மின் உற்பத்தியில் மாற்று வழிகளை நாட வேண்டிய கட்டாயம்

சக்தி வளப் பற்றாக்குறையானது நாளைய உலகை அச்சுறுத்தப் போகிறதென்பதை விஞ்ஞானிகள் எப்போதோ எதிர்வுகூறத் தொடங்கிவிட்டனர். இப்பிரச்சினையிலிருந்து இலங்கை விதிவிலக்காகியிருக்க முடியாது. சக்தி வளப் பற்றாக்குறையைச் சமாளிக்க உலகம் இப்போதே தயாராகி வருவதனால் இலங்கையும் உரிய ஏற்பாடுகளில் இறங்கியிருக்கிறது.  சக்தித் தேவைகளுக்காக உலகம் எரிபொருளையே கூடுதலாக நம்பியிருக்க வேண்டியுள்ளது. வாகனங்கள் மற்றும் இயந்திர சாதனங்களை இயக்குவதற்கு மாத்திரமன்றி மின்சார உற்பத்திக்கும் உலகம் எரிபொருளையே அதிகம் நம்பியிருக் கிறது. ஆனால் எரிபொருளில் மாத்திரம் நம்பியிருப்ப தென்பது ஆரோக்கியமானதொரு நிலைமையல்ல.

உலக சந்தையில் எரிபொருளின் விலை நாளுக்கு நாள் அதிகரித்துக் கொண்டே செல்வதனால் எரிபொருள் பயன்பாட்டை மட்டுப்படுத்திக் கொள்வதற்கான வழிவகைகளை நாடுவதே எதிர்காலத்துக்குச் சிறந்ததெனலாம். வாகனப் போக்குவரத்துக்கான சக்தித் தேவைக்கு எரிபொருளைப் பயன்படுத்துவது தவிர்க்க முடியாததாகிறது. எனினும் மின்சார உற்பத்திக்கு எரிபொருளைப் பயன்படுத்துவதென்பது பொருளாதாரத்தில் பாதிப்பை ஏற்படுத்தவே செய்யும். எரிபொருளைப் பயன்படுத்தி மின்சாரத்தை உற்பத்தி செய்வதென்பது செலவினம் மிகுந்ததாகும். இதன் காரணமாகவே மின்சாரப் பாவனைக்காக நாம் கூடுதல் கட்டணத்தைச் செலுத்த வேண்டியிருக்கிறது.

முன்னைய காலத்தில் நீர் மின்சாரம் மூலம் நாட்டின் மின்சாரத் தேவையை எங்களால் முழுமையாகப் பூர்த்தி செய்யக்கூடியதாக இருந்தது. எனினும் நீர் மின்சாரத்தை முழுமையாக நம்பியிருக்க முடியவில்லை. நாட்டில் மின்சாரத் தேவை பல மடங்காக உயர்ந்தமை மட்டும் காரணமல்ல.... நாட்டில் போதியளவு நீர்த் தேக்கங்கள் இல்லாமையும் அடிக்கடி ஏற்படுகின்ற வரட்சிகளும் கூட மின்சாரப் பற்றாக்குறைக்குக் காரணமாகின.

எனவேதான் இலங்கையும் எரிபொருள் வாயிலான மின்சார உற்பத்தியை நாட வேண்டியிருந்தது. இதற்கான செலவினமும் கொஞ்சநஞ்சமல்ல... இதேசமயம் நாட்டில் மின்சாரத் தேவை நாளும் பொழுதும் அதிகரித்து வருவதனால் அனல்மின்சார உற்பத்தியையும் இலங்கை நாடியுள்ளது.

எரிபொருள் மூலமான மின் உற்பத்தி மற்றும் நிலக்கரி வாயிலான அனல்மின்சார உற்பத்தி போன்றவையெல்லாம் சுற்றாடலுக்குப் பாதிப்பை ஏற்படுத்தக்கூடியனவென்பது வெளிப்படையான விடயம். இப்பாதிப்பைக் குறைக்க வேண்டுமாயின் மின்சார உற்பத்திக்காக மாற்று வழிகளை நாம் நாடுவது தவிர்க்க முடியாததாகும்.

ஜனாதிபதி மஹிந்த ராஜபக்ஷ இவ்விடயம் தொடர்பாக சில தினங்களுக்கு முன்னர் முக்கிய ஆலோசனைகளை முன்வைத்திருக்கிறார். சுற்றாடலுக்குப் பாதிப்பை ஏற்படுத்தாத விதத்திலான மின்சார உற்பத்தி குறித்து அரசாங்கம் கவனம் செலுத்தத் தொடங்கியிருப்பதாக ஜனாதிபதி குறிப்பிட்டுள்ளார். நீர், காற்று, சூரிய ஒளி போன்ற இயற்கை வளங்களிலிருந்து மின்சாரத்தை உற்பத்தி செய்வதில் கூடுதல் கவனம் செலுத்தப்பட வேண்டுமென்பதே ஜனாதிபதியின் கருத்தாகும்.

இவ்விடயத்தைப் பொறுத்தவரை இந்தியா போன்ற ஒருசில நாடுகளை நாம் முன்னுதாரணமாகக் கொள்வது அவசியமாகும். காற்றாலைகள் மற்றும் சூரிய சக்தி மூலமான மின்சார உற்பத்தியில் இந்தியா தனது இலக்கை அண்மித்துவிட்டதென்றே கூற வேண்டும். தனியாரிடமிருந்து காற்றாலைகள் மூலம் உற்பத்தி செய்யப்படுகின்ற மின்சாரத்தை அரசாங்கமே பணம் கொடுத்து வாங்கிக் கொள்கிறது. இதன் மூலம் தனியாருக்கு தொழில் வாய்ப்பும் கிடைப்பதற்கு வழியேற்படுகிறது. காற்றாலை மூலமான மின்சார உற்பத்தி எமது நாட்டில் அம்பாந்தோட்டை போன்ற ஒரு சில இடங்களில் மட்டுமே நடைபெறுகிறது. சூரிய சக்தி மூலமான மின்சார உற்பத்தி யானது இலங்கையில் போதியளவில் மேற்கொள்ளப்படுவதில்லை. மின்சாரத் தேவை எதிர்காலத்தில் வேகமாக அதிகரித்துச் செல்லுமென்பதில் ஐயமில்லை. கூடுதல் செலவினத்துடனான மின்னுற்பத்தியானது பொருளாதாரப் பாதிப்பை ஏற்படுத்த வல்லது. எனவேதான் மாற்று வழிகளில் நாமும் கவனம் செலுத்துவது அவசியமாகிறது.

(தினகரன்)