நல்லிணக்க ஆணைக்குழு கற்றுத்தரும் பாடங்கள்

அரசாங்கத்தினால் தனது எதிர்கால நடவடிக்கைகளுக்கு ஆரோக்கியமான திட்டமொன்றை உருவாக்கும் நோக்குடன் ஆரம்பிக்கப்பட்டுள்ள கற்றறிந்த பாடங்களும் நல்லிணக்கமும் தொடர்பான ஆணைக்குழுவின் அமர்வுகள் இப்போது நாட்டின் பல பாகங்களிலும் நடைபெற்று வருகிறது. கடந்த கால, நிகழ் கால சம்பவங்களை அடிப்படையாகக் கொண்டு அரசியல்வாதிகள், சமயத் தலைவர்கள், அரச அதிகாரிகள், குடும்பப் பெண்கள், முன்னாள் விடுதலைப் புலி உறுப்பினர்கள் எனப் பலதரப்பட்டவர்களும் இந்த ஆணைக்குழு முன்னிலையில் தோன்றிச் சாட்சியளித்து வருகின்றனர்.

குறிப்பாக யுத்த காலத்தில் இடம்பெற்ற சம்பவங்களை அடிப்படையாகக் கொண்டே பல சாட்சியங்கள் பதிவாகியுள்ளன. இருந்தும் பல மூத்த அரசியல் தலைவர்கள், முன்னாள் அரச உயரதிகாரிகள் பலரும் யுத்தம் தோன்றக் காரணமாகவிருந்த பல விடயங்களை வெளிக்கொண்டு வந்து அவற்றுக்குத் தீர்வு காண்பது அவசியம் என்பதையும் வலியுறுத்தியுள்ளனர்.

உண்மையில் அரசாங்கம் இந்த ஆணைக்குழுவை அமைத்ததன் நோக்கம் நடந்து முடிந்த யுத்தத்திற்கு பரிகாரம் தேடுவதில்லை. இந்த யுத்தம் ஏற்பட அடிப்படைக் காரணம் என்ன? இனியும் அவ்வாறாதொரு நிலையைத் தோற்றுவிக்காமல் தடுப்பது எப்படி? என்பது தொடர்பாக ஆராயவே. தமிழ்பேசும் மக்கள் பல வருடங்களாக எதிர்கொண்டிருந்த பிரச்சினைகள் பலவற்றுக்கும் தீர்வு காண இந்த ஆணைக்குழுவின் இறுதிப் பரிந்துரையானது மிக முக்கியமானதாகவுள்ளது.

சுதந்திரத்திற்குப் பின்னர் நாட்டில் மாறி மாறி ஆட்சிபுரிந்து வந்த அரசாங்கங்கள் தமிழ் மக்களின் பிரச்சினைகளைச் செவிமடுக்காது ஏனோதானோ என்றிருந்த நிலையினாலேயே பிரச்சினை இவ்வளவு தூரம் பூதாகாரமாக வெடித்து வன்னி யுத்தம் வரை சென்றது. ஆனால் ஜனாதிபதி மஹிந்த ராஜபக்ஷ தலைமையிலான அரசாங்கம் இந்தப் பிரச்சினைக்குத் தீர்வு காண்பதில் மிகவும் உறுதியாக உள்ளது. குறிப்பாக விடுதலைப் புலிகளை அழித்தொழிக்கும் நோக்கம் இந்த அரசுக்கு இருக்கவில்லை. ஜனாதிபதி மஹிந்த ராஜபக்ஷ தனது முதலாவது ஜனாதிபதித் தேர்தலில் வெற்றி பெற்றதும் புலிகளை எப்படியாவது பேச்சுவார்த்தைக்கு அழைத்து ஒரு அரசியல் தீர்வினைக் காண்பதையே விரும்பினார். அதற்காக அவர் மிகவும் பொறுமையாகவும் செயற்பட்டார். புலிகள் பயங்கரவாதிகள், அவர்களுடன் என்ன பேச்சுவார்த்தை எனப் பலர் விமர்சித்தபோதிலும் அவர் பேச்சுவார்த்தைக்குப் பலமுறை புலிகளுக்கு அழைப்பு விடுத்தார்.

