தேசத்துரோகிகளை மக்கள் தண்டிப்பார்கள்

இலங்கை ஜனாதிபதி பதவியை வகித்து வரும் மஹிந்த ராஜபக்ஷ இந்நாட்டு மக்கள் அனைவருக்கும் ஜனாதிபதி யாக இருந்து தனது நல்லாட்சியை கட்சி சார்பற்ற முறையில் மேற்கொண்டு வருகிறார். இவர், ஐக்கிய மக்கள் சுதந்திர முன்னணி மாத்திரம் சொந்தமானவர் அல்லர். இந்நாட்டில் உள்ள சகல மக்களுக்கும் சொந்தமானவரே நாட்டின் ஜனாதிபதி ஆவார்.

உள்நாட்டில் அரசியல் கட்சிகளுக்கு இடையே கருத்து மோதல்கள் தோன்றும் போது, அரசாங்கத்தின் தலைவராக இருக்கும் ஜனாதி பதியை பொதுவாக கண்டித்து பேசுவது, ஜனநாயக பாராளுமன்ற சம்பிரதாயத்திற்கு ஏற்புடைய ஒரு விடயமாகும்.

இன்று, ஐக்கிய மக்கள் சுதந்திர முன்னணி பாராளுமன்றத்தில் அதிக ஆசனங் களை பெற்று அதிகாரத்தில் வீற்றிருக்கும் போது, ஜனாதிபதியாக இருக்கும் ஒருவர் தப்பித்தவறி எதிர்க் கட்சியான ஐக்கிய தேசியக் கட்சி பாராளுமன்றத்தில் கூடுதலான ஆசனங்களை கைப்பற்றி அரசாங்க நிர்வாகத்தை பொறுப்பேற்றாலும், இதே ஜனாதிபதியே அடுத்து ஆறாண்டு காலத்திற்கும் ஜனாதிபதியாக இருப்பார்.

இந்த யதார்த்தத்தை புரிந்து கொள்ளாமல், சுயநல நோக்கத்துடன் அரசியல் லாபத்தை தேட எத்தனிக்கும் விரல் விட்டு எண்ணக்கூடிய ஒரு சில துஷ்ட சக்திகள் ஜனாதிபதிக்கு அபகீர்த்தியை ஏற்படுத்தக் கூடிய வகையில் வெளிநாடுகளில் பயங்கரவாதத்தை ஆதரிக்கும் சக்திகளுடன் இணைந்து ஆர்ப்பாட்டங்களில் ஈடுபடுவது மன்னிக்க முடியாத குற்றமாகும்.

இத்தகைய தீயசக்திகள் தாங்கள் தங்கள் தாய்நாட்டிற்கே துரோகம் இழைக்கிறார்கள் என்ற தத்துவத்தை மறந்து செயற்படுவது உண்மை யிலேயே வேதனைக்குரிய விடயமாகும். இவ்விதம் எதிர்க் கட்சி பாராளுமன்ற உறுப்பினர் ஜயலத் ஜயவர்தன ஒரு மன்னிக்க முடியாத குற்றத்தை இழைத்திருக்கிறார்.

இவர், ஜனாதிபதி லண்டன் செல்வதற்கு ஒரு வாரத்திற்கு முன்னரே அங்கு சென்று பயங்கர வாதிகளை ஆதரிக்கும் ஒரு சிலரை சந்தித்து, ஜனாதிபதிக்கு எதிரான பிரசாரங்களை அங்கு முடுக்கி விட்டார் என்பதற்கான ஆதாரங்கள் இப்போது அரசாங்கத்திற்கு கிடைத்துள்ளன.

இலங்கையின் அரசியல் சாசனத்திற்கு அமைய பாராளுமன்றத்திற்கு உறுப்பினராக தெரிவு செய்யப்படும் ஒருவர், நான் இலங்கையின் இறைமைக்கும், தேசிய பாதுகாப்புக்கும் உத்தரவாதம் அளிக்கக் கூடிய வகையில் பிரிவினைவாத பயங்கரவாத சக்திகளுடன் இணைந்து செயற்பட மாட்டேன் என்று, உறுதிப்பிரமாணம் எடுப்பார்.

