உலகின் முதல் மொழியில் நீங்கள் எல்லோரும் பேசிக்கொண்டிருக்கிறீர்கள்.

உலகின் முதல் மொழியில் நீங்கள் எல்லோரும் பேசிக்கொண்டிருக்கிறீர்கள். எத்தனையோ மொழிகள் பிறந்திருக்கின்றன, பல மொழிகள் காணாமல் போயிருக்கின்றன. பல மொழிகள் நிலைத்திருக்கின்றன. பல மொழிகள் அழியும் நிலையில் இருக்கின்றன. முதன் முதலில் தோன்றிய உங்கள் மொழியோ நிலைத்திருக்கிறது, வளர்ந்துகொண்டே இருக்கிறது. ஆம், பூமியில் வாயால் பேசப்படுகிற, கையால் எழுதப்படுகிற மற்ற மொழிகள் பிறப்பதற்கு முன் பிறந்த, அந்த மொழிகள் பிறப்பதற்கே கருவாக இருந்த மொழி உங்கள் சைகை மொழிதான். எந்த ஓசையும், பேச்சும் கேட்காத அமைதியான இடத்தில் இருக்க வேண்டும் என பலரும் விரும்புவதுண்டு. ஆனால், இயற்கையாகவே உங்கள் உலகம் அமைதியானது. உங்களோடு பேசக் கிடைத்த இந்த வாய்ப்பை என் வாழ்வின் முக்கியத் தருணமாகக் கருதுகிறேன். அனைவரின் சம உரிமைகளுக்காக நிற்பவன் நான் என்பதற்காக மட்டுமல்ல, நானும் ஒரு வகையில் உங்களைப் போல் ஒரு மாற்றுத் திறனாளிதான் - எனது ஒரு காது கேக்காது - என்பதாலும்தான்!

ரயில் பயணத்தில் மாற்றுத்திறனாளிகளுக்கான கட்டணச் சலுகை உள்ளிட்ட சட்டப்பூர்வ ஏற்பாடுகளைப் பெற வேண்டுமானால், 100 சதவீத மாற்றுத்திறனாளியாக இருந்தால்தான் கிடைக்கும், 80 சதவீதம், 60 சதவீதம், 50 சதவீதம் என இருந்தால் கிடைப்பதில்லை என்று இங்கே எனக்கு முன் உரையாற்றிய உளவியல் வல்லுநரும் அனைத்துவகை மாற்றுத் திறனாளிகள் கூட்டமைப்பின் பொறுப்பாளர்களில் ஒருவருமான ராதாகிருஷ்ணன் தெரிவித்தார். உண்மையாகவே 100 சதவீத மாற்றுத் திறனாளி என யாரைச் சொல்ல முடியும் -இறந்து போனவரின் பிணத்தைத் தவிர?

மாற்றுத் திறனாளியாக இருப்பது இயற்கையின் விபத்து என்று சிலர் பரிவோடு கூறுவதுண்டு. ஆனால், மாற்றுத் திறனாளியாக ஒருவர் இருப்பதும் இயற்கைதான், இயற்கையான அமைப்புதான் என்று அவர்களுக்குச் சொல்ல வேண்டியிருக்கிறது. ஆகவே, மாற்றுத்திறனாளி அல்லாதவர்களுக்கான அனைத்து உரிமைகளும் மாற்றுத்திறனாளிகளுக்கும் உண்டு. அவர்களுக்குத் தேவைப்படுவது மற்றவர்களுடைய பரிவு அல்ல, இவர்களும் நமக்குச் சமமானவர்களே என்ற உணர்வுதான்.

பல தலைவர்கள், அறிவியலாளர்கள், கலைஞர்கள், எழுத்தாளர்கள் மாற்றுத்திறனாளிகள்தான். பிரபஞ்சம் எப்படி உருவானது என்ற உண்மையைக் கண்டுபிடித்த ஸ்டீபன் ஹாக்கின்ஸ், நடமாடவே முடியாத, வாய்பேசவே முடியாத, கணினி மூலமே எந்திரக்குரலில்தான் பேச முடியும் என்ற நிலையில் இருப்பவர் அவர். கேரளத்தின் முதலமைச்சராக இருந்த இ.எம்.எஸ். நம்பூதிரிபாட் திக்கு வாய் பிரச்சனையோடு இருந்தவர். ஒரு பத்திரிகை நிருபர் அவரிடம், “எப்போதுமே நீங்கள் இப்படித்தான் திக்குவீர்களா” என்று கேட்டபோது, “இல்லை, பேசும்போது மட்டும்தான் திக்குவேன்” என்று நகைக்சுவையாகச் சொல்ல அவரால் முடிந்தது. அமெரிக்காவில் அடிமைத்தனத்தை ஒழிப்பதில் முக்கியப் பங்காற்றியவரான ஆபிரகாம் லிங்கன் மிக உயரமானவர். எதிர்க்கட்சி நண்பர் ஒருவர் அவரிடம், ஒரு மனிதரின் கால்கள் எவ்வளவு நீளம் இருக்கலாம் என்று கிண்டலாகக் கேட்டபோது, “இடுப்பிலிருந்து தரையைத் தொடுகிற வரையில் இருந்தால் போதுமானது,” என்று நகைச்சுவையோடு குறிப்பிட்டார் லிங்கன்.