மறைந்த ஜனாதிபதி ரணசிங்க பிரேமதாசவையும், சந்திரிகா அம்மையாரையும், ரணில் விக்கிரமசிங்கவையும், ஏமாற்றியது போலவே இவரையும் ஏமாற்றிக் காலத்தைக் கடத்தித் தமது காரியத்தைச் சாதிக்கலாம் எனப் புலிகள் திட்டமிட்டனர் என்பது அவர்களது அன்றைய செயற்பாடுகளில் தெளிவாகப் புரிந்தது. இறுதியில் இனியும் இவர்கள் சரிப்பட்டு வரமாட்டார்கள் எனக் கண்டறிந்த பின்னரே யுத்தம் மூலமாக புலிகளை ஒழித்துக் கட்ட ஜனாதிபதி நடவடிக்கை எடுத்தார். அதன் விளைவாக இன்று மக்கள் சுதந்திரமாக நாட்டின் எப்பகுதிக்கும் சென்றுவரக் கூடியதாகவுள்ளது.

தற்போது யுத்தம் முடிவுற்றிருக்கும் நிலையில் அபிவிருத்திப் பணிகள் ஒருபுறம் நடைபெற அரசியல் ரீதியாக தமிழ்பேசும் மக்களுக்கு ஒரு தீர்வினைக் கண்டு அவர்களிடையே இதுவரை காலமும் நிலவிய எதிர்பார்ப்பை நிறைவேற்ற ஜனாதிபதி எண்ணியுள்ளார். இது இந்த ஆணைக்குழுவினால் பெற்றுக்கொள்ளப்படும் தகவல்களை அடிப்படையாகக் கொண்டு அமைக்கப்படலாம். அல்லது அதிலிருந்து சில விடயங்களை உள்வாங்கியும் கொள்ளலாம்.

இதுவரை இடம்பெற்ற ஆணைக்குழுவின் அமர்வுகளில் பல ஆரோக்கியமான சாட்சியங்கள் பதிவு செய்யப்பட்டுள்ளன. அது தவிரவும் இப்போது மாவட்ட ரீதியாக இடம்பெற்று வரும் அமர்வுகள் மக்களின் பல ஆதங்கங்களின் வெளிப்பாடுகளையும் கொண்டு வருகிறது. குறிப்பாக வடக்கு கிழக்குப் பகுதிகளில் இதன் அமர்வுகள் இடம்பெறும்போது மக்கள் பலர் முண்டியடித்துக்கொண்டு சாட்சியமளிக்க வருகின்றனர்.

அவற்றில் பெரும்பாலானவை காணாமல்போன தமது உறவுகளைக் கண்டு பிடித்துத் தருமாறு கோருவதாகவே உள்ளது. அண்மையில் திருகோணமலையில் இடம்பெற்ற ஆணைக்குழுவின் அமர்வில் பெண்கள் அதிகளவில் சாட்சியளிக்க முன்வந்ததைக் காணமுடிந்தது. அதிலும் பலர் இரகசியமாக சாட்சியளிக்க விருப்பம் தெரிவித்தனர். அதற்கான காரணத்தை அவர்களிடம் தனிப்பட்ட முறையில் கேட்டபோது தமிழ்க் குழுக்களிடையே நிலவிய போட்டி காரணமாகக் காணாமல் போன தமது பிள்ளைகள் தொடர்பாகத் தெரிவிப்பதை நாம் எப்படி வெளியாருக்குக் கூற முடியும் எனத் தெரிவித்தனர்.

அரசாங்கத்தினால் அமைக்கப்பட்ட இந்த ஆணைக்குழுவானது உண்மையில் சுதந்திரமாகச் செயற்படுவதுடன் சாட்சியமளிப்போர் எவ்விதமான பயமோ தயக்கமோ இன்றிச் சாட்சியமளிக்க முடியும் என்ற நம்பிக்கையையும் ஏற்படுத்தியுள்ளது. இலங்கை சுதந்திரம் அடைந்ததன் பின்னரான காலம் மட்டுமல்ல அது ஆங்கிலேயரின் ஆட்சியிலிருந்தபோது ஏற்பட்ட தவறுகள் அல்லது இன முரண்பாடுகள், பாகுபாடு என்பன குறித்தும் பலர் சாட்சியமளித்துள்ளனர்.

சாட்சியமளிப்போரின் நம்பகத்தன்மையான, ஆரோக்கியமான, ஏற்றுக் கொள்ளக்கூடிய கருத்துக்களையே ஆணைக்குழு பெரிதும் எதிர்பார்த்துள்ளது. இங்கு தனிப்பட்ட குரோதங்களையும், அரசியல் காய்நகர்த்தல்களையும் கச்சிதமாகச் செய்வோரும் வரத்தான் செய்கின்றனர். ஆனால், இன, மத, மொழி, அரசியல், பிரதேச வேறுபாடுகளைக் கடந்தே இந்த ஆணைக்குழு செயற்படுகின்றது. எனவே பெறுமதியான கருத்துக்களை முன்வைத்து எதிர்கால நல்லாட்சியில் நாமும் பங்காளிகளாக வேண்டும்.