உடப்பு கிராமத்துக்கென்றே தனித்துவமான சித்திரைச் செவ்வாய் முளைக்கொட்டு விழா

(உடப்பூர் க. மகாதேவன்)

புத்தளம் மாவட்டத்திலே பரந்து வாழும் மக்களில் தமிழ் மக்களும் ஒரு குடியினர் அந்த வகையில் தமிழ் மக்கள் கூட்டாக செறிந்து வாழும் தமிழ் கிராமம் உடப்பூராகும். இந்தக் கிராமத்தில் ஜீவனோபாய தொழிலாகக் கடற்றொழில் உள்ளது. இவர்கள் கலை கலாசாரத்தைக் கண்ணியமாக மதித்து வந்ததை இன்றும் பல கலை நிகழ்ச்சியின் மூலம் காணக்கூடியதாக உள்ளது. அந்த வகையில் உடப்புக் கிராமத்தால் ‘சித்திரைச் செவ்வாய் முளைக்கொட்டு’ வம்சாவளியாக தொன்று தொட்டு நடைபெற்று வருகிறது. இந்நிகழ்ச்சி எதிர்வரும் ஞாயிற்றுக்கிழமை (20)ம் திகதி ‘முளைப்பதித்தல் மூலம்’ ஆரம்பமாகவுள்ளது. தொடர்ந்து பத்து நாட்கள் நடைபெறும் இந்நிகழ்வின் இறுதி நிகழ்ச்சி எதிர்வரும் 30ஆம் திகதி புதன்கிழமை காலை வேளையில் இடம்பெறும்.

உடப்பில் மாரியம்மன் வழிபாட்டின் மற்றொரு அம்சமாகச் சித்திரை மாதத்தில் திறந்தவெளி வீடுகளின் வளவுகளில் நடத்தப்படும் சித்திரைச் செவ்வாய் விழாவைக் குறிப்பிடலாம். அக்கினி நட்சத்திரம் என மக்கள் குமுறுகின்ற காலம் இது. அக்கினி நட்சத்திரம் என்பது சித்திரை மாதம் அவிட்ட நட்சத்திரத்தில் இருந்து விசாக நட்சத்திரம் வரை 21 நாட்களைக் குறிக்கும். இக்காலப் பகுதி மிகவும் வெப்பமானது இந்தக் காலத்திலேயே தமிழ் நாட்டில் மாரியம்மன் கோவில்களில் விழாக்கள் இடம்பெறும். மழை வர விருப்பதையே இவ்வழி பாடு உணர்த்தும். அங்கு கோயில் திருவிழா தொட ங்கி விட்டதை அறிவிக்க கொடி ஏற்றப்படும். அன்று முளைப்பாரி கொட்டுதல் என்ற ஒரு நிகழ்ச்சி உண்டு.

கிராமத்தில் உள்ள ஒவ் வொரு குடும்பத்தாரும் குறிப்பிட்ட ஓரிடத்தில் ஒரு குடத்தில் நெல் தானி யங்கள், பயறு வகைகள் ஆகியவற்றை விதைப் பார்கள். எட்டாம் நாள் அந்தக் குடங்களை கோயி லுக்குக் கொண்டு வருவார் கள். அந்த மூன்று நாட்க ளும் பெண்கள் பலர் சேர்ந்து மாரியம் மன் புகழைக் கும்மியடித்துப் பாடுவார் கள். பிறகு வணக்க ஒடுக்கமாக பானைகளை வலம் வருவர். திருவிழா வின் இறுதியில் அருகேயுள்ள குளம் அல்லது ஆற்றில் பானைகளை மூழ் கடித்து விடுவர். இந்தக் கூற்றுக்களிலி ருந்து தமிழ் நாட்டு வழிபாட்டுச் சடங்குகளின் ஒரு கூறு சிற்சில மாறு தல்களுடன் சித்திரைச் செவ்வாய் விழாவாகப் பின் பற்றப்பட்டு வருவது புலப்படுகின்றது. இச்சடங்கு நிகழ்ச்சி வழிபாடு தொடர்பானதாக இருக்கின்ற மையால் அவ்வேளையில் பாடப்படும் பாடல்களும் வழிபாடு தொடர்புடையன வாக அமைகின்றன. இச்சடங்கின் போது கும்மி ஆட்டத்துடன் பாடலும் இடம்பெறுகின்றது.

இச்சடங்கு நிகழ்ச்சியின் போது நவதானியங்கள் முளைக்க வைத்தல் ஒரு முக்கிய நிகழ்ச்சியாக உள்ளது. முளைக்க வைக்கத் தேவையான நவதானியங்களை வீடு வீடாகச் சென்று பெற்றுக் கொண்டனர். அவ் வாறு நவதானியங்களைப் பெற்றுக் கொள்ளும் சந்தர்ப்பங்களில் அதற்குரிய பாடலைப் பாடினர்.

