தமிழரசு கட்சியின் அடுத்த தலைவர் யார்?

கூட்டமைப்பினரின் தற்போதைய முக்கிய பிரச்சினை அரசியல் தீர்வோ அல்லது சர்வதேச விசாரணையோ இல்லை, மாறாக தமிழரசு கட்சியின் அடுத்த தலைவராக யாரை நியமிப்பது, தலைவரென்று ஒருவரை நியமித்துவிட்டால், அடுத்த கட்சியின் பொதுச் செயலாளராக யாரை நியமிப்பது? பட்டவர்த் தனமாக பார்த்தால் உண்மையில் இது தமிழரசு கட்சியின் பிரச் சினையே அன்றி, தமிழ் தேசியக் கூட்டமைப்பின் பிரச்சினையில்லை. அப்படியானால் கூட்டமைப்பின் பிரச்சினையாக இதனை ஏன் குறிப்பிட வேண்டுமென்று நீங்கள் யோசிக்கலாம். இதில் ஒரு சங்கதி உண்டு. தற் போது கூட்டமைப்புக்கள் எல்லோ ரும் ஐக்கியமாக இருப்பதாக தெரிந்தாலும், உண்மையில் கூட்டமைப்பின் அதிகார பூர்வமான தலைமையாக தமிழரசு கட்சியே இருக்கிறது. அந்த அடிப்படையில், கூட்டமைப்பின் அதிகாரம்மிக்க செயலாளராக மாவை சேனாதி ராஜாவுமே இருக்கின்றனர். கூட்டமைப்பை திறக்கும், மூடும் சாவி தமிழரசு கட்சியின் கையில்தான் இருக்கிறது.

இதனை கருத்தில் கொண்டுதான் அவ்வப்போது கூட்டமைப்பில் அங்கத்துவம் வகித்துவரும் ஏனைய கட்சியினர் கூட்டமைப்பை பதிவு செய்யுங்கள் என்று போர் கொடி உயர்த்தினர். ஆனால் அது இன்றுவரை சரிவரவில்லை. அது சரியும் வராது. ஏனெனில் கூட்டமைப்பின் தலைமை தமிழரசு கட்சியில்லாத ஒருவரிடம் போய்விடக் கூடாது என்பதில் சம்பந்தனும், மாவையும் மிகவும் தெளிவாக இருக்கின்றனர். இந்த அடிப் படையில்தான் தற்போது தமிழரசு கட்சியின் புதிய தலைவர் செயலாளர் விவகாரம் பாரதூரமான விவகாரமாக மற்றவர்களால் பார்க்கப்படுகிறது.

ஏனெனில் தமிழரசு கட்சியின் புதிய தலைவர் செய லாளர்கள்தான் சம்பந்தனுக்கு பின்னர், கூட்டமைப்பை வழிநடத்தப் போகிறவர்கள். அந்த சந்தர்ப்பத்தில் அனுபவம் உள்ள சுரேஸ் பிரேமச்சந்திரன், சித்தார்த்தன், அடைக்கலநாதன் போன்ற தலைவர்கள் அனைவரும், புதிதாக அரசியலுக்குள் முளைத்தவர்களிடம் ஆசனங்களுக்காக கையேந்தும் நிலைமை ஏற்படலாம்.

சம்பந்தன் ஒரு கல்லில் இரு மாங்காயை அடிக்க முயல்வதாகவே அவருக்கு நெருக்கமானவர்கள் கூறுகின்றனர். பொதுவாகவே சம்பந்தன் அப்படித்தான், முடிந்தவரை ஒரு கல்லில் பல மாங்காய் அடிக்க முயல்பவர். நீண்டகாலமாக புலிகளை எதிர்ப்பதையே தனது அரசியல் இலக்காக கொண்டிருந்த அவர், தீடீரென்று பிரபாகரனின் எகத் தலைமைத்துவ வாதத்தை ஏற்றுக் கொண்டு, புலிகளின் பக்கமாக தாவினார்.

