பாரதிய ஜனதா - ஐக்கிய ஜனதா தள் பிஹார் மாநிலத்தில் தனி வழியா?

(கேவியெஸ்)

பாரதிய ஜனதா கட்சியின் தலைமையிலான தேசிய ஜனநாயகக் கூட்டமைப்பில் ஐக்கிய ஜனதா தள் ஒரு பிரதான உறுப்புக் கட்சி. இரண்டு கட்சிகளும் பிஹார் மாநிலத்தில் கூட்டரசாங்கம் அமைத்திருக்கின்றன. ஐக்கிய ஜனதா தள்ளைச் சேர்ந்த நிதிஷ் குமார் முதலமைச்சராகவும் பாரதிய ஜனதா கட்சியைச் சேர்ந்த சுசில் குமார் மோடி பிரதி முதலமைச்சராகவும் பதவி வகிக்கின்றார்கள். பிஹார் மாநிலத்தில் இரண்டு கட்சிகளுக்கும் இடையிலான உறவில் இப்போது விரிசல் ஏற்பட்டிருக்கின்றது. மாநிலத்தில் எதிர்வரும் நவம்பரில் அல்லது டிசம்பரில் சட்ட சபைத் தேர்தல் நடைபெறும். அதற்கிடையே இரண்டு கட்சிகளும் தனித்தனி வழி செல்லக்கூடிய சூழ்நிலை உருவாகி வருகின்றது. பாரதிய ஜனதா கட்சியின் தேசிய நிறைவேற்றுக் குழுக் கூட்டத்துடனேயே இரண்டு கட்சிகளுக்குமிடையே இடைவெளி தோன்றத் தொடங்கியது.

பாரதிய ஜனதா கட்சியின் தேசிய நிறைவேற்றுக் குழுக் கூட்டம் பிஹார் தலைநகரமான பட்னாவில் ஜூன் 12ஆம், 13ஆம் திகதிகளில் நடைபெற்றது.

இக் கூட்டம் நடைபெற்ற இரண்டு நாட்களும் பிஹார் பத்திரிகைகளில் பெரிய அளவிலான பாரதிய ஜனதா கட்சி விளம்பரங்கள் வெளியாகின. எல்லா விளம்பரங்களிலும் நரேந்திர மோடிக்குக் கூடுதலான முக்கியத்துவம் கொடுக்கப்பட்டிருந்தது.

பாரதிய ஜனதா கட்சி இப்போது தேசிய மட்டத்தில் குஜராத் முதலமைச்சர் நரேந்திர மோடியை முன்னிலைப்படுத்துகின்றது. கடந்த பொதுத் தேர்தலில் அத்வானியின் தலைமை சோபிக்கவில்லை. தேர்தல் பிரசாரம் நடந்து கொண்டிருந்த வேளையிலேயே சில கட்சி முக்கியஸ்தர்கள் நரேந்திர மோடியைப் பிரதமர் வேட்பாளராக அறிவிக்க வேண்டும் என்ற கோரிக்கையை முன்வைத்தனர். இப்போது நரேந்திர மோடி எல்லா மட்டங்களிலும் முன்னிலைப்படுத்தப்படுகின்றார்.

பிஹார் பத்திரிகைகளில் வெளியாகிய பெரும்பாலான விளம்பரங்களில் நரேந்திர மோடியும் நிதிஷ் குமாரும் ஒன்றாக நிற்பது போன்ற படங்கள் இருந்தன. இது போன்ற ‘கட் அவுட்’டுகளும் காணப்பட்டன. நரேந்திர மோடியுடன் தன்னை இணைத்து வெளியாகிய விளம்பரங்கள் நிதிஷ் குமாருக்குத் தர்மசங்கடமான நிலையை ஏற்படுத்தின. குஜராத்தில் முஸ்லிம்களுக்கு எதிரான இன சங்காரத்தைக் கட்டவிழ்த்து விட்டவர் நரேந்திர மோடி. அவருடன் தன்னை இனங்காட்டுவதைச் சகிக்க முடியாதிருந்த நிதிஷ் குமாருக்கு ஒரு விளம்பரத்தின் வாசகங்கள் ஆத்திரமூட்டின. நரேந்திர மோடியை ஒரு முன்மாதிரி நிர்வாகியாகச் சித்தரித்த அந்த விளம்பரம் பிஹார் அரசாங்கம் குஜராத்தை முன்மாதிரியாகக் கொண்டு செயற்பட வேண்டும் என்றிருந்தது. நிதிஷ் குமார் ஆத்திரத்தை வெளிப்படுத்திய விதம் பா. ஜ. கவை அவமதிப்பதாக இருந்தது.

