வீதிகளில் நாளாந்தம் வீணான உயிர்ப்பலிகள்

நாடெங்கும் வாகன விபத்துக்கள் மிக மோசமாக அதிகரித்து விட்டன. விபத்துக்களால் உயிரிழப்போரின தும் காயம் மற்றும் ஊனமடைவோரினதும் எண்ணிக்கை யும் அதிகமாகவே உள்ளது. முன்னரைப் போன்று இல்லாது தற்போது விபத்துக்களின் தன்மை மிகவும் கோரமாகக் காணப்படுகிறது.

மட்டக்களப்பில் வின்சன்ற் மகளிர் கல்லூரி மாணவியொருவர் அங்கு இடம் பெற்ற விபத்தொன்றில் கொல்லப்பட்ட சம்பவமும் இப் பரிதாப நிலைமைகளில் ஒன்றாகும். மட்டக்களப்பு நகர்ப் பகுதியில் முன்னரெல்லாம் இதுபோன்ற மோசமான விபத்துகள் இடம்பெற்றதில்லை. உயிர்ப்பலி ஏற்படும்படியாக அங்கு விபத்து ஏற்படுவதற்கு வாகனங்களின் அதிகரித்த வேகமே காரணமாகும்.

இம்மாணவியை மோதிக் கொன்ற வாகனத்தின் சாரதி கட்டுமீறிய வேகத்தில் அவ்வாகனத்தைச் செலுத்தியுள்ளார். அதுமாத்திரமன்றி அவர் உரிய ஆவணங்களையும் கொண்டிருக்கவில்லை. பாதுகாப்பு சோதனையிலிருந்து தப்பிச் செல்லும் நோக்குடன் வாகனத்தை தறிகெட்டுச் செலுத்தியதன் விளைவாகவே அச்சாரதி இம்மாணவியை மோதிக் கொன்றுள்ளார்.

மட்டக்களப்பு சம்பவம் மாத்திரமன்றி நாட்டில் இடம் பெறுகின்ற கூடுதலான வாகன விபத்துக்களை எடுத்து நோக்குவோமானால் சாரதிகளின் அலட்சியமே விபத்துகளுக்குக் காரணமாக அமைந்துள்ளது. வீதிப் போக்குவரத்துக் குற்றமிழைப்போரில் கூடுதலானோர் தனியார் பஸ் சாரதிகளென அறிக்கைகள் தெரிவிக்கின்றன. இதற்கு அடுத்தபடியாக முச்சக்கரவண்டி சாரதிகள் விளங்குகின்றனர்.

வீதிப் போக்குவரத்து விதிகளை மீறியும் கட்டுங்கடங்காத வேகத்திலும் இவர்கள் வாகனத்தைச் செலுத்துவதன் காரணமாகவே விபத்துக்கள் ஏற்படுகின்றன. இவர்கள் இழைக்கின்ற குற்றங்களுக்கு தொழில் போட்டியே முக்கிய காரணமாகும். முன்னால் செல்கின்ற வாகனத்தை முந்திச் சென்று கூடுதல் பயணிகளை ஏற்றிக் கொள்ள வேண்டுமென்ற அவசரத்தினால் தனியார் வாகனச் சாரதிகள் அசுர வேகத்தில் வாகனத்தைச் செலுத்துகின்றனர். நகரங்களுக் கிடையிலான சேவையில் ஈடுபடுகின்ற ‘இன்டர்சிற்றி’ பஸ்களின் சாரதிகளும் இதுபோலவே வாகனங்களை தறிகெட்டுச் செலுத்துகின்றனர்.

வீதியில் செல்கின்ற ஏனைய வாகனங்களைப் பற்றியோ பாதசாரிகள் குறித்தோ இவர்கள் கவனம் கொள்வதில்லை. இத்தகைய சாரதிகளின் அலட்சியத்தினால் தினமும் சிலர் வீதியில் உயிரிழக்க வேண்டிய பரிதாபம் ஏற்படுகிறது.

