கலவரம் அல்ல, எழுச்சி!

லண்டன் மாநகரம் பற்றி எரியும் என்று வெளிநாட்டு மோகிகள் யாரும் எதிர்பார்த்திருக்க மாட்டார்கள். உலகக் கடன் தர வரிசையில் முதல்முறையாக அமெரிக்காவின் தரம் ஒருபடி கீழே இறங்கியதைப் போலவே பிரிட்டிஷ் ஆட்சியாளர்களின் தலையில் இடியாய் இறங்கியது லண்டன் ‘கலவரம்.’ பர்மிங்ஹாம், மான்செஸ்டர் உள்பட பிரிட்டனின் அனைத்து நகரங் களுக்கும் அடுத் தடுத்த நாட்களில் வேகமாக பரவிய இந்தக் ‘கலவரத்தை’ ஒடுக்க வீதிகள் தோறும் ஆயுதம் ஏந்திய போலீஸ் படையை குவித்திருக்கிறது பழமை வாத கூட்டணியின் பிரதமர் டேவிட் கேமரூனின் ஆட்சி. கடந்த 6ம்தேதி சனிக்கிழமை லண்டனின் ஒரு பகு தியான டொட்டன்ஹாமில் போலீஸ் நடத்திய துப்பாக்கிச் சூட்டில் 29 வயது இளைஞர் மார்க் துக்கான் என்பவர் கொல்லப்பட்டார். ஏற்கனவே கனன்று கொண்டிருந்த இளைஞர்களின் குமுறல், காவல் துறை நிகழ்த்திய இந் தப் படுகொலையை தொடர்ந்து வெடித்தெழுந்தது.

லண்டனின் புறநகர்ப் பகுதியான டொட்டன் ஹாம், அந்த நகரிலேயே வேலையின்மை மிக அதிகமாக நீடிக் கும் பகுதி. ஒட்டுமொத்த பிரிட்டனில், வேலையில்லாத் திண்டாட்டம் மிக அதிகமாக நிலவும் இடங்களில் டொட்டன்ஹாமும் முக்கிய இடம் பெறுகிறது. இந்த நக ரைப் போலவே பிரிட்டன் முழுவதும் வேலைவாய்ப்பு மறுக் கப்பட்ட 16 வயது முதல் 24 வயதுக்குட்பட்ட இளைஞர் களின் எண்ணிக்கை 2008ம் ஆண்டில் இருந்த 14 சத வீதத்திலிருந்து தற்போது 20 சதவீதமாக அதிகரித் துள்ளது என்பது குறிப்பிடத்தக்கது.

பிரிட்டன் மட்டும் அல்ல; ஸ்பெயின், கிரீஸ், இத் தாலி, போர்ச்சுக்கல், பிரான்ஸ், ஜெர்மனி என ஐரோப்பிய நாடுகள் அனைத்திலும் கடந்த 3 ஆண்டுகளில் வேலை யின்மை தீவிரமடைந்திருக்கிறது. ஸ்பெயினில் 46 சத வீதம் பேருக்கு வேலைவாய்ப்பு மறுக்கப்பட்டுள்ளது அல் லது பறிக்கப்பட்டுள்ளது; கிரீஸில் 40 சதவீதம், இத் தாலியில் 28சதவீதம், போர்ச்சுக்கல்லில் 27 சதவீதம், பிரான்ஸில் 23 சதவீதம் என வேலையின்மை அதி முக்கியத்துவம் வாய்ந்த பிரச்சனையாக மாறியிருக்கிறது. ஐரோப்பிய யூனியனில் பிரிட்டன் உள்பட மொத்தம் 27 நாடுகளில் சராசரியாக 20.5 சதவீதம் என்ற அளவில் வேலையின்மை விகிதம் நீடிக்கிறது. எனவே ஒட்டு மொத்த ஐரோப்பிய யூனியன் நாடுகளிலும் வேலை யின்மைக்கு எதிரான குமுறல், இளைஞர்களிடையே வெடித்து கிளம்பக் காத்திருக்கிறது.

2008ம் ஆண்டில் அமெரிக்காவில் மையம் கொண்ட பொருளாதார நெருக்கடி-நவீன தாராளமயக் கொள்கை களை முழுமையாக அமல் படுத்திய அனைத்து நாடு களையும் மிகக் கடுமையாக தாக்கியுள்ளது. ஐரோப்பிய நாடு களையும் அது கடும் சூறாவளியில் சிக்க வைத்தது. இந்த நிலையில் மீண்டும் அமெரிக்க பொருளாதாரம் மிக ஆழமான நெருக்கடியை நோக்கி பயணித்துக் கொண் டிருக்கிறது. இது ஐரோப்பிய நாடுகளிலும், உலகின் பல நாடுகளிலும் எதிரொலிக்கிறது. இதுதான் பிரிட்டனிலும் எதிரொலித்துள்ளது.

