எஸ்.டி.பண்டாரநாயக்கா- புரட்சிகர அஞ்சலிகள்

 எஸ்.டி.பண்டாரநாயக்க மறைந்தார் எனும் செய்தி தமிழ் சூழலில் மிகச் சாதாரணமாகக் கடக்கப்பட்டுள்ளது. தமிழ் ஊடகங்களும், சமூக வலைத் தளங்களும் ஒரு செய்தியாகவேனும் வெளிப்படுத்தத் தவறியிருந்தன. இது எமது இருப்பையே கேள்விக்குரியதாக எண்ணச் செய்கிற விவகாரம். பொதுவாகவே தமிழரிடம் வரலாற்றுணர்வு இல்லை. சமகால வரலாற்றின் ஒரு அழியாத்தடத்தைக்கூடக் காணத் தவறுகிரவர்களாகவா இருப்போம்? எஸ்.டி.பண்டாரநாயக்கா கம்பஹா தொகுதி பாராளுமன்ற உறுப்பினராக இருந்தவர். எஸ்.டபிள்.யூ.பண்டாரநாயக்கா தலைமையில் தேசிய முதலாளிவர்க்க அரசு 1956 இல் ஏற்பட்ட போது அதன் அங்கமாக இருந்தவர் எஸ்.டி. ; பண்டா-செல்வா ஒப்பந்தம் ஏற்பட்டுப் பிரதேச சபைகள் ஏற்படுவதன் வாயிலாக இனப்பிரச்சனை தீர்க்கப்பட இருந்த சூழலைக் குழப்பும் நோக்குடன் ஜே.ஆர்.ஜெயவர்த்தனா கண்டி யாத்திரை சென்றுகொண்டிருந்த வேளையில் கம்பஹா மாவட்ட இம்புள்கொட என்ற இடத்தில் எஸ்.டி. தலைமையிலான தேசபக்தர்களால் முறியடிக்கப்பட்டிருந்தது ஜே.ஆரின் திட்டம். இதன் காரணமாக இம்புல்கொடவீரயா என்ற பட்டம் எஸ்.டி.யுடன் ஒட்டியிருந்தது.

பின்னர் ஒப்பந்தத்துக்குரிய தமிழரசுக் கட்சியின் தளபதியின் இளம்பருவக் கோளாறான ஸ்ரீ எதிர்ப்புப் போராட்டம் காரணமாக அந்த ஒப்பந்தம் கிழித்தெரியப்பட்டது(எழுபதுகளின் பிற்கூறில் தனது தலைமை ஜே.ஆருடன் கூடிகுலாவுவதைக் கேள்விக்குள்ளாக்கிய ஆயுதமேந்திய வாலிபர்களின் இளம்பருவக் கோளாறை உணர்த்துவத்ர்க்காகக் காலம் கடந்த உபதேசமாக அமிர் இந்த உண்மையைக் கூறியிருந்தார்). ஒருவருடத்தின் முன்னரும் அவரைச் சந்தித்த தமிழ் நண்பர்களிடம் அன்று இனப்பிரச்சனை தீர்க்கப்பட வேண்டும் என்ற உத்வேகம் தங்களிடம் இருந்தது என்று அவர் கூறியிருந்தார். அப்படித் தேடிப்போய்ச் சந்தித்தவர்கள் தமிழ்த் தேசியர்கள் அல்ல. எஸ்.டி.யின் இன்னொரு வரலாற்றுப் பங்களிப்புக்கான நன்றியுணர்வுடன் இருப்பவர்கள்தாம்! அறுபதுகளின் ஆரம்பத்தில் அவர் கம்யூனிஸ்ட் கட்சியின் உறுப்பினராக இருந்த காலத்தில்  வடபகுதியில் நடந்த கட்சி மகாநாட்டில் பங்குபற்றியிருந்தார் . அறுபதுகளின் பிற்கூறில் சாதித் தகர்ப்புப் போராட்டம் உக்கிரம் பெற்றபோது  பன்றித்தலைச்சி அம்மன் கோவிலில் நடந்த பகிரங்கக் கூட்ட்தத்தில் தோழர் கே ஏ சுப்பிரமணியம் ஆங்கில உரையை மொழிபெயர்க்க உணர்ச்சியுடன் பேசி இருந்தார்.பின்னர்  சங்கானையில் சாத்வீகமாய்த் தேநீர்க்கடைகளினுள் சென்று தேநீர் கேட்டமைக்காக நிச்சாமக் கிராமத்தின் வீடுகள் தீக்கிரையாக்கப்பட்டன. தனது தொகுதிக்குள் நடந்த இந்தக் கொடுமையைக் காணாதவர் போல் நடித்து மறைத்துவிட முயன்ற அமிர்தலிங்கத்தின் முகத்திரையைக் கிழித்தவர் எஸ்.டி.; நேரில் சென்று சங்கானையில் சம்பவ இடங்களைப் பார்த்து வீடுகளை இழந்த மக்களுக்கு ஆறுதல் கூறி பாராளுமன்றத்தில் முழு அளவில் சாதி வெறியின் கொடூரத்தை அம்பலப்படுத்தியிருந்தார். ஆக, அனைத்து வடிவக் கொடூரங்களுக்கும் ஒடுக்கு முறைகளுக்கும் எதிராகப் போராடியவர் எஸ்.டி. மிக அண்மையில் திருமதி கே ஏ சுப்பிரமணியம் அவர்களுடன்

விடுதலையை நேசிக்கும் ஒவ்வொருவரும் அவருக்கான புரட்சிகர அஞ்சலியைத் தெரிவிக்கும் அதேவேளை அவரது தலைமுறையின் சமூக மாற்றப் போராளிகளின் பங்களிப்பைக் கற்றுக்கொண்டு புதிய வரலாறு படைப்பதற்கு திடசங்கர்ப்பம் பூண்போம்! அவரது இழப்பால் துயருறும் குடும்பத்தினருக்கு ஆறுதல் கூறுவதுடன் அனைத்து சமூக மாற்றச் சக்திகளுடனும் இணைந்து புதிய பண்பாட்டுத்  தளம்  தனது புரட்சிகர அஞ்சலியைத் தெரிவிக்கின்றது!

(புதிய பண்பாட்டுத்  தளம்)