இளவயது கர்ப்பம் தற்போது சமூகப் பிரச்சினையாக மாறியுள்ளது

கிராமங்களில் விழிப்புணர்வை ஏற்படுத்த கல்வித் திணைக்களத்துடன் இணைந்து இலங்கை குடும்பத் திட்டச் சங்கம் விழிப்புணர்வு நடவடிக்கை

குடும்ப சுகாதாரப் பணியகத்தின் ஆய்வின்படி இலங்கையில் இளம் வயதில் கர்ப்பம் தரிக்கும் வீதம் அதிகரித்துள்ளதாக தெரிவிக்கப்படுகின்றது. இதற்கு இளவயதில் திருமணங்கள் செய்வதும் ஒரு காரணமாகும். இளவயது கர்ப்பங்கள் அதிகமாக மட்டக்களப்பிலே காணப்படுகின்றன. கடந்த கால போர்ச்சூழலால் மிகவும் மோசமாகப் பாதிக்கப்பட்ட மாவட்டம் மட்டக்களப்பு மாவட்டமாகும். அரசாங்கத்தினால் அபிவிருத்தி கண்டுவரும் மாவட்டங்களில் இம்மாவட்டம் முதலிடம் வகிக்கின்றது. இம்மாவட்டத்திலுள்ள மக்களின் வறுமையை இல்லாதொழிப்பதற்கு அரசு பெருந்தொகை பணத்தை இவ்வருடம் ஒதுக்கீடு செய்துள்ளது. இங்குள்ள எல்லைப்புறங்களில் வாழும் மக்கள் இன்னும் அடிப்படை வசதிகளற்ற நிலையில் வாழ்ந்து வருகின்றனர்.

இந்நிலையில் சமீப காலமாக இங்கு இளவயது கர்ப்பம் பற்றி அதிகமாகப் பேசப்பட்டு வருகின்றது. எல்லைப்புறங்களில் வாழும் மக்களில் பலர் தங்களது பிள்ளைகளுக்கு இளவயதிலே திருமணம் முடித்து வைக்கின்றனர். இதற்கு வறுமையும் ஓர் காரணமாகும். மேலும் இளவயதில் திருமணங்கள் செய்வதால் ஏற்படும் பாதிப்புகள் பற்றியும் அறியாமல் இருக்கின்றனர்.

இதனைத் தடுப்பதற்காகவும், மாணவர்கள் மத்தியில் விழிப்புணர்வை ஏற்படுத்துவதற்காகவும், கல்வித் திணைக்களத்துடன் இணைந்து இலங்கை குடும்பத்திட்டச் சங்கம் விழிப்புணர்வு நிகழ்வுகளை முன்னெடுத்து வருகின்றது.

13 வயதுக்கும் 19 வயதுக்கும் இடைப்பட்ட சிறுவர்களே சரியான வழிநடத்தல், ஆலோசனைகள் வழங்கப்படாத காரணத்தால் தங்கள் எதிர்காலத்தையே இளவயதில் காதல், கல்யாணம் எனச் சென்று பாழாக்கிக் கொள்கின்றனர். இது பெரும் கவலை தரக்கூடிய செயலாகும். கடந்த கால யுத்தத்தின் போது இழப்புகளுக்கு முகம் கொடுத்த சமூகம். இன்று இவ்வாறான செயல்கள் காரணமாக மீண்டும் வறுமை நிலைக்குத் தள்ளப்பட்டுள்ளது. பெற்றோர்கள் பிள்ளைகள் மீது காட்டாத கரிசனையினால் இளவயது திருமணம், கர்ப்பம் என்கின்ற முள்வேலிக்குள் சிக்கிக் கொள்கின்றனர்.

இளவயதில் கர்ப்பம் தரிப்பதற்கான காரணங்கள்:

மாணவர்கள் பாடசாலையை விட்டு இடைவிலகல், கூட்டுக் குடும்பத்தில் வசிப்பவர்கள், தாய். தந்தையற்றவர்கள், தாய் வெளி நாட்டில் தொழில் புரிபவர், வீட் டில் அதிகமாக ஆண்கள் வந்து செல்லல், கையடக்கத் தொலை பேசி பாவித்தல், கட்டுப்பாடற்ற முறையில் ஆண்களுடன் பழகுதல், பெற்றோர் பொறுப்பற்றிருத்தல், வீட்டு அங்கத்தவரிடையே மதுபாவனை மற்றும் போதைவஸ்து பாவனை காணப்படல், பாலியல் நாட்டம் கூடியவராய் இருத்தல், சுற்றுப்புறச் சூழல்.

இது போன்ற காரணிகளே இளவயதில் கர்ப்பம் தரிப்பதற்கான சூழ் நிலைகளையும், வாய்ப்புகளையும் ஏற்படுத்துவதாக ஆய்வுகளின்படி தெரியவருகின்றது.

தடுக்கும் வகைகள்

முறையற்ற பாலியல் தொடர்புகளை தவிர்த்தல், இளவயதினரை உன்னிப்பாகக் கவனித்தல், முடிந்தவரை குடும்பத் திட்டம் ஒற்றை நடைமுறைப்படுத்தல், சமுதாய விழுமியங்களை எடுத்துரைத்தல், சமயம் மற்றும் கிராமிய பெரியவர்களின் உதவியை நாடுதல், சுகாதார வைத்திய அதிகாரியின் கவனத்துக்குக் கொண்டு செல்லுதல், சட்ட ரீதியான நிலைப்பாட்டை விளங்கப்படுத்தல் போதைப்பொருள் பாவனையைத் தவிர்த்தல், சிந்தனைகளை ஆன்மீக ரீதியில் வளப்படுத்தல், கல்வியில் குறிக்கோளை நோக்கி நகர்த்தல், சமூகம், சமயம் சார்ந்த விடயங்களில் விழிப்புணர்வைப் பெற்றிருத்தல் போன்றவற்றை கவனத்தில் எடுப்பதன் மூலம் இளவயது கர்ப்பிணிகளைத் தடுக்க முடியும்.

அத்துடன் பிராந்தியங்களிலுள்ள குடும்ப நல சுகாதாரப் பணிமனைகள், இளவயது கர்ப்பம் தரிக்கும் தாய்மார்கள் குறித்து அவதானிப்புகளை மேற்கொள்ள வேண்டும். மேலும் கர்ப்பம் தரித்தமைக்கான காரணம். உரியநபர் மற்றும் நபர்களைப் பற்றித் தெளிவாக அறிதல், வன்முறைக் கர்ப்பம் தரித்தல், வைத்திய மற்றும் சட்ட முறைக்குட்படுத்தல் போன்ற பல்வேறு விடயங்களையும் சுகாதாரப் பணியாளர்கள் செய்து வருகின்றமை குறிப்பிடத்தக்கது.

மாணவர்களின் கல்வியில் பாதிப்பை ஏற்படுத்தும் இளவயது திருமணங்கள் மற்றும் இளவயது கர்ப்பங்கள் தொடர்பில் அரசினதும், அரச சார்பற்ற நிறுவனங்களினதும் பார்வை திரும்ப வேண்டும். அதுவும் 13 தொடக்கம் 19வயதுக்குட்பட்டவர்களது இளவயது கர்ப்பம் பற்றிய விழிப்புணர்வு அவசியம் வழங்கப்பட்ட வேண்டும்.