நெருக்கடியில் இருந்து தற்காத்துக் கொள்கிறோம் என்ற பெயரில், மேற்கண்ட நாடுகளின் அரசுகள்-பெரும் பாலும் பழமைவாத, வலதுசாரி, பிற்போக்குவாத, கிறிஸ் தவ மத அடிப்படை வாத, இனவெறிச் சிந்தனை கொண்ட அரசுகள்- ஆளும் வர்க்க முதலாளிகளின், அவர்களது கார்ப்பரேட் நிறுவனங்களின் நலனைக் காக்க, ஏழை, எளிய, நடுத்தர மக்களின் கல்வி, சுகா தாரம், ஓய்வூதியம் உள்ளிட்ட சமூக நலத்திட்டங் களை சூறையாடி வருகின்றன. ஏற்கனவே வேலையில் இருக்கும் ஊழியர்கள் மற்றும் தொழிலாளர்களின் கூலி யில் கைவைத்துள்ளன. இதற்கு எதிரான மனக் கொந் தளிப்பின் உச்சக்கட் டமே, கடந்த ஒரு வார காலமாக அரசுக் கட்டடங்கள் சூறையாடல், தீவைப்பு, பேருந்து கள் எரிப்பு, வங்கிகள் உடைப்பு என லண்டனில் நடந்த நிகழ்வுகள்.

தற்போதைய பழமைவாத கூட்டணி அரசும் சரி, முந்தைய புதிய தொழிலாளர் கட்சியின் கோர்டன் பிர வுன் அரசும் சரி, அதற்கு முந்தைய டோனி பிளேரின் அரசும் சரி, இவர்கள் பின்பற்றிய நாசகர கொள்கை களால் சமூக ஏற்றத்தாழ்வு தீவிரமடைந்துள்ளது. பிரிட்டனில் மொத்தமுள்ள மக்கள் தொகையில் பெரும் பணக்காரர்களாக இருக்கும் 10 சதவீதம் பேரின் மொத்த வருமானம், ஏழைகளிலும் ஏழைகளாக இருக் கும் 10 சதவீதம் பேரின் மொத்த வருமானத்தை விட 100 மடங்கு அதிகம் என்று சமீபத்திய ஒரு புள்ளி விப ரம் தெரிவிக்கிறது. மொத்தமுள்ள மக்களில் 8 சதவீதம் பேர் வெள்ளை இனம் அல்லாதவர்கள். வறுமையும், வேலையின்மையும் மிகக் கொடூரமாக தாக்கும் மக்களாக இவர்கள் இருக்கிறார்கள்.

எனவே தான் லண்டனில் வெள்ளை இனம் அல் லாத, வேலையில்லாமல் ‘திரிகிற’ இந்தக் ‘குற்றவாளி கள்’, ‘கயவர்கள்’ தான் பெரும் வன்முறைக் கலவரத்தை நடத்திவிட்டார்கள் என்றும், அவர்களை இரும்புக்கரம் கொண்டு ஒடுக்கி லண்டனின் அமைதியை மீட்க வேண்டுமென்றும் இந்திய ஊடகங்கள் உட்பட உல கெங்கிலும் உள்ள ஆளும் வர்க்க ஊடகங்கள் ஊதித் தள்ளிக் கொண்டிருக்கின்றன.

ஆனால் இடதுசாரிகளின் பலம் குன்றி இருக்கக் கூடிய பிரிட்டனில், வேலையின்மைக்கு எதிராக வெள் ளையர் -கருப்பர் என்ற இன பேதம் இல்லாமல் அனைத்துத் தரப்பு உழைக்கும் வர்க்க இளைஞர் களின் உள்ளத்திலும் தகிக்கும் நெருப்பு, தற்சமயம் ஆங்காங்கே குழுக்களாக சேர்ந்திருக்கும் வாலிபர்கள் அரசியல்ரீதியாக சரியாக வழிநடத்தப்படாததால் வன் முறையாக, கலவரமாக வெளிப்பட்டிருக்கிறது.

உண்மையில் இது முதலாளித்துவ ஊடகங்கள் சொல்வது போல கலவரம் அல்ல; பிரிட்டன் இளை ஞர்களின் எழுச்சி!

(எஸ்.பி.ராஜேந்திரன்)