அன்புக்கும் மதிப்புக்கும் உரியவர் சிவமகாராசா

யாழ்ப்பாண மாவட்டத்தின் காலஞ்சென்ற பாராளுமன்ற உறுப்பினர் சி. சிவமகாராசாவின் மறைவு குறித்த அஞ்சலிப் பிரேரணையில் பாராளுமன்ற உறுப்பினர் ஏ. எச். எம். அஸ்வர் ஆற்றிய உரையின் சுருக்கம்

இந்த உலகத்தில் எத்தனையோ மனிதர்கள் பிறக்கிறார்கள்; இறக்கிறார்கள். அது உலக நியதி. இயற்கையை, இறைக் கட்டளையை யாரும் மறுதலிக்க முடியாது. ஆனால், இந்த உலகத்தில் இறக்கின்ற எல்லோரையும் பற்றி மக்கள் பேசுவதில்லை; உலகம் போற்றுவதில்லை. இறந்த பின்னரும் மக்கள் போற்றுகின்ற, உலகம் துதிபாடுகின்ற ஒருவர்தான் எங்கள் அன்புக்குரியவரும் மதிப்புக்குரியவருமான முன்னாள் பாராளுமன்ற உறுப்பினர் அமரர் சிவமகாராசா அவர்கள்.

சிவ + மகா + ராசா என்ற மூன்று அற்புதமான பெயர்களைத் தன்னுடைய இயற்பெயராகக் கொண்டவர் சிவமகாராசா அவர்கள்.

இந்த இடத்திலே வன்செயலின் பயங்கரவாதத்தின் கொடூரத்தன்மையை நாங்கள் நினைத்துப் பார்க்க கடமைப்பட்டிருக்கின்றோம். சிவமகா ராஜாவை மாத்திரமல்ல, வன்செயலின் காரணமாக துப்பாக்கிக் கலாசாரத்தின் காரணமாக இந்த நாடு இழந்த அருந்தவத் தமிழ்த் தலைவர்களை ஞாபகமூட்டுவது பொருந்தும். இந்த இடத்தில் நான் ஏனையவர்களை விட்டுவிடுகின்றேன்.

தளபதி அமிர்த்தலிங்கம் ஐயா அவர்கள் இந்தச் சபையிலே எதிர்க்கட்சித் தலைமை ஆசனத்தை அலங்கரித்தவர்! கொடூர பயங்கரவாதிகள் அவரை இங்கே, கொழும்பிலே, பெளத்தாலோக மாவத்தையில்சுட்டுக் கொன்றார்கள். பாராளுமன்ற உறுப்பினர் யோகேஸ்வரன்! இவர்களும் சிவனின் நாமத்தைத் தமது பெயரின் பகுதியாகக் கொண்டவர்கள். இப்படியாக இன்னும் எத்தனையோ பேர் படுகொலை செய்யப்பட்டார்கள். நான் மதிப்பு வைத்திருக்கின்ற மாவை சேனாதிராஜா போன்ற ரி. என். ஏ. கட்சி உறுப்பினர்களுக்கு நன்றாகத் தெரியும்.

இந்த பாராளுமன்ற ஆசனத்தை அலங்கரித்த கலாநிதி நீலன் திருச்செல்வம் அவர்கள்! அற்புதமான ஒரு தமிழ்த் தலைவர்; நல்ல விரிவுரையாளர்; ஆய்வாளர். சிங்கள சமூகமும் முஸ்லிம் சமூகமும் அவரை ஒரு சிந்தனையாளரென்று ஒத்துக் கொண்டன. சிவமகாராஜா அவர்களைப் போன்று அவரும் இந்த பயங்கரவாதத்துக்கு இலக்கானார். உலக நாடுகளுக்குச் சென்று இந்த நாட்டுக்குப் புகழ் ஈட்டித்தந்த முன்னாள் வெளிவிவகார அமைச்சர் லக்ஷ்மன் கதிர்காமர் கூட படுகொலை செய்யப்பட்டார்.

