விவசாயிகளின் பிரச்சினைக்கு தீர்வு காண்பது அவசியம்

கிழக்கில் இம்முறை அமோக நெல் அறுவடை கிடைத்துள்ளது. அங்கு நெல் அறுவடை தற்போது முடிவுறும் கட்டத்துக்கு வந்துள்ளது. தாங்கள் எதிர்பார்த்ததைப் பார்க்கிலும் கூடுதலான விளைச்சல் கிடைத்திருப்பதாக விவசாயிகள் மகிழ்ச்சியுடன் கூறுகின்றனர். யுத்தம் ஓய்ந்த பின்னர் கிழக்கின் அனைத்து வயல் பிரதேசங்களிலும் வேளாண்மைச் செய்கையில் ஈடுபடக் கூடிய சூழல் தற்போது உருவாகியிருக்கிறது. இதுவே முதன்மைக் காரணம் ஆகும். மட்டக்களப்பு, அம்பாறை, திருகோணமலை ஆகிய மாவட்டங்களின் வயல் பிரதேசங்கள் அன்றைய காலப் பகுதியில் புலிகளின் நடமாட்டமுள்ள இடங்களாகவே இருந்தன. விவசாயிகள் நிம்மதியாக நெற்செய்கை மேற்கொள்வதற்கு அக்காலப் பகுதியில் புலிகள் இடமளிக்கவில்லையென்பது வெளிப்படையாகத் தெரிந்த விடயம்...... தமிழ், முஸ்லிம், சிங்கள விவசாயிகள் அனைவருமே இப்பிரச்சினையை எதிர்கொண்டனர்.

புலிகள் தங்களது பிரதேசங்களில் விவசாயிகளின் காணிகள் பலவற்றை பலவந்தமாகச் சுவீகரித்து தங்களுக்கு நெருக்கமானவர்களுக்கு விவசாயம் செய்வதற்காகக் கையளித்தனர். வயல் சொந்தக்காரர்கள் நியாயம் கேட்பதற்கு புலிகள் இடமளிக்கவில்லை.

வயல் பிரதேசங்களில் புலிகள் தாங்கள் நினைத்தபடி நிர்வாகம் நடத்தியதனால் தமிழ், முஸ்லிம் விவசாயிகள் பலர் தசாப்த காலமாக தங்களது வயல் காணிகளை கண்ணால் காண முடியாதிருந்தது. அதேசமயம் எல்லைப் புறங்களில் நெற்செய்கையில் ஈடுபட்டு வந்த சிங்கள விவசாயிகள் கூட புலிகளின் அச்சம் காரணமாக தங்களது வயல் நிலங்களைக் கைவிட்டு இடம்பெயர வேண்டியிருந்தது.

இவையெல்லாம் போதாதென்று கிழக்கில் விவசாயிகள் அனைவரும் புலிகளுக்கு வரியும் கப்பமும் செலுத்த வேண்டிய அராஜக சூழலொன்று அன்றிருந்தது. அறுவடை செய்யப்பட்ட நெல்லின் அளவைப் பொறுத்து ஒவ்வொரு விவசாயியும் புலிகளுக்கு வரி செலுத்த வேண்டியது அக்காலப் பகுதியில் கட்டாயமாகும். விவசாயியொருவர் உழவு இயந்திரம் வைத்திருந்தால் அதற்கென வேறாக வரி செலுத்த வேண்டியிருந்தது.

இவ்விதமாக விவசாயிகள் தங்களது வருமானத்தின் ஒரு பகுதியை வீணாக புலிகளுக்குச் செலுத்த வேண்டிய கட்டாயம் இருந்ததாலும் நெற்காணிகள் பறிக்கப்பட்டதாலும் வேளாண்மைச் செய்கையென்பது அக்காலத்தில் வெறுக்கப்பட்டதாகவே இருந்தது.

விவசாயிகளின் அத்தனை பிரச்சினைகளுக்கும் யுத்தம் ஓய்ந்தபின்னர் முழுமையான தீர்வு கிடைத்தது. கப்பம், வரி என்ற பேச்சுகளெல்லாம் தற்போது அங்கு கிடையாது. தமிழ், முஸ்லிம் விவசாயிகளெல்லாம் தங்களது நெற்காணிகளில் நீண்ட காலத்தின் பின்னர் அச்சமின்றி வேளாண்மைச் செய்கையில் ஈடுபடுகின்றனர். கைவிடப்பட்ட நிலையிலான வயல் காணிகளே தற்போது அங்கு இல்லை எனலாம்.

