், அங்கு 'கோயில் திருவிழா' தொடங்கிவிட்டதை அறிவிக்க கொடி ஏற்றப்படும். அன்று முளைப்பாரி கொட்டுதல் என்ற ஒரு நிகழ்ச்சி உண்டு. கிராமத்தில் உள்ள ஒவ்வொரு குடும்பத்தாரும் குறிப்பிட்ட ஒரு இடத்தில் ஒரு குடத்தில் நெல், தானியங்கள், பயறு வகைகள், ஆகியவற்றை விதைப்பார்கள்.

எட்டாம் நாள் அந்த குடங்களை கோயிலுக்கு கொண்டு வருவார்கள். அந்த மூன்று நாட்களும் பெண்கள் பலர் சேர்ந்து மாரியம்மன் புகழை கும்மியடித்துப் பாடுவார்கள். பிறகு வணக்க ஒடுக்கமாக பானைகளை வலம் வருவர். திருவிழாவின் இறுதியில் அருகே உள்ள குளம் அல்லது ஆற்றில் பானைகளை மூழ்கடித்து விடுவர்.

அந்த கூற்றுக்களிலிருந்து தமிழ் நாட்டு வழிபாட்டு சடங்குகளின் ஒரு கூறு சிற்சில மாறுதல்களுடன் சித்திரைச் செவ்வாய் விழாவாக பின்பற்றப்பட்டு வருவது புலப்படுகின்றது. இச்சடங்கு நிகழ்ச்சி வழிபாடு தொடர்பானதாக இருக்கின்றமையால் அவ்வேளையில் பாடப்படும் பாடல்களும் வழிபாடு தொடர்புடையனவாக அமைகின்றன.

இச்சடங்கின் போது கும்மி ஆட்டத்துடன் பாடலும் இடம்பெறுகின்றது. இச்சடங்கு நிகழ்ச்சியின் போது நவதானியங்கள் முளைக்க வைத்தல் ஒரு முக்கிய நிகழ்ச்சியாக உள்ளது. முளைக்க வைக்க தேவையான நவதானியங்களை வீடு வீடாக சென்று பெற்றுக்கொண்டனர். அவ்வாறு நவதானியங்களை பெற்றுக்கொள்ளும் சந்தர்ப்பங்களில் அதற்குரிய பாடலை பாடினர்.

தற்பொழுது வீடு வீடாகச் சென்று நவதானியங்கள் பெறும் நிகழ்ச்சி மறைந்து வருகின்றது. மாரியம்மனுக்காக கொண்டாடப்படும் இச்சடங்கில் நவதானியங்களின் வளர்ச்சி மிக முக்கியமானதொன்றாக கருதப்படும். குறிப்பிட்ட 10 தினங்களில் நவதானியங்கள் நன்கு வளர்ச்சியடைந்திருப்பின், அம்மன் அருள் பாலித்துள்ளார் என்று கூறப்படுகின்றது.

நவதானியங்களுக்காக கடலை, பயறு, கானா, எள்ளு, கொள்ளு, இறுங்கு, நெல், குரக்கன், தினை போன்றவற்றை தெரிவு செய்வர். நவதானியங்களை பாலிகைச் சட்டியில் உரமிட்டு சானம் நிரப்பி பதித்து தூப தீபம் காட்டி காலையும் மாலையும் நீர் ஊற்றுவார்கள். இவற்றுக்கு 10 வயதிற்குட்பட்ட கன்னிப் பெண்கள் நீர் ஊற்றி பக்குவமாக வளர்ப்பார்கள்.

இறுதி நாளுக்கு முந்திய செவ்வாய்க்கிழமை இரவு மாரியம்மனுக்கு வேப்பிலை வைத்து அதற்குரிய பலகாரம், கனிகள் வைத்த அன்று இரவு தொடங்கி விடியும் வரை ஆண்களும், பெண்களும், பிள்ளைகளும் கும்மிகொட்டிக் கொண்டாடுவார்கள். இதனை செவ்வாய் கொட்டுதல் என்று அழைப்பார்கள். இறுதி நாள் புதன்கிழமை காலை கொழுக்கட்டை, கனி, பொங்கல் ஆகிய நெய்வேத்தியங்களை படையல் செய்து பூசை வைத்து வழிபடுவார்கள்.