கன்னிப் பெண்கள் வீடு வீடாகச் செல்லும் போது இவ்வாறு பாடுவர்.

“கடலை சிறு பயறு.... கானா மணிப்பயறு... தங்கமுத்து நாச்சியார்க்கு .... எங்கும் சிறு பயறு....”

மாரியம்மனுக்காகக் கொண்டாடப்படும் இச் சடங்கில் நவதானியங்களின் வளர்ச்சி மிகவும் முக்கிய மானதொன்றாகக் கருதப் படும். குறிப்பிட்ட பத்து தினங்களில் நவதானியர்கள் நன்கு வளர்ச்சியடைந்திருப் பின் அம்மன் அருள் பாலித் துள்ளார் என்று கூறப்படு கின்றது. நவதானியங்க ளுக்கான கடலை, பயறு கானா எள்ளு. கொள்ளு. இறுங்கு, நெல், குரக்கன். தினை போன்றவற்றைத் தெரிவு செய்வர். நவதானி யங்களை பாலிகைச்சட்டியில் உரமிட்டு சாணம் நிரப்பி பதித்து தூப தீபம் காட்டி காலையும் மாலையும் நீர் ஊற்று வார்கள். இவற்றுக்கு பத்து வய துக்குட்பட்ட பெண்கள் நீர் ஊற்றி பக்குவமாக வளர்ப்பார்கள். இறுதி நாளுக்கு முந்திய செவ்வாய்க்கிழமை இரவு மாரியம்மனுக்கு வேப்பிலை கும்பம் வைத்து அதற்குரிய பல காரம் கனிகள் வைத்து அன்று இரவு தொடங்கி விடியும் வரை ஆண்களும் பெண்களும் பிள்ளை களும் கும்மி கொட்டி கொண்டா டுவார்கள்.

இதனை ‘செவ்வாய்க் கொட்டுதல்’ என்று அழைப்பார்கள். இறுதி நாள் புதன்கிழமை காலை கொழு க்கட்டை, கனி, பொங்கல் ஆகிய நெய்வேத்தியங்களை படையல் செய்து பூஜை வைத்து வழிபடுவார் கள். அத்துடன் தேர் வடிவத்தில் அழகான பெட்டி செய்து பல வர்ண நிற ஓலைகளால் அலங்கரித்து அதற்குள் செவ்வாய் என்னும் பல காரம் வைத்து அத்துடன் சோறு பொரி யல் வைத்து படையல் வைப்பார்கள்.

செவ்வாய் இரவு வைத்த இந்த படையல்களை புதன்கிழமை காலையில் எடுத்து வீடுகளுக்கு கொண்டு போய் உண்பார்கள். செவ்வாய்க்கிழமை புதன்கிழமைகளில் சித்திரைச் செவ்வாய் கொட்டும் போது, “ஓராம் நாள் முளை எழுந்து ஓங்கி வளருமாம் மாரிமுளை ஈராம் நாள் முளை எழுந்து இரட்டனம் கொட்டுமாம் மாரிமுளை” என்று தொடங்கும் பாடலானது குறிப்பிட்ட பத்து நாட்களுக்குள்ளும் முளைக்க வைத்த நவதானியங்களின் வளர்ச்சி பற்றி கூறுவதாக அமைகின்றது.

சித்திரை மாதத்தில் வெப்பம் நிறை ந்த காலப் பகுதியாகும். இக்காலகட் டத்தில் அம்மை நோய் கூடுதலாக வருவதுண்டு. இந்நோயை இல்லாது செய்வதற்கு மாரியம்மனுக்கு செய்யும் ஒரு நேர்த்தியாகவும் இதை உடப்புக் கிராம மக்கள் கருதி செய்கின்றனர் எனலாம். இந்த நிகழ்வானது இக்கால கட்டத்தில் பெண்கள் ஒரே வர்ணச்சேலை அணிந்து வரிசையாக வலம் வந்து இரு கைகளாலும் ஓசை உண்டாக்கி செவ்வாய்க் கொட்டுவார்கள். இந்தக் கண்கொள்ளாக் காட்சி எமது கிராமத்தில் மட்டும் பார்ப்பவரை மிகவும் கவரும் வண்ணம் நடைபெறு கின்றது என்லாம். இந்தச் சித்திரைச் செவ்வாய் சடங்கு நிகழ்ச்சி இலங்கை யில் ஏனைய பிரதேசங்களில் இருப் பதாக அறிய முடியவில்லை. ஆனால் இதனுடன் தொடர்புடையதாக இந்தி யாவில் இராமநாதபுர மாவட்டத்தில் நடைபெறும் முளைப்பாரி சடங்கு நிகழ்ச்சி காணப்படுவதாக அறிய முடிகின்றது.