தேசிய நிறைவேற்றுக் குழு உறுப்பினர்களுக்கு ஏற்பாடு செய்திருந்த இராப் போசன விருந்தை நிதிஷ் குமார் ரத்துச் செய்தார். இதற்குப் பதிலடி கொடுப்பது போலப் பாரதிய ஜனதா கட்சி நடந்துகொண்டது. நிறைவேற்றுக் குழுக் கூட்ட முடிவில் நடைபெற்ற பொதுக் கூட்டத்தில் உரையாற்றிய பாரதிய ஜனதா கட்சித் தலைவர்கள் சுசில் குமார் மோடியின் தனிப்பட்ட முயற்சியினாலேயே பிஹாரில் அபிவிருத்திச் செயற்பாடுகள் இடம்பெறுகின்றன எனக் கூறினார்கள். நிதிஷ் குமார் கையாலாகாதவர் என்பதே இதன் அர்த்தம்.

இதனால் மேலும் ஆத்திரமடைந்த நிதிஷ் குமார் வெள்ள நிவாரணமாக நரேந்திர மோடி ஏற்கனவே அனுப்பியிருந்த ஐந்து கோடி ரூபாவைத் திருப்பி அனுப்பினார். பிரதி முதலமைச்சர் சுசில் குமார் மோடி முதலமைச்சருடன் ஒத்துழைப்பதில்லை என்ற முடிவை அறிவித்தார்.

இவ்வாறு ஒவ்வொன்றாக இடம்பெற்ற சம்பவங்கள் இரு கட்சிகளுக்கும் இடையிலான இடைவெளியை அதிகரித்தன.

நான்கு மாதங்களில் நடக்கவிருக்கும் சட்ட சபைத் தேர்தலில் முஸ்லிம்களின் வாக்குகளை வென்றெடுக்கும் நோக் கத்துடன் நிதிஷ்குமார் செயற்படுவது தெளிவாகத் தெரிகின்றது. பிஹார் மாநில வாக்காளர்களில் 16 வீதத்தினர் முஸ்லிம்கள். நரேந்திர மோடிக்கு எதிரான நிலைப்பாட்டை எடுப்பதும் அதன் விளைவாகப் பாரதிய ஜனதா கட்சியுடனான கூட்டிலிருந்து வெளியேறுவதும் முஸ்லிம்கள் மத்தியில் தனது செல்வாக்கை அதிகரிப்பதற்கு உதவும் என்று நிதிஷ் குமார் கருதுவதில் நியாயம் உண்டு. நரேந்திர மோடி முஸ்லிம்களின் வெறுப்புக்குப் பாத்திரமானவர்.

தேர்தல் நெருங்கி வரும் நேரத்தில் கூட்டு உடைவதற்கு இடமளிக்க விரும்பாத பாரதிய ஜனதா கட்சி சமரசத்துக்கு முயற்சிக்கின்றது. தேர்தல் பிரசாரத்துக்கு நரேந்திர மோடியும் வருண் காந்தியும் வரக்கூடாது என்ற நிபந்தனையை நிதிஷ் குமார் முன்வைக்கின்றார். பாரதிய ஜனதா கட்சி இந்த நிபந்தனையை ஏற்கத் தயாரில்லை. நரேந்திர மோடி தேசியத் தலைவர் என்றும் நாட்டின் எந்தப் பகுதியிலும் அவர் பிரசாரம் செய்ய முடியும் என்றும் அது கூறுகின்றது. நிதிஷ் குமா ரின் நிபந்தனையை ஏற்றால் தேசிய ஜன நாயகக் கூட்டமைப்பின் மற்றைய உறுப் புக் கட்சிகளும் இவ்வாறான நிபந்தனையை முன்வைக்கலாம் என்ற அச்சமும் பாரதிய ஜனதா கட்சிக்கு உண்டு.

பாரதிய ஜனதா கட்சி கடந்த தேர்தலில் போட்டியிட்ட தொகுதிகளிலும் பார்க்கக் குறைவான தொகுதிகளை இந்தத் தடவை அதற்குக் கொடுப்பதற்காகவே நிதிஷ் குமார் இப்படியொரு நாடகம் நடத்துகின்றார் என்று பாரதிய ஜனதா கட்சித் தலைவர்கள் கூறுகின்றார்கள. கடந்த தேர்தலில் பாரதிய ஜனதா கட்சி 105 தொகுதிகளில் போட்டியிட்டது.

பாரதிய ஜனதா கட்சி என்னதான் கூறினாலும், முஸ்லிம்களின் வாக்குகளைக் கூடுதலாகப் பெற வேண்டும் என்பதே நிதிஷ் குமாரின் நோக்கம். பாரதிய ஜனதா கட்சியிடமிருந்து தன்னை அந்நியப்படுத்திக் காட்டுவதையே அவர் விரும்புகின்றார்.

இரண்டு கட்சிகளுக்கும் இடையிலான கூட்டு இப்போது நூலிழையில் தொங்குகின்றது. என்ன நடக்கும் என்பதைப் பொறுத்திருந்து தான் பார்க்க வேண்டும்.