கெளரவ குழுக்களின் பிரதித் தவிசாளர் அவர்களே, இந்த நாட்டின் பிரதம அமைச்சராக லக்ஷ்மன் கதிர்காமர் அவர்கள் வரவேண்டுமென்று ஒரு காலகட்டத்தில் எதிர்த்தரப்பைச் சேர்ந்த சிங்களக் கட்சியினர் கூட சொன்னது எனக்கு நினைவுக்கு வருகின்றது. அந்தளவுக்கு அவர்களுடன் நெருக்கத்தினை ஏற்படுத்தினார்.

மனிதாபிமானம் அவருள் பூத்து மலர்ந்தது; மனிதத்துவம் அவருள் பிரகாசித்தது. நான் மிகவும் நெருக்கமாக நட்பு பூண்டிருந்த தர்மலிங்கம் ஐயா; மற்றும் இந்த சபையிலே எங்களோடு விவாதித்த நடராஜா ரவிராஜ் போன்றவர்களும் அதேபோன்றுதான் தங்களுடைய இன்னுயிரை நீக்க நேர்ந்தது. இன்று பாருங்கள்! இந்த நாட்டிலே நாம் எங்கும் சுதந்திரமாக நடமாட முடியும்.

இந்த நாட்டு மக்களால் ஜனாதிபதியாகத் தெரிவு செய்யப்பட்ட மேதகு ஜனாதிபதி மஹிந்த ராஜபக்ஷ அவர்கள் பயங்கரவாதத்தைப் பூண்டோடு அழித்து இன்று இந்த நாட்டிலே ஓர் அருமையான சமாதானமான சூழ்நிலையை உருவாக்கியிருக்கிறார்கள். அதன் காரணமாக வடக்குக்கும் தெற்குக்கும் இடையிலே ஒரு பெரும் இணைப்பு ஏற்படுத்தப்பட்டுள்ளது. குறிப்பாக இலட்சக்கணக்கான சிங்கள மக்களும் தமிழ் மக்களும் தெற்கிலிருந்து யாழ்ப்பாணத்துக்குச் சென்று வருகின்றார்கள். கீரிமலைக்குச் சென்று நீராடி வருகின்றார்கள். நாகதீப என்று அழைக்கப்படுகின்ற நயினாதீவுக்குச் சென்று அங்குள்ள கோவிலை வழிபட்டு வருகின்றார்கள்.

நயீனாதீவிலே ஒரு முஸ்லிம் பள்ளிவாசலும் இருக்கின்றது என்பதை நான் நினைவூட்ட வேண்டும். அங்கும் நான் சென்று வந்தேன். ஜனாதிபதி மஹிந்த ராஜபக்ஷ அவர்கள் கட்டியெழுப்பிய ஒற்றுமையை, சமாதானத்தை ஐக்கிமான சூழ்நிலையைப் பேண நாம் கடமைப்பட்டிருக்கின்றோம். இந்த நாட்டிலே மீண்டும் ஒரு இரத்தக் களரி ஏற்படுவதற்கு எவரும் இடமளிக்கக்கூடாது: அத்தகையதொரு சூழ்நிலை உருவாகக் கூடாது. யாராவது அப்படிச் செய்வார்களாயின் அவர் மனிதத்துவத்திலிருந்து மனித இனத்திலிருந்தே நீங்கியவர் ஆவர்.

24 வயதுடைய எமது இளம் பாராளுமன்ற உறுப்பினர் நாமல் ராஜபக்ஷ அவர்கள் கிளிநொச்சியில் அமைந்துள்ள ஒவ்வொரு பாடசாலைக்கும் சென்று அப்பியாசக் கொப்பிகளையும் புத்தகங்களையும் வழங்கியது மாத்திரமல்ல ஒவ்வொரு கோயிலுக்கும் சென்று பணமுடிச்சை வழங்கி வருகிறார். அன்று சிவமகாராசா அவர்களின் காலத்தில் அத்தகைய சூழ்நிலை இருக்கவில்லை. மேதகு மஹிந்த ராஜபக்ஷ அவர்களின் தலைமையில் வடக்கில் வசந்தம் உருவாகியிருக்கிறது. பொருளாதார அபிவிருத்தி அமைச்சராகப் பொறுப்பேற்றுள்ள மாண்புமிகு பஸில் ராஜபக்ஷ அவர்களே அதனை முன்னெடுத்துச் செல்கின்றார். இந்த நாட்டில் யுத்தத்தை ஒழித்து பூரண பாதுகாப்பை ஏற்படுத்திய பெருமை பாதுகாப்பு அமைச்சின் செயலாளர் கோத்தபாய ராஜபக்ஷ அவர்களையே சேரும்.