ஆனால் உண்மையில் சம்பந்தன் தாவவில்லை. மாறாக ஒரு கல்லில் இரு மாங்காய் விழுத்துவதற்கான சந்தர்ப்பத்தை எதிர்பார்த்துக் கொண்டிருந்தார். அவருக்குத் தெரியும் பிரபாகரன் ஒரு போதுமே அமைதிக்கு திரும்பப் போவதில்லை. எனவே பிரபாகரன் மீண்டும் யுத்தத்தை தொடங்கினால் பெருபாலும் அது பிரபாகரனின் முடிவாகவே அமையும். அவ்வாறு நிகழ்ந்தால் அனுபவம், ஆற்றல், வயது ஆகியவற்றால் தமிழர்களின் அரசியல் தலைமைத்துவமானது, தான் எந்த முயற்சியும் செய்யாமலேயே தன் காலடியில் விழும் என்பதே சம்பந்தனின் கணக்கு. அவர் போட்ட கணக்குப் பிழைக்க வுமில்லை. இறுதியில் ஒரு கல்லில் இரு மாங்காயை அவர் வீழ்த்தினார். அவரது எதிரியான பிரபாகரனும் ஒழிந்தார். அத்துடன் அவர் விரும்பிய தமிழர்களின் நிராகரிக்க முடியாத் தலைவர் என்னும் தகுதியும் அவருக்கு கிடைத்தது. ஆனால் அவரது ஒரு கல் இரு மாங்காய் விளையாட்டு ஜனாதிபதி ராஜபக்ஷவிடம் மட்டும்தான் செல்லுபடி யாகவில்லை. ஜனாதிபதி ராஜபக்ஷவுடன் ஓர் ஒப்பந்தத்தை ஏற்படுத்திக் கொள்வதுதான் சம்பந்தனின் அரசியல் இலக்கு. அது நிறைவேறுவது அல்லது நிறைவேறாமல் போவது, என்பதெல்லாம் அவருக்கு ஒரு பிரச்சினையே இல்லை. தனக்கும், ஜனாதிபதிக்கும் இடையில் அப்படியொன்று நிகழ வேண்டும். அவ்வளவுதான் சம்பந்தனுக்கு வேண்டும்.

சர்வதேச ரீதியான நெருக்கடிகள் அதிகரித்தால் வேறு வழியில்லாமல் ஜனா திபதி அத்தகையதொரு ஒப்பந்தத்திற்கு இணங்கிவிடுவார் என்பதுதான் சம்பந்தனின் ஒரு கல் இருமாங்காய் கணக்கு. ஆனால் அந்தக் கணக்கு ஜனாதிபதியிடம் செல்லுபடியாகவில்லை. இதனை சம்பந்தன் விளங்கிக் கொண்டதால்தான், தற்போது சர்வதேசத்தின் மீது பாரத்தை போட்டுவிட்டு, அமைதியாக ஆலயங்களுக்கு சென்று கொண்டிருக்கிறார் சம்பந்தன். அவர் நினைத்தது ஒன்றும் நிகழவில்லை என்றால், அவர் செல்வநாயகம் சொன்னது போன்று, கடவுள்தான் தமிழ் மக்களை காப்பாற்ற வேண்டும் என்று, கூறிவிட்டு ஒதுங்கிவிடுவார். ஆனால் அதற்கு முன்னர் சில வேலைகளை அவர் செய்ய முயல்கிறார்.

தனக்கு பின்னரும் கூட்டமைப்பு என்பது மிதவாதிகளின் தலைமையின் கீழ் இருப்பதற்கு ஏற்றவாறான சில ஏற்பாடுகளை அவர் செய்ய முயல்வதாகவே தெரிகிறது. அவர் தனது ஒரு கல் இரு மாங்காய் கணக்கை தற்போது தமிழரசு கட்சிக்குள் போட முயல்கின்றார்.சம்பந்தன் எப்போதும் முதலில் ஒரு செய்தியை அடிபட விடுவார், பின்னர் அந்த விவகாரம் எவ்வாறு மற்றவர்களால் நோக்கப்படுகிறது என்பதை அவதானிப்பார், இறுதியில் காரியத்தில் இறங்குவார். இப்போதும் அப்படித்தான் இறங்கியிருக்கின்றார். தான் தமிழரசு கட்சியின் தலைமை பொறுப்பிலிருந்து விலகிக் கொண்டு, அந்தப் பொறுப்பை ஏனைய ஒருவருக்கு வழங்கப் போவதான செய்தியொன்றை கசியவிட்டிருக்கிறது. அவ்வாறு கசிந்த செய்தி பல ஊகங்களை கிளப்பிவிட்டிருக்கிறது. அதில் ஒன்று, தமிழரசு கட்சியின் அடுத்த தலைவராக வடக்கு முதல்வர் விக்கினேஸ்வரனை சம்பந்தன் நியமிக்க கூடும். இது ஒரு ஊகமென்றால், அடுத்த ஊகம் இல்லை, அடுத்த தலைவர் மாவை சேனாதி ராஜாவாம். அப்படியென்றால் அவர் தற்போது வகித்துவரும் செயலாளர் பதவிக்கு என்ன நிகழும்? இப்படியொரு கேள்வியை இன்னும் சிலர் எழுப்புகின்றனர்.