இழிவுபடுத்தாமல் சக மனிதர்களாக மதிக்கப்படுவதையும். அந்த அடிப்படையில் இயல்பாகக் கேலி செய்யப்படுவதையும் கூட மாற்றுத்திறனாளிகள் விரும்புவார்கள். ஆனால் காலம் காலமாக, மாற்றுத்திறனாளிகளை சமுதாயம் இளக்காரம் செய்து வந்திருக்கிறது. திரைப்படங்களில் காது கேட்காதவரை, திக்கிப் பேசுகிறவரை கேலிப்பாத்திரங்களாக்கி சிரிப்பு மூட்டுகிறார்கள். குடும்பங்களில், பணித்தலங்களில், பொது இடங்களில் என எங்கும் மாற்றுத்திறனாளிகள் சுமைகளாகப் பார்க்கப்படுகிறார்கள். மாற்றுத்திறனாளிகள் தங்களைச் சார்ந்திருக்கிறார்கள் என்று மற்றவர்கள் நினைக்கிறார்கள். உண்மையில் அவர்களும் மாற்றுத்திறனாளிகளைச் சார்ந்திருக்கிறார்கள் என்பதை அவர்களுக்குச் சொல்லியாக வேண்டியிருக்கிறது. மனிதர்களின் இன்றைய வளர்ச்சிகளுக்கு அடிப்படையான பல கண்டுபிடிப்புகளை வழங்கியவர்கள் மாற்றுத்திறனாளிகள்தான்.

சமுதாயத்தின் இந்த ஊனத்தை சரி செய்ய வேண்டிய முதல் பொறுப்பு அரசாங்கத்திற்கே உரியது. அரசு என்றால் இந்தக் கட்சி அரசு, அந்தக் கட்சி அரசு என்ற பொருளில் சொல்லவில்லை, மாறாக எந்தக் கட்சியானாலும் மாறாத அரசுக் கட்டமைப்பையே கூறுகிறேன். அரசிடமிருந்து மாற்றுத் திறனாளிகள் எதையும் சலுகையாக எதிர்பார்க்கவில்லை, உரிமையாகவே எதிர்பார்க்கிறார்கள்.

நடப்பது என்ன? சென்ற ஆண்டு டிசம்பரில், அன்றைய மத்திய அரசு, நாடாளுமன்றத்தில் மாற்றுத்திறனாளிகளுக்கான ஒரு புதிய சட்டமுன்வரைவைக் கொண்டுவர இருந்தது. ஆனால், அதைத் தாக்கல் செய்யாமலே தள்ளிவைத்துவிட்டது. அதன் பிறகு, பட்ஜெட் கூட்டத்தொடர் என்பதால் அப்போதும் அந்தச் சட்டத்தை நிறைவேற்ற முடியவில்லை. தேர்தலுக்குப் பிறகு வரக்கூடிய அரசு இது பற்றி முடிவெடுக்கட்டும் என்று விட்டுவிட்டார்கள். தேர்தல் வந்தது, தேர்தலுக்குப் பிறகு புதிய அரசும் வந்தது. புதிய அரசு அந்தச் சட்டத்தை நிறைவேற்றப் போகிறதா இல்லையா என்பதற்கு எந்த அறிகுறியும் தென்படவில்லை.

இங்கே எனது பேச்சை வழக்குரைஞர் ஜஸ்டின் உங்களுக்கு சைகை மொழியிலும், நீங்கள் சைகை மொழியில் கூறுவதை எங்களுக்குப் பேச்சு மொழியிலுமாக மொழிபெயர்க்கிறார். நான் சொல்கிற கருத்துகளை உடனுக்குடன் புரிந்துகொண்டு நீங்கள் சிரிப்பதும், (கரவொலி எழுப்புவதற்கு மாறாக) கைகளை உயர்த்தி அசைத்து அங்கீகரிப்பதும் கண்டு நான் உணர்ச்சி வசப்படுகிறேன். இதே போன்று, உங்களின் கோரிக்கைகள், அனைத்து மாற்றுத்திறனாளிகளின் தேவைகள் அரசுக்குப் புரிய வேண்டுமானால், அரசுக்குப் புரிகிற மொழியில் நீங்கள் மொழிபெயர்க்க வேண்டிய தேவை இருக்கிறது. அந்த மொழி - ஒன்றுபட்ட போராட்டம்.

(தமிழ்நாடு காதுகேளாதோர் சங்கத்தின் சார்பில் ஆகஸ்ட் 15ல் நடைபெற்ற சுதந்திரதின விழாவில் பங்கேற்று நான் பேசியதன் சுருக்கம்.)

(குமரேசன்)