திருக்குறளில் ‘இன்னா செய்தல்’ என்னும் அதிகாரத்தில் நல்லன செய்தல் பற்றிப் பல குறள்கள் இருக் கின்றன. நாங்கள் அவற்றை ஏற்றுக் கொள்ள வேண்டும். நாங்கள் கோத்தபாய ராஜபக்ஷ அவர்களுக்கு எமது கையால் பூமாலை சூட்ட முடியாவிட்டாலும் நாவினால், அல்லது குறைந்த பட்சம் மனதினாலேனும் நன்றிப் பூமாலையைச் சூட்ட வேண்டும். அதுவே மனிதத்தன்மை.

தமிழர் தேசிய கூட்டணித் தலைவர் இரா. சம்பந்தன் ஐயா அவர்கள் எமது மேதகு ஜனாதிபதி அவர்களுடன் பேச்சுவார்த்தை நடத்தினார்கள். அவர்களுடன் எமது பாராளுமன்ற உறுப்பினர் மாவை சேனாதிராஜா அவர்களும் ஏனைய பாராளுமன்ற உறுப்பினர்களும் இந்தியாவுக்குச் சென்று வந்திருக்கின்றார்கள்.

எனவே, நாங்கள் இந்த நடபுக் கரத்தைப் பற்றிப் பிடித்துக் கொள்வோம். இது எங்களுடைய நாடு. ‘நாம் பிறந்த நாடு நமது என்பது அறிவோம்’ எனப் பாரதியார் பாடினார். பாரதியார் இதனை அந்நாட்டுக்கு மட்டும் சொல்லவில்லை. எங்களுடைய நாட்டுக்கும் சேர்த்துதான் சொன்னார். இது எங்கள் நாடு, நாம் பிறந்த பொன்நாடு. எங்களுடைய நாட்டிலுள்ள பிரச்சினையைத் தீர்ப்பதற்காக நாங்கள் காவடியைத் தூக்கிக் கொண்டு வேறு எங்கும் செல்ல வேண்டியதில்லை. அவ்வாறு செய்யவும் முடியாது. எங்களுடைய பிரச்சினைகளை நாங்களே தான் தீர்த்துக் கொள்ள வேண்டும். எங்களுடைய தலைவிதியை நாங்கள் தீர்மானித்துக் கொள்ள வேண்டும்.

இன்று மேதகு ஜனாதிபதி அவர்களும் இந்த அரசாங்கமும் மேற்கொண்ட நடவடிக்கையின் காரணமாக அன்பு ஆறு ஓடுகின்றது! பெருக்கெடுக்கின்றது! பாதுகாப்பில் ஈடுபட்டிருக்கின்ற இராணுவ வீரர்களுக்கும் மற்றும் ஏனையவர்களுக்கும் பிரச்சினைகள் இருக்கலாம்! அதனையும் நாங்கள் தீர்த்துக் கொள்வோம்!

சிவமகாராசா அவர்கள் இன்று வாழ்ந்திருந்தால் உண்மையிலேயே மேதகு ஜனாதிபதி மஹிந்த ராஜபக்ஷ அவர்களுடைய கரங்களைப் பற்றிப் பிடித்து நாட்டின் முன்னேற்றத்திற்காக அந்தப் பயணத்தை மீண்டும் துவங்கி யிருப்பார் ஐயா! அவர் நம்பிக்கைப்படி மீண்டும் ஜென்மம் எடுத்தால்கூட அவர் அதனைச் செய்வார் என்பதில் எனக்கு எவ்விதமான சந்தேகமும் கிடையாது.

இறுதியாக அன்னாருடைய குடும்பத்தாருக்கும் மற்றும் உறவினர்களுக்கும் அன்னாரைப் பாராளுமன்றத்துக்கு அனுப்பிய வாக்காளப் பெரு மக்கள் அனைவருக்கும் எங்களுடைய அஞ்சலியைத் தெரிவித்துக் கொள்ள வேண்டும் என்று தவிசாளர் அவர்களை வேண்டி என்னுரையை நிறைவு செய்து கொள்கின்றேன்.

நன்றி.