விக்னேஸ்வரனை வடக்கு முதல்வர் வேட்பாளராக நியமிப்பதற்கான தீர்மானத்தின் போதும், இப்படித்தான் முதலில் ஊகங்கள் பரவின. பின்னர் அனைவரும் அழைத்தால் நான் வருவேன் என்று விக்னேஸ்வரன் ஒரு கதை சொன்னார். அவரது கதையை தமிழ் ஊடகங்களும் கொட்டை எழுத்தில் பிரசுரித்து, அவரை முதன்மை வேட்பாளராகவே விளம்பரம் செய்தன. இறுதியில் சம்பந்தன் தன் கல்லை எறிந்தார். விளைவு விக்னேஸ்வரன் வடக்கு முதல்வர் வேட்பாளரானார். தான்தான் வடக்கு முதல்வர் என்னும் ஆசையுடன் அலைந்து கொண்டிருந்த மாவையோ, அவமானத்துடன் தானாகவே போட்டியிலிருந்து ஒதுங்கும் நிலை உருவானது. ஒரு கல்லில் விக்கி முதல்வரானார், மாவை ஒதுக்கப்பட்டார். இப்போதும் சம்பந்தன் ஒரு கல்லை எடுத்திருக்கிறார். ஆனால் இன்னும் எறிஎன்னும் ஊகத்தை எற்படுத்தியிருக்கின்றார். சம்பந்தன் கடந்த பாராளுமன்ற தேர்தலின்போதே தனக்கு நெருக்கமானவர்களிடம் இதுதான் எனது கடைசி தேர்தல் அடுத்த முறை நான் போட்டியிட மாட்டேன் என்று கூறியதாக சொல்லப்படுகிறது. அவர் பெரும்பாலும் தேசிய பட்டியலிலேயே அடுத்த முறை பாராளுமன்றம் வரவுள்ளதாகவே சொல்லப்படுகிறது. இதன் காரணமாகத்தான் சுமந்திரன் யாழ்ப்பாணத்தில் போட்டியிடத் தீர்மானித்துள்ளதாகவும் சொல்லப்படுகிறது. விடயம் உண்மையோ அல்லது இல்லையோ ஆனால் சம்பந்தன் தனது இறுதிக் காலத்தில் சில மாற்றங்களை செய்ய முயற்சிக்கிறார் என்பதை ஒதுக்கித்தள்ள முடியாது. அதில் பிரதானமானதுதான் தமிழரசு கட்சியின் கட்டமைப்பில் மாற்றத்தை ஏற்படுத்தி, அதன் மூலமாக கூட்டமைப்பின் அடுத்த தலைமையாக தனக்கு பிடித்தமானவர்களை அமர்த்துவது தற்போது கசிந்துள்ள செய்தியின் படி, சம்பந்தன் தமிழரசு கட்சியின் தலைவர் பதவியிலிருந்தது விலகி, அதனை பிறிதொருவருக்கு கொடுப்பதெனில், அது யாராக இருக்கலாம். அது ஒன்றில் விக்வினேஸ்வரனாக இருக்கலாமா? விக்கினேஸ்வரனை நியமிப்பதெனின் அதற்கு கட்சியின் மத்திய குழுவில் பெரும்பாலானவர்களின் ஆதரவு தேவை. ஆனால் சம்பந்தன் கடந்த ஐந்து வருடங்களில் கட்சியின் மத்திய குழுவை ஒரு புழுவாகக் கூட மதித்தவரல்ல.