ஜயலத் ஜயவர்தன, இந்த உறுதிப்பிரமாணத்தை மீறி லண்டன் மாநகரில் பிரிவினைவாத பயங்கரவாத சக்திகளுடன் இணைந்து செயற்பட்டதன் மூலம், தேசத் துரோகத்தை இழைத்து விட்டமைக் காக, இவர் மீது சட்டப்படி நடவடிக்கை எடுக்க வேண்டும் என்று பாராளுமன்றத்தில் எல்லோருடைய பெரும் மதிப்பை பெற்றிருக்கும் அமைச்சர் தினேஷ் குணவர்தன திட்டவட்டமாக அறிவித்திருக்கிறார். இதற்கமைய, தக்க ஒழுங்கு நடவடிக்கைகள் அவருக்கு எதிராக எடுக்கப்படும் என்றும் நாம் நம்புகிறோம்.

சில தீயசக்திகள் ஜனாதிபதியை வெளிநாட்டில் அவமதிக்கும் வகையில் செயற்பட்டாலும், பொதுமக்கள் ஜனாதிபதி மஹிந்த ராஜபக்ஷயை மனப்பூர்வமாக ஆதரித்து வருகிறார்கள்.

ஜனாதிபதி லண்டனிலிருந்து தாய்நாடு திரும்பிய போது, கட்டுநாயக்க சர்வதேச விமான நிலையத்தில் குழுமியிருந்த பல்லாயிரக் கணக்கான மக்கள் வெள்ளம், ஜனாதிபதிக்கு தங்கள் ஆதரவை வெளிப்படுத்துவதற்காக கோஷங்களை எழுப்பிய நிகழ்வு, பாராளுமன்ற ஜனநாயக சுதந்திரத்தின் மீது நம்பிக்கை கொண்டுள்ள இந்நாட்டு மக்கள் அனைவருக்கும் பெரும் மகிழ்ச்சியை அளித்திருக்கிறது.

ஜனாதிபதியின் சிறந்த, நேர்மையான, நடுநிலையான ஆளுமையைக் கண்டு, பொறாமைப்படுபவர்களின் இத்தகைய தேசத்துரோக நடவடிக்கைகளைப் பார்த்து, ஜனாதிபதி சிறிதேனும் கவலைப்படாமல் தொடர்ந்து தனது நல்லாட்சியை மேற்கொண்டு வருகிறார். அவருக்கு எல்லாம்வல்ல இறைவனின் நல்லாசி என்றும் இருக்கும் என்பதையும் நாம் ஞாபகப்படுத்த விரும்புகிறோம்.

ஐக்கிய தேசிய கட்சியின் இரு சிரேஷ்ட அங்கத்தவர்கள், இலங்கையின் ஜனாதிபதியை வெளிநாடு ஒன்றில் வைத்து அவமதிப்புக்குட்படுத்திய செயல் தவறானது என்று, பகிரங்கமாக கண்டனம் தெரிவித்துள்ளனர். இதேவேளையில், பேராசிரியர் ரட்ணஜீவன் ஹுல், ஜனாதிபதி ராஜபக்ஷ ஒக்ஸ்வோட் மாணவ மன்றத்தில் உரையாற்றுவதற்கு முடியாமல் போனமை கண்டனத்திற்குரிய செயல் என்று தெரிவித்திருக்கிறார்.

வடபகுதியில் வவுனியா, கிளிநொச்சி, முல்லைத்தீவு உட்பட பல இடங்களில் பொதுமக்கள் சுலோகங்களை ஏந்தியவாறு ஜனாதிபதிக்கு ஆதரவு தெரிவித்து, லண்டனில் அவருக்கு எதிராக மேற்கொள்ளப்பட்ட துரோகச் செயல்களுக்கு கடும் கண்டனம் தெரிவித்திருப்பது சிறுபான்மை மக்களின் பூரண ஆதரவு ஜனாதிபதிக்கு இருந்து வருகிறது என்பதற்கு சான்று பகர்கின்றன.

(தினகரன்)