தனியார் பஸ் சாரதிகள் தொடர்பாக பொது மக்கள் தரப்பிலிருந்து தொடர்ச்சியாகக் குற்றச்சாட்டுகள் தெரிவிக்கப்பட்டு வருகின்றன. தனியார் பஸ் சாரதிகள் பலர் போதைப் பொருளுக்கு அடிமை யானவர்களெனத் தெரிவிக்கப்படுகிறது. குற்றச் செயல்கள் தொடர்பான வழக்கில் சம்பந்தப்பட்டு பிணையில் வெளிவரும் சிலரும் தனியார் பஸ் சாரதிகளாகத் தொழில் புரிவதாகத் தெரியவந்துள்ளது. இதே சமயம் மதுபானம் அருந்திய நிலையில் மினிபஸ் செலுத்திய சிலரும் கண்டுபிடிக்கப்பட்டுள்ளனர். வாகன விபத்துகள் இடம்பெறுவதற்கு இவர்களைப் போன்றோரே காரணமாகின்றனர்.

போக்குவரத்துக் குற்றங்களைப் பொறுத்தவரை பொலிஸாருக்கு பாரிய கடமைப் பொறுப்புகள் உள்ளன. போக்குவரத்துப் பொலிஸாரின் கண்டிப்பான நடவடிக்கைகள் உரிய இடங்களில் உரிய சந்தர்ப்பங் களில் பிரயோகிக்கப்படுமாக இருப்பின் வாகன விபத்துகள் பெருமளவில் குறைவதற்கு வாய்ப்புண்டு. போக்குவரத்து பொலிஸ் பிரிவினர் இவ்விடயத்தில் கூடுதல் கவனம் செலுத்துவது முக்கியமாகும்.

வெறிச்சோடிக் கிடக்கின்ற வீதியொன்றின் மறைவில் நின்றபடி மோட்டார் சைக்கிளில் வருகின்ற ஒருவரின் சாதாரண சிறு குற்றங்களுக்கு அபராதம் விதிப்பதைப் பார்க்கிலும், பலருக்கு மரணத்தை ஏற்படுத்தும் விதத்தில் வாகனப் போக்குவரத்து விதிமுறைகளை மீறிச் செயற்படுகின்ற தனியார் பஸ் சாரதிகளைக் கண்டுபிடித்து உரிய தண்டனை பெற்றுக் கொடுப்பதே பிரதானமான தாகும். மக்கள் மத்தியிலுள்ள ஆதங்கமும் இதுதான். குற்றமிழைக்கின்ற தனியார் பஸ் சாரதிகள் குறித்து போதிய கண்காணிப்பு செலுத்தப்படுவதில்லையென்ற கவலை மக்கள் மத்தியில் உண்டு.

இவையெல்லாம் ஒரு புறமிருக்க வீதிப் போக்குவரத்துக் குற்றங்கள் தொடர்பாக எமது நாட்டில் தண்டனைகள் கடுமையாக்கப்பட வேண்டுமென்ற கருத்து மக்கள் மத்தியில் நீண்ட காலமாகவே நிலவுகிறது. பலருக்கு மரணத்தை ஏற்படுத்தும் விதத்தில் செயற்பட்ட சாரதியொருவர் விரைவில் பிணையில் வெளியே வந்து விடுகிறார்.

விபத்து மரணங்கள் கொலைக் குற்றங்களல்ல என்பதாலும் கவனக்குறைவினால் ஏற்பட்ட தவறென்பதனாலும் சம்பந்தப்பட்ட வாகன சாரதி குறைந்த பட்ச தண்டனையுடன் விடுதலையாகி வந்து விடும் நிலைமையே காணப்படுகிறது. இதன் காரணமாக சட்டம் மீதான பயம் சாரதிகள் மத்தியில் கிடையாது. அவர்கள் தொடர்ந்தும் அலட்சியப் போக்கிலேயே செயற்படுகின்றனர்.

நாட்டில் விபத்துகளும் விபத்து மரணங்களும் அதிகரிப்பதனால் இத்தகைய போக்கு இனிமேலும் தொடர்வதற்கு இடமளிக்க முடியாது. காத்திரமான ஏற்பாடுகள் அவசியமும் அவசரமும் ஆகும்.

(தினகரன்)