அப்படியே விக்கி, இல்லை பிறிதொருவர் என்றால், அது யார்? சிலர் மாவையில் பக்கமாக திரும்புகின்றனர்.

தமிழரசு கட்சியை பொறுத்தவரையில் மாவை மிகவும் மூத்த அரசியல் வாதி. சிறைகளுக்கெல்லாம் சென்று திரும்பிய செம்மல் என்று போற்றப்படக் கூடியவர். அவரா அடுத்த தலைவர்? மாவை அடுத்த தலைவராக வருவதில் ஒரு பிரச்சினையும் இல்லை. ஆனால் அவர் தலைவர் பதவிக்கு நியமிக்கப்பட்டால், இதுவரை மாவை வகித்துவந்த அதிகாரம்மிக்க செயலாளர் பதவியை யார் வகிப்பார்? இங்குதான் சம்பந்தன் தனது ஒரு கல் இருமாங்காய் திட்டத்தை அரங்கேற்றப் போகிறாரோ என்னவோ! மாவையின் ஆளுமை குறித்து தமிழ் சமூகத்திற்கு நன்கு தெரியும்.

எனவே சம்பந்தனுக்குப் பிறகு, கட்சியை வழிநடத்தக் கூடிய ஆற்றல் மாவைக்கு இல்லை என்பதை சம்பந்தன் நன்கு அறிவார். எனவே மாவையை கட்சியின் தலைமைப் பதவிக்கு கொண்டு வந்துவிட்டு, அதிகாரம்மிக்க செயலாளர் பதவியை பிறிதொருவருக்கு வழங்க வாய்ப்புண்டு. இந்த இடத்தில் சிலரது பார்வை தற்போது தேசிய பட்டியல் நாடாளுமன்ற உறுப்பினராக இருக்கின்ற எம். ஏ. சுமந்திரன் பக்கமாகவும் திரும்புகிறது. சுமந்திரனை ஒரு வேளை சம்பந்தன் செயலாளர் பதவிக்கு நியமிக்கக் கூடும் என்றவாறான ஒரு ஊகமும் உண்டும்.

சுமந்திரன் அடுத்துவரவுள்ள பாராளுமன்ற தேர்தலில் போட்டியிட்டு வெல்ல வேண்டுமென்பதில் அக்கறை கொண்டிருப்பதற்கும் மேற்படி விவகாரத்திற்கும் தொடர்பு உண்டோ? சுமந்திரன் போன்ற ஒருவரின் உதவியின்றி மாவையால் தமிழரசு கட்சியை கொண்டு நடத்த முடியாது என்பதே சம்பந்தனின் கணக்காக இருக்கலாம். தற்போது தமிழரசு கட்சியின் துணைச் செயலாளராக மட்டக்களப்பு மாவட்டத்தை நேர்ந்த துரைராஜசிங்கமே இருக்கிறார். ஒரு வேளை மாவையை தலைவராக நியமித்துவிட்டு, துரைரா ஜசிங்கத்தை கட்சியின் செயலாளராகவும் ஆக்க முடியும். ஏனெனில் சம்பந்தன் கிழக்கு மாகாணத்தைச் சேர்ந்தவர் என்பதால், பின்னர் ஒரு கிழக்கு ஆளை தமிழரசு கட்சியின் பதவிக்கு நியமிக்க எண்ணம் கொண்டிருக்கலாம்.

அப்படிப் பார்த்தாலும் அது மாவைக்கு உயர்வு அல்ல, வீழ்ச்சிதான். அதனை மாவை ஏற்பாரா என்பதும் கேள்வியே! இப்படி பல கோணங்களில் இதனை பார்க்கலாம். ஆனால் சம்பந்தன் தன்னுடைய ஒரு கல் கருமாங்காய் கணக்கை போட்டுவிட்டார், ஆனால் எப்போது, எப்படி எறியப் போகிறார் என்பதை பொறுத்திருந்தே பார்க்க வேண்டும்.

ஆனால் சம்பந்தன் கல் எறிவாரானால், நிச்சயமாக தனக்கு விருப்பமான ஒன்றை செய்யாமல் விடமாட்டார்.

(தினகரன்)