3179 இற்கு அவசர அழைப்பு!

பாடசாலை மாணவிகள் கடத்திச் செல்லப்படுவதாக வெளியாகும் செய்திகள் அண்மைக் காலமாக மலையகப் பகுதிகளில் சாதாரண மாகிவிட்டன. மாணவிகள் கடத்தப் படுவதற்கு முன்பு சில சிறுவர்கள் கடத்தப்பட்டுப் பின் விடுவிக்கப் பட்டதாகவும் கூறப்பட்டது. ஹட்டன் பகுதியில்தான் இதுபற்றிக் கூடுதலாகப் பேசப்பட்டாலும் மலையகத்தின் ஏனைய பகுதிகளில் நிலைமை வேறாக உள்ளது.  புசல்லாவை பகுதி தோட்டமொன்றில் பதின்ம வயது மாணவிகள் எதுவித காரணமுமின்றித் தற்கொலை செய்துகொண்டிருக்கிறார்கள். வளர் இளம் பருவ மாணவிகள் இவ்வாறு கடத்தப்படுவதும் தற்கொலை செய்துகொள்வதும் ஏனென்று ஆராய்ந்தால் முடிவு காதல் விவகாரத்தைக் காண்பிக்கிறது.

பாடசாலை பதின்ம வயது பருவத்தில் ஏற்படும் உந்துதல்தான் இந்தச் சீரழிவுக்குக் காரணம் என்றாலும், இதனைத் தவிர்க்கும் பொறுப்பும் கடப்பாடும் யாருடை யது என்ற கேள்வி எழுகிறது. ஹட்டன் உயர்தரப் பாடசாலையொன்றில் கல்வி பயிலும் மாணவிகளுள் ஒருவருக்கு சக மாணவனுடன் காதல் மலர்ந்திருக்கிறது. இன்னொருவருக்கு வெளி இளைஞர் ஒருவருடன் என்று விசாரணைகள் மூலம் தெரியவந்திருப்பதாகப் பத்திரிகைகளில் செய்திகள் வெளிவந்திருக்கின்றன.

உண்மையில் காதல்தான் இந்தப் பிரச்சினைக்குக் காரணம் என்றால், கடத்திச் செல்லப்பட்டவர்கள் தப்பி வருவதற்கோ அல்லது விடுவிக்கப்படுவதற்கோ வாய்ப்பில்லை. ஒன்றும் அறியாத மாணவ பருவத்தைத் தவறாக வழிநடத்தி; அவர்கள் மனதில் கிளர்ச்சியை ஏற்படுத்தி சிலர் சமுதாயத்தில் விஷத்தைப் பரப்பி வருகிறார்கள் என்பதுதான் உண்மை. அதன் விளைவுதான் மாணவிகளைக் கொண்டு சென்று அநாதரவாகக் கைவிட்டுச் சென்றிருக்கிறார்கள்.

மாணவர்கள் வாழ்க்கையில் விழிப்பைப் பெற்று ஒழுக்க சீலர்களான மனிதங்களாக வெளியில் வருவதற்கு ஆசிரியர்கள்தான் முன்மாதிரியாகத் திகழ வேண்டும் என்பதில் மாற்றுக் கருத்து இருக்க முடியாது. மாணவ சமுதாயத்திற்குக் காலத்தின் கண்ணாடியாகத் திகழ்பவர்கள் ஆசிரியர்கள் என்பவர்களே!

இந்த நோக்கத்தை நிறைவேற்றிக் கொள்ளவும் மலையக சமுதாயத்தை கல்வியால் மேன்மையுறச்செய்யவுமே 3179 ஆசிரியர்களை அரசாங்கம் ஒரே சமயத்தில் நியமித்தது. ஆனால் அந்த நியமனத்தின் நோக்கம் படிப்படியாகச் சிதைந்து வருவதாகப் பரவலாகவே பேசப்படுகிறது. யாழ்ப்பாண ஆசிரியர்களுக்குப் பின்பு மலையகத்தில் வழங்கப்பட்ட நியமனங்களைப் பல விதவிதமாக அடையாளப்படுத்துகிறார்கள்.

ஜனசவிய, கூப்பன் ரீச்சர் எனப் பல. இப்போது 3179 என்று பேச்சு வந்துவிட்டது. இவர்கள் நியமிக்கப்பட்டதன் பின்னர்தான் கல்வி நிலை மோசமாகி வருகிறதோ! என்ற ஓர் எண்ணம் வளர்ந்து விருட்சமாகிவிடக் கூடாது என்ற உயரிய நோக்கத்தில்தான் இங்கே இதனைக் குறிப்பிடுகிறோம்.

இந்த 3179 காரர்களுக்கு முக்கிய மூன்று இலக்கு மட்டுமே என்கிறார்கள் சக ஆசிரியர்கள். ஒன்று கைப்பேசி (செல்போன்) இரண்டாவது மோட்டார் சைக்கிள் (ஆசிரியைகளுக்கு விதிவிலக்கு) மூன்றாவது திருமணம். இந்த மூன்றும் ஈடேறி நிறைவேறிவிட்டால் வாழ்க்கையில் தாம் வெற்றி அடைந்துவிட்டதாகக் கருதுகிறார்களாம் இவர்கள். பாடசாலைகளின் நிலவரத்தைப் பார்த்தால் இதுதான் உண்மையோ! மாணவ, மாணவியரின் சீர்கேட்டுக்கு இவர்கள்தான் காரணமோ! என்றே எண்ணத் தோன்றுகிறது! ஆகவே ‘3179’ ஆசிரியர்கள் இப்போதிருந்தே சுதாகரித்துக்கொள்ள வேண்டியிருக்கிறது.

சிலவேளை உங்களுக்கு முன்னைய நியமனம் பெற்ற ஆசிரியர்கள் தவறு இழைத்துவிட்டுப் பழியை உங்கள் மீதும் சுமத்தலாம் அல்லவா! கற்பிக்கும் அதேநேரம் மாணவ, மாணவியரின் பழக்க வழக்கங்கள், செயற்பாடுகள், முன்னேற்றம் என்பவற்றிற்கு நீங்கள்தான் முன்மாதிரி. கடத்தலையும் காதல் என்ற பருவ உந்துதலையும் உங்களால் தவிர்க்க முடியும்! இதனை ஓர் அவசர அழைப்பாகக் கருதுங்கள்!

(ஜீவிதன்)