விவசாயிகள் எதிர்நோக்கும் நீர்ப்பாசனப் பிரச்சினைகளும் துரிதமாகத் தீர்க்கப்பட்டு வருகின்றன. இத்தகைய சாதகமான நிலைமை காரணமாக கிழக்கு விவசாயிகள் தற்போது அமோகமான நெல் விளைச்சலைப் பெற்று வருகின்றனர். கிழக்குப் பிரதேசமானது ‘இலங்கையின் நெற்களஞ்சியம்’ என்ற பெயருக்கு மீண்டும் உரித்தாகியுள்ளது.

இத்தனைக்கும் அப்பால் கிழக்கில் விவசாயிகள் மத்தியில் தற்போது பெரும் கவலையொன்று நிலவுகிறது. தாங்கள் சிரமப்பட்டு செய்கை பண்ணி அறுவடை செய்த நெல்லை நியாயமான விலைக்கு விற்பனை செய்ய முடியவில்லையென்ற ஏக்கம் அவர்கள் மத்தியில் உள்ளது.

ஒருகிலோ சிவப்புச் சம்பா நெல் முப்பது ரூபாவுக்கும் வெள்ளைச் சம்பா நெல் இருபத்தெட்டு ரூபாவுக்கும் விவசாயிகளிடமிருந்து கொள்வனவு செய்யப்பட வேண்டுமென்பதே அரசாங்கத்தின் அறிவிப்பாகும்.

எனினும் விவசாயிகளின் அறுவடை நெல் அத்தனையையும் அரசாங் கத்தினால் கொள்வனவு செய்ய முடியாத சிக்கல் நிலைமையொன்று உள்ளது. விவசாயி ஒருவரிடமிருந்து ஒரு ஏக்கர் விளைச்சலில் பதினைந்து மூடை நெல் மாத்திரமே இவ்விதம் கொள்வனவு செய்யப்படுகிறது.

களஞ்சிய வசதி போதாமை மற்றும் நெல் கொள்வனவுக்காக ஒதுக்கப்பட்ட நிதி போதாமை போன்றவை இந்நிலைமைக்குக் காரண மெனக் கூறப்படுகிறது.

அரசாங்கத்துக்கு விற்பனை செய்ய முடியாத நெல்லை விவசாயிகள் தனியாருக்கே விற்பனை செய்ய வேண்டியுள்ளது. தனியார் வியாபாரி கள் இச்சந்தர்ப்பத்தை தங்களுக்கு வாய்ப்பாகப் பயன்படுத்திக் கொள்ளப் பார்க்கின்றனர். விவசாயிகளிடமிருந்து மிக மலிவான விலைக்கு நெல்லை வாங்குகின்றனர்.

நெற்செய்கைக்காக வங்கிகளில் கடன் பட்டும் நகைகளை அடகு வைத்தும் பணத்தை முதலீடு செய்த விவசாயிகளுக்கு இப்போது வேறு வழி கிடையாது. தாங்கள் பெற்றுக்கொண்ட கடனில் இருந்து மீள வேண்டுமாயின் தங்களது அறுவடை நெல்லை குறைந்த விலைக்காவது விற்க வேண்டிய அவசரத்தில் விவசாயிகள் உள்ளனர்.

விவசாயிகளைப் பாதிக்கின்ற இந்நிலைமை பரிதாபமானது. பெரும் சிரமப்பட்டு உழைத்த விவசாயி பாதிக்கப்படுகையில், சந்தர்ப்பத்தைப் பயன்படுத்திக்கொண்டு நெல் வியாபாரிகள் குறுகிய காலத்திற்குள் பெரும் வருமானம் ஈட்டுவதை அனுமதிக்கலாகாது. விவசாயிகளின் நலன் கருதி துரிதமாகத் தீர்வு காண வேண்டிய பிரச்சினை இது!

(தினகரன்)