எமது பண்டைய துறைமுகங்கள் வர்த்தகத்துக்கு வலுவூட்டின

இலங்கையின் பண்டைய பெருமைகளை எடுத்துக் காட்டக் கூடிய புதிய கண்டுபிடிப்புகளை எமது தொல்பொருள் ஆய்வு திணைக்களத்தைச் சேர்ந்த நிபுணர்கள் சமீபத்தில் வடக்கிலும், கிழக்கிலும் மேற்கொண்ட ஆய்வுகளின் மூலம் பெறுவதில் வெற்றி கண்டுள்ளார்கள். சுமார் 1,500 ஆண்டுகளுக்கு முன்னர், இங்கு வணிகம் செய்வதற்காக வந்த சீன மாலுமிகளும், உரோமன் சாம்பிராஜ்யத்தைச் சேர்ந்த வணிக கப்பல்களும் பயன்படுத்திய பண்டைய துறைமுகங்களின் அழிவுகளை இவர்கள் கண்டுபிடித்துள்ளார்கள். இந்த வெளிநாட்டு கப்பல்களில் வந்த வர்த்தகர்கள் சீன மற்றும் உரோமபுரியின் வர்த்தகர்கள் எமது நாட்டின் வாசனைத் திரவியங்கள் மற்றும் இரத்தினக் கற்கள் ஆகிவற்றுடன் எமது மக்களின் கடும் உழைப்பினால் உற்பத்தி செய்யப்பட்ட அரிசி உணவையும் வாங்கிச் சென்றதற்கான புதிய சான்றுகள் இப்போது வெளிவந்த வண்ணம் இருக்கின்றன.

இந்த வெளிநாட்டு மாலுமிகள் உலகெங்கிலும் கடல் பிரயாணம் செய்வதில் வல்லவர்களாக இருந்தாலும் கூட, அவர்கள் இலங்கையைச் சார்ந்த கடல் பிரதேசத்தில் பிடிபடும் மீனின் சுவையை விரும்பியும் இங்கு வருவதாக இவ்வாய்வாளர்கள் நடத்திய ஆய்வுகளின் மூலம் தெரிய வந்துள்ளது.

இந்த தகவல்களை வெளியிட்ட தேசிய பாரம்பரிய துறைக்கு பொறுப்பான அமைச்சர் ஜகத் பாலசூரிய, இந்த வரலாற்று முக்கியத்துவம் வாய்ந்த ஆவணங்கள் சுவடிகள் திணைக்களத்தில் வைத்து பாதுகாக்கப்படும் என்றும், இவை பண்டைய வரலாற்று பெருமைகளை எழுதும் முயற்சியில் ஈடுபடும் வரலாற்று ஆசிரியர்களுக்கு ஒரு வரப்பிரசாதமாக அமையும் என்றும் கூறியிருக்கிறார்.

மன்னாரில் உள்ள திருக்கேதீஸ்வரம், திருகோணமலையில் உள்ள கோணேஸ்வரம் ஆகியன வரலாற்று பெருமைக்குரிய சிவதிருத்தலங்களாக விளங்குகின்றன என்றும், இவற்றை பயங்கரவாதம் ஒழிக்கப்பட்டு, இன்று, நாட்டில் பூரண சமாதானமும், அமைதியும் ஏற்பட்டு இருக்கின்றதனால் மக்கள் அனைவரும் தங்குதடையின்றி நாட்டின் எந்தவொரு பகுதிக்கும் பாதுகாப்பாக சென்று திரும்பக்கூடியதாக இருக்கின்ற காரணத்தினால், இவ்விரு திருத்தலங்களிலுள்ள வசதிகளை மேலும் பெருக்குவதற்கு அரசாங்கம் பெருமளவில் பணத்தை இப்போது முதலீடு செய்து வருகிறது.

இவ்விரு புனித சிவத்தலங்களுக்கு இந்துக்கள் மட்டுமன்றி பெளத்தர்களும் சென்று வழிபட்டு வருகிறார்கள் என்றும், இவற்றை வெளிநாடுகளிலிருந்து கிடைக்கும் உதவியை பயன்படுத்தி உலகின் பாரம்பரிய பெருமைக்குரிய திருத்தலங்களாக மாற்றுவதற்கும், ஜனாதிபதி மஹிந்த ராஜபக்ஷவின் அரசாங்கம் தீர்மானித்து அதற்கான நடவடிக்கைகளை எடுத்துவருவது மகிழ்ச்சிக்குரிய விடயமாகும்.

இந்து சமுத்திரத்தில் அமைந்திருக்கும் அழகிய தீவான இலங்கைக்கு அருகில் ஆழ்கடலில் இருக்கும் மீன் வளத்தை சரியான முறையில் பயன்படுத்தினால், இலங்கை மக்களின் போஷாக்கு உணவான மீனை பிடித்து நியாயவிலைக்கு அதனை மக்களுக்கு பெற்றுக் கொடுக்கலாம் என்பதில் அரசாங்கம் அசையாத நம்பிக்கை கொண்டிருக்கிறது.

கடற்றொழில் மீன்பிடித்துறை அமைச்சர் டாக்டர் ராஜித்த சேனாரத்ன, தற்போது ஒரு இலங்கை பிரஜைக்கு சராசரியாக மீன் என்ற போஷாக்கு உணவு 31 கிராம் மாத்திரமே கிடைக்கின்றது என்றும், இது ஒரு மனிதனின் உடல் வழுவை பெருக்கி, அவனை ஆரோக்கியமாக வைத்திருப்பதற்கு போதுமானதாக இல்லை என்றும், எனவே 2013 ஆம் ஆண்டளவில் இதனை 61 கிராமாக அதிகரிப்பதற்கு தமது அமைச்சு வெற்றிகரமான நடவடிக்கைகளை எடுத்து இருப்பதாக கூறினார்.

மீனை கூடுதலாக பிடித்து எமது நாடின் மக்களுக்கு அதனை குறைந்த விலையில் சந்தைப்படுத்துவதற்கும் பிடிபடும் மீனை வெளிநாடுகளுக்கு ஏற்றுமதி செய்தல், அளவுக்கதிகமாக சிறிய மீனினங்கள் பிடிபடும் காலகட்டத்தில் அவற்றை பதனிட்டு ரின்களின் அடைப்பதற்கும் கடற்றொழில் நீர்வள துறை அமைச்சு இப்போது உரிய வசதிகளை செய்து வருகின்றது.

நன்னீர் மீன்பிடி, தரைவலை மீன்பிடி நாட்டிற்கு அருகில் உள்ள இடங்களில் மீன்களை பிடித்தல், ஆழ்கடலில் மீன் பிடித்தல், நூற்றுக் கணக்கான கடல் மைல்களுக்கு அப்பாலுள்ள பெரும் சமுத்திரத்தில் மீன்பிடித்தல் ஆகியவற்றிற்கு உகந்த பாரிய இழுவைக் கப்பல்களையும், சிறிய மோட்டார் படகுகளையும் உள்ளூரில் தயாரிப்பதற்கான பாரிய தொழிற்சாலைகளை வெளிநாட்டு முதலீட்டுடன் அமைப்பதற்கும் அரசாங்கம் இப்போது நடவடிக்கை எடுத்து வருகிறது.